NEWS 4 BONGAIGAON

👉বঙাইগাঁৱত পথ দুৰ্ঘটনাত যুৱক নিহত 

                  News4Bongaigaon: ১১ মেঃ

🔯বঙাইগাঁও সদৰ থানাৰ অন্তৰ্গত জেল্কাঝাৰ পাটগিৰীপাৰাত যোৱা নিশা সংঘটিত এক পথ দুৰ্ঘটনাত এজন যুৱক নিহত হোৱাৰ লগতে আন দুজন যুৱক আহত হয় ৷ নিহত যুৱকজন বঙাইগাঁও বৰ্ষণগাঁৱৰ মুকুল সৰকাৰ ( ২০) ৷ জানিব পৰা মতে যোৱা নিশা ৭ঃ১০ বজাত জেল্কাঝাৰৰ প্ৰমোদ বৰ্মন(২০) নামৰ যুৱকজনে এ এচ ১৯ এন ২৭৩৫ নম্বৰৰ মটৰ চাইকেলখনত জেল্কাঝাৰৰ প্ৰশান্ত বৰ্মন(২১) আৰু বৰ্ষণগাঁৱৰ মুকুল সৰকাৰ( ২০) নামৰ যুৱক দুজনক বহুৱাই লৈ জেল্কাঝাৰ পাটগিৰীপাৰৰ ফালৰ পৰা জেল্কাঝাৰ চ'ক অভিমুখে পথেৰে আহি থকা অৱস্থাত দ্বীপজ্যোতি ক্লাবৰ সন্মুখত মটৰচাইকেলখন নিয়ন্ত্ৰণ কৰিব নোৱাৰি পথৰ বাওঁফালে থকা এটা বৈদ্যুতিক খুঁটাত খুন্দা মাৰে ৷ ফলত মটৰ চাইকেইকেলখনৰ চালক আৰু পিছফালে বহি থকা আৰোহী দুজনসহ তিনিওজন যুৱক পথৰ ওপৰত চিটিকি পৰে আৰু গুৰুতৰভাৱে আহত হয় ৷ ঘটনাৰ খবৰ পাই বঙাইগাঁও যান বাহন শাখাৰ আৰক্ষী ঘটনাস্থলীত উপস্থিত হয় যদিও ইতিমধ্যে স্থানীয় ৰাইজে ১০৮ এম্বুলেঞ্চৰ সহায়ত আহত তিনিওজনকে বঙাইগাঁৱৰ ব্যক্তিগত হাস্পতালত ভৰ্তি কৰে ৷ ইয়াৰে ল'ৱাৰ আসাম হাস্পতালত ভৰ্তি কৰা মুকুল সৰকাৰ নামৰ যুৱকজনৰ কিছু সময় পিছত মৃত্যু হয় ৷ আনহাতে গুৰুতৰভাৱে আহত প্ৰমোদ বৰ্মন সম্প্ৰতি ল'ৱাৰ আসাম হাস্পতালত চিকিৎসাধীন হৈ থকাৰ বিপৰীতে কম পৰিমাণে আহত হোৱা প্ৰশান্ত বৰ্মন নামৰ যুৱকজনক নিশাই বঙাইগাঁৱৰ আৰোগ্য হাস্পতালত ভৰ্তি কৰা হৈছিল যদিও চিকিৎসা গ্ৰহণৰ পিছত ঘৰলৈ যায় বুলি আৰক্ষীয়ে জানিবলৈ দিছে ৷ ইপিনে আৰক্ষীয়ে আজি পুৱাৰ ভাগত মুকুল সৰকাৰৰ মৃতদেহ বঙাইগাঁও অসামৰিক চিকিৎসালয়ত মৰণত্তোৰ পৰীক্ষা সম্পন্ন হোৱাৰ পিছত পৰিয়ালক চমজাই দিয়ে ৷ আৰক্ষীয়ে নিশাই দুৰ্ঘটনাগ্ৰস্ত মটৰ চাইকেলখন উদ্ধাৰ কৰি থানালৈ আনে ৷ যুৱকজনৰ মৃত্যুত অঞ্চলটোত শোকৰ ছাঁ পৰে ৷