NEWS 4 BONGAIGAON

👉প্ৰধানমন্ত্ৰী কিষাণ সন্মান নিধি আঁচনিৰ হিতাধিকাৰী বাচনিত অনিয়ম 

👉বঙাইগাঁও জিলাৰ ঢালিগাঁও গাঁও পঞ্চায়তৰ সভাপতিৰ সংবাদ মেল

👉সভাপতিয়ে প্ৰকাশ কৰিলে আঁচনিৰ তালিকা প্ৰস্তুতকৰণত তেওঁ অৱগত নহয় 

👉অগপৰ নেত্ৰী-নেতালৈ অভিযোগৰ আঙুলি

বঙাইগাঁওঃ ১২ মেঃঃ 

🔯বিজেপি নেতৃত্বাধীন কেন্দ্ৰীয় চৰকাৰে অহা ২০২২ চনৰ ভিতৰত কৃষকৰ আয় দুগুণ বৃদ্ধি কৰাৰ লক্ষ্যৰে গ্ৰহণ কৰা আঁচনি ফলপ্ৰসূ কৰিবলৈ গুৰুত্ব প্ৰদান কৰি অহাৰ সময়তে বঙাইগাঁও জিলাৰ কেবাখনো পঞ্চায়তত প্ৰধানমন্ত্ৰী কিষাণ সন্মান নিধি নামৰ আঁচনি খনত ব্যাপক অনিয়ম হোৱাৰ তথ্য পোহৰলৈ আহিছে ৷ জিলাখনৰ ডাংতল উন্নয়ন খণ্ডৰ অন্তৰ্গত ঢালিগাঁও গাঁও পঞ্চায়ত খনতো এই আঁচনি খনৰ হিতাধিকাৰী বাচনিত অনিয়ম আৰু দুৰ্নীতি হোৱাত পঞ্চায়তখনৰ বঞ্চিত কৃষক সকলে তেওঁলোকৰ নাম চৰকাৰী তালিকাত নথকাৰ লগতে বৃহৎ সংখ্যক অচিনাকি লোকৰ নাম হিতাধিকাৰী ৰূপে তালিকা ভূক্ত হোৱাত তীব্ৰ ক্ষোভ প্ৰকাশ কৰিছে  উল্লেখযোগ্য যে, শাসকীয় বিজেপি নেতৃত্বাধীন ঢালিগাঁও গাঁও পঞ্চায়তৰ হিতাধিকাৰী বাচনিত অনিয়ম হোৱাৰ অভিযোগ লাভ কৰি আজি সংশ্লিষ্ট গাঁও পঞ্চায়তৰ সভাপতি মাখন ঘোষে ৱাৰ্ড সদস্যৰ উপস্থিতিত কাৰ্যালয়ত এক সংবাদ মেলৰ আয়োজন কৰে ৷ তেঁও কয় যে পঞ্চায়ত খনত দুৰ্নীতি হোৱা বুলি ঢালিগাঁও খেতি পথাৰ পৰিচালনা সমিতি আৰু ঢালিগাঁও সচেতন মঞ্চ নামৰ সংগঠন দুটাই জিলা উপায়ুক্তক অৱগত কৰিছে ৷ অভিযোগ সন্দৰ্ভত গাঁও পঞ্চায়তৰ সভাপতি মাখন ঘোষে প্ৰকাশ কৰা মতে প্ৰধান মন্ত্ৰী কিষাণ সন্মান নিধিত কৃষকৰ নাম- তালিকা প্ৰস্তুত কৰা কাৰ্যত তেঁও আৰু তেওঁৰ দলৰ সদস্যসকল দায়ী নহয় ৷ তেওঁ তালিকাত গাঁও পঞ্চায়ত এলেকাৰ প্ৰকৃত কৃষকৰ বিপৰীতে আন যথেষ্ট সংখ্যক লোকৰ নাম সন্নিৱিষ্ট হোৱাত এই সন্দৰ্ভত জিলা উপায়ুক্তৰ হাতত ইয়াৰ বাবে তদন্ত বিচাৰি আবেদন কৰিব বুলি জানিবলৈ দিয়ে ৷ 

লক্ষণীয় যে আজি পঞ্চায়ত খনত সংবাদ মেল চলি থকা অৱস্থাত গাওঁ পঞ্চায়ত এলেকাৰ প্ৰকৃত কৃষক সকলে বঞ্চিত হোৱাৰ বিপৰীতে তালিকা প্ৰস্তুত কৰণত অনিয়ম হোৱাত পঞ্চায়তৰ সভাপতি আৰু ৱাৰ্ড সদস্যক জবাব দিহি কৰে যদিও পঞ্চায়তৰ ফালৰ পৰা ইয়াৰ প্ৰকৃত তদন্তৰ বাবে জিলা প্ৰশাসনক আবেদন জনোৱাৰ কথা ৰাইজক অৱগত কৰা হয় ৷ ঢালিগাঁও খেতি পথাৰ পৰিচালনা সমিতিৰ সভাপতি ৰামকিশোৰ দিহিদাৰ আৰু সম্পাদক গোকুল মেধিয়ে সোমবাৰে জিলা উপায়ুক্তৰ হাতত প্ৰদান কৰা অভিযোগৰ আবেদন অনুসৰি এই ভুৱা কৃষকৰ তালিকা প্ৰস্তুত কৰা কাৰ্যত ঢালিগাঁও জিলা পৰিষদৰ সদস্যা ৰঞ্জুু সিংহই কৃষি বিভাগৰ সংশ্লিষ্ট এলেকাৰ গ্ৰাম সেৱক কৃতি লোধৰ লগত মিলি দুৰ্নীতি আৰু খেলি- মেলি কৰাৰ অভিযোগ কৰে ৷ লক্ষণীয় যে ঢালিগাঁও গাওঁ পঞ্চায়তৰ তালিকাত প্ৰকাশ পোৱা অনুসৰি মুঠ ৭১ জন কৃষকৰ ভিতৰত সাত জন মান কৃষকৰ নামহে সন্নিৱিষ্ট আছে ৷ বাকী পঞ্চায়তৰ ৭৫ শতাংশ কৃষকে ভুৱা ৷ কিছু  পঞ্চায়তৰ বাহিৰৰ লোকৰো নাম তালিকাত সন্নিৱিষ্ট হৈছে ৷ 

অভিযোগত প্ৰকাশ যে অগপৰ জিলা পৰিষদৰ সদস্যা, আঞ্চলিক পঞ্চায়তৰ সদস্য আৰু ৱাৰ্ড সদস্যা আৰু প্ৰাক্তন জিলা পৰিষদৰ সদস্যৰ পৰিয়ালৰ লোকেই একো একোজন কৃষক ৰূপে সোমাইছে ৷ পঞ্চায়ত সদস্যা এগৰাকীৰ নিজৰ নামো পি এম কিষাণ সন্মান নিধিৰ তালিকাত আছে ৷ অভিযোগত প্ৰকাশ যে তালিকা খনত নাম সন্নিৱিষ্ট থকা কেবাগৰাকী লোকৰ মাটিয়ে নাই ৷ পঞ্চায়ত খনৰ সভাপতি গৰাকীয়ে এই অনিয়মৰ বিৰুদ্ধে তদন্ত বিচৰাৰ লগতে খেতি পথাৰ পৰিচালনা সমিতিৰ পৰা জিলা উপায়ুক্তক প্ৰদান কৰা আবেদনত প্ৰধান মন্ত্ৰী কিষাণ সন্মান নিধিত দুৰ্নীতি হোৱা কাৰ্যৰ তদন্ত কৰি দোষীক শাস্তি প্ৰদানৰ লগতে প্ৰকৃত কৃষকক আঁচনিত অন্তৰ্ভুক্ত কৰি হিতাধিকাৰী বাচনি কৰিবলৈ দাবী উত্থাপন কৰিছে ৷

NEWS4BONGAIGAON