NEWS 4 BONGAIGAON

👉চিৰাঙত আৰক্ষী সঞ্চালক প্ৰধান ভাস্কৰজ্যোতি মহন্ত

👉চিৰাং - বঙাইগাঁও জিলাৰ শীৰ্ষ আৰক্ষী বিষয়াৰে বৈঠক

                      বঙাইগাঁওঃ ১৩ মেঃ

 🔯অসম আৰক্ষীৰ সঞ্চালক প্ৰধান ভাস্কৰজ্যোতি মহন্তই আজি বিয়লিৰ ভাগত বঙাইগাঁও আৰু চিৰাং জিলাৰ শীৰ্ষ আৰক্ষী বিষয়াসকলৰ সৈতে এক বৈঠকত মিলিত হয় ৷ চিৰাং জিলাৰ চাপাগুৰিস্থিত হোটেল চিগনেট পাৰ্কত অনুষ্ঠিত বৈঠকত জিলা দুখনৰ শেহতীয়া পৰিস্থিতি তথা কোৰোনা ভাইৰাছৰ সংক্ৰমণ প্ৰতিৰোধৰ বাবে চলি থকা লকডাউন , ৰে'লযোগে আহিবলগীয়া জিলা দুখনৰ লোকসকলোৰ ক্ষেত্ৰত আৰক্ষীয়ে অবলম্বন কৰিবলগীয়া সতৰ্কতামূলক ব্যৱস্থা আদিৰ বিষয়ে বুজ লোৱাৰ লগতে অনাগত দিনত ক'ভিড ১৯ সন্দৰ্ভত কেনেদৰে কাম কৰিব লাগিব তাৰ ওপৰত আলোকপাত কৰি সঞ্চালক প্ৰধানগৰাকীয়ে নীতি- নিৰ্দেশনা দিয়ে  ৷ উল্লেখ্য যে আৰক্ষী সঞ্চালক প্ৰধান ভাস্কৰজ্যোতি মহন্তই কোকৰাঝাৰ জিলা পৰিভ্ৰমণ কৰি গুৱাহাটীলৈ উভতি যোৱাৰ পথত চিৰাঙত বঙাইগাঁও আৰু চিৰাং জিলাৰ আৰক্ষী অধীক্ষকদ্বয়ৰ লগতে শীৰ্ষ বিষয়াসকলৰ সৈতে আলোচনাত মিলিত হয় ৷

ইপিনে বৈঠকৰ পিছত সংবাদ মাধ্যমক সম্বোধন কৰি আৰক্ষী সঞ্চালক প্ৰধান গৰাকীয়ে কয় যে আজি মই কোকৰাঝাৰ জিলাৰ কোৱাৰেণ্টাইন কেন্দ্ৰ , ৰে'লৱে ষ্টেচনৰ লগতে শ্ৰীৰামপুৰৰ গেটৰ ব্যৱস্থা আৰু সোণকোষ নদীৰ মাজেৰে কোনোবা অসমলৈ সোমাব পাৰিছে নেকি আদি দিশসমূহ চাই আহি চিৰাং আৰু বঙাইগাঁও জিলাৰ আৰক্ষী বিষয়াসকলৰ সৈতে আলোচনাত মিলিত হলো ৷ এতিয়া কোকৰাঝাৰত যি জ'নেল কোৱাৰেণ্টাইন কেন্দ্ৰ আছে তাত প্ৰথমে বহিঃ ৰাজ্যৰ পৰা অহা বিভিন্ন জিলাৰ যিসকলক নিয়া হ'ব আৰু তাৰ পৰাই তেওঁলোকক জিলাই জিলাই পঠিওৱাৰ ব্যৱস্থা কৰা হৈছে ৷ তেওঁলোকৰ ক্ষেত্ৰত আৰক্ষীয়ে যিখিনি অতি সতৰ্কতামূলক ব্যৱস্থা অৱলম্বন কৰিব লাগিব সেই বিষয়ে আলোচনা কৰা হৈছে ৷ এই ক্ষেত্ৰত ইতিমধ্যে আমাৰ আৰক্ষীৰ লোকসকলে যিখিনি অভিজ্ঞতা আহৰণ কৰিছে তাৰ ওপৰত ভিত্তি কৰিয়ে আৰু অধিক সতৰ্কতাৰে আগবাঢ়িব লাগিব ৷ কাৰণ যিখিনি বাহিৰৰ পৰা অহা লোকক হোম কোৱাৰেণ্টাইন কৰা হ'ব , সেই লোকসকলে যদি হোম কোৱাৰেণ্টাইনৰ নীতি- নিয়মখিনি শুদ্ধভাৱে মানি চলে , তেতিয়াহলে আমি এই সংক্ৰমণৰ পৰা নিশ্চয় বাচিব পাৰিম ৷ সেই কাৰণে আমাৰ আৰক্ষীসকলৰ লগতে ভিডিপিসকলে যথেষ্ট কষ্ট কৰিব লাগিব ৷ আশাকৰ্মী তথা স্বাস্থ্যকৰ্মীসকলে কষ্ট কৰিয়ে আছে ৷ লগতে ৰাইজেও সজাগ হ'ব লাগিব ৷ সেইদৰে যিসকল লোক হোম কোৱাৰেণ্টাইনত থাকিব তেওঁলোকেও নিজৰ দায়িত্ব বুজি যাতে নিৰ্দেশনাসমূহ মানি চলি পালন কৰে ,সেই দিশটোৰ প্ৰতি আমি সদা সতৰ্ক হ'ব লাগিব ৷ কিন্তু যদি কোনোবাই এই নীতি- নিৰ্দেশনাসমূহ পালন নকৰে , তেতিয়াহলে তেওঁলোকৰ বিৰুদ্ধে আমি আৰক্ষীয়ে কঠোৰ ব্যৱস্থা ল'ব লাগিব ৷ সেয়ে ৰাইজক এই ক্ষেত্ৰত  সতৰ্ক হ'বলৈ আহ্বান জনাইছে ৷  উল্লেখ্য যে আলোচনাকালত বি টি এ ডিৰ আই জি পি অনুৰাগ আগৰৱালা, চিৰাং জিলাৰ আৰক্ষী অধীক্ষক সুধাকৰ সিং, বঙাইগাঁও জিলাৰ আৰক্ষী অধীক্ষক সুবোধ কুমাৰ সোনোৱালৰ লগতে জিলা দুখনৰ শীৰ্ষ আৰক্ষী বিষয়াসকল উপস্থিত আছিল ৷

                NEWS4BONGAIGAON