NEWS 4 BONGAIGAON

👉কুমুদক বিচাৰি হাবাথুৰি খাইছে বঙাইগাঁও জিলা প্ৰশাসন - স্বাস্থ্য বিভাগ 

                              বঙাইগাঁওঃ ৭ মেঃ

 🔯#বঙাইগাঁও জিলাৰ পাঁচজনকৈ ব্যক্তি কোভিড-১৯ ৰোগত আক্ৰান্ত হোৱাৰ পিছতে জিলা প্ৰশাসন আৰু স্বাস্থ্য বিভাগ অধিক সক্ৰিয় হৈ পৰাৰ সময়তে এজন ব্যক্তিক বিচাৰি হাবাথুৰি খাইছে জিলা প্ৰশাসন আৰু স্বাস্থ্য বিভাগ ৷ কিন্তু ব্যক্তিজনৰ সন্ধান উলিয়াব পৰা ৷ জিলা প্ৰশাসনে বিচাৰি থকা ব্যক্তিজনৰ নাম কুমুদ ৰায় ৷ এই কুমুদ ৰায়কে বিচাৰি ফুৰিছে প্ৰশাসন আৰু স্বাস্থ্য বিভাগে ৷ কিন্তু বিচাৰি উলিয়াবলৈ সক্ষম হোৱা নাই এতিয়াও ৷ যাৰ বাবে য'তে কুমুদ নামৰ ব্যক্তিক পাইছে তাকে চিকিৎসালয়লৈ উঠাই আনি নমুনালৈ ঘৰলৈ যাবলৈ দিয়া হৈছে ৷ ইতিমধ্যে বিভিন্ন স্থানৰ পৰা চাৰি- পাঁচজনমান কুমুদ নামৰ ব্যক্তিক ঘৰৰ পৰা উঠাই আনি নমুনা লোৱাৰ পিচত যাবলৈ দিয়া হৈছে ৷ লগতে সোধ- পোচ কৰা হৈছে তেওঁলোকৰ কিবা ট্ৰেভেল হিষ্ট্ৰী আছে নেকি আদি কথা ৷ সেয়ে এতিয়া কুমুদ নামৰ ব্যক্তিসকল আতংকিত হৈ পৰিছে ৷ উল্লেখ্য যে জানিব পৰা মতে বিগত ২৮ এপ্ৰিলত বঙাইগাঁও অসামৰিক চিকিৎসালয়ত জ্বৰ ,চৰ্দি- কাহত আক্ৰান্ত এজন ব্যক্তি আহিছিল ৷ এই ব্যক্তিজনৰ লক্ষণ বোৰ দেখি ব্যক্তিজনৰ নমুনা পৰীক্ষাৰ বাবে লোৱা হৈছিল ৷ ব্যক্তিজনে নিজৰ নাম কুমুদ ৰায় ( ২৮) বুলি উল্লেখ কৰাৰ লগতে নিজৰ ঠিকনা মাজগাঁও ,বঙাইগাঁও বুলি উল্লেখ কৰিছিল ৷ কিন্তু জিলাখনত হঠাতে পাঁচজনকৈ ব্যক্তি কোভিড- ১৯ ত আক্ৰান্ত হোৱাত ব্যক্তিজনক বিছাৰি ফুৰিছে প্ৰশাসন আৰু স্বাস্থ্য বিভাগে ৷ ব্যক্তিজনে উল্লেখ কৰা মাজগাঁৱত নাই কুমুদ ৰায় নামৰ ব্যক্তি ৷ নামে মানুহে নিমিলে ৷ নিমিলে বয়স ৷ কিন্তু কুমুদক লাগে ৷ যাৰ বাবে এতিয়া জিলা প্ৰশাসন আৰু স্বাস্থ্য বিভাগ উঠি- পৰি লাগিছে কুমুদৰ সন্ধানত ৷ মাজগাঁও,ছিপনছিলা ,দেওহাটী আদি অঞ্চলত বিচাৰি ফুৰিছে কুমুদক ৷ ইতিমধ্যে চাৰি- পাঁচজনমান কুমুদ নামৰ ব্যক্তিক স্বাস্থ্য বিভাগৰ লোকে এম্বুলেঞ্চেৰে ঘৰৰ পৰা চিকিৎসালয়লৈ উঠাই আনি তেওঁলোকৰ নমুনা সংগ্ৰহ কৰি ঘৰলৈ যাবলৈ দিছে ৷ এনে অৱস্থাত আন এক সন্দেহৰো উদ্ৰেগ হৈছে ৷ সেয়া হ'ল ব্যক্তিজনে নিজৰ প্ৰকৃত নাম আৰু ঠিকনা ভুলকৈ দি গৈছিল নেকি ? তাৰোপৰি ব্যক্তিজন সঁচাকৈ মাজগাঁৱৰ আছিল নে আন ঠাইৰ পৰা আহিছিল তেনে প্ৰশ্নবোৰো উত্থাপিত হৈছে ৷ সেয়ে চিকিৎসালয়লৈ অহা ব্যক্তিজনৰ পৰিচয়কলৈ সমস্যাত পৰিছে প্ৰশাসনৰ লগতে স্বাস্থ্য বিভাগ ৷ যাৰ বাবে ব্যক্তিজনৰ সন্ধানত নামি পৰিছে সকলো ৷ কাৰণ জিলাখনত ইতিমধ্যে কোৰোণা ভাইৰাছৰ সংক্ৰমণ বৃদ্ধি পোৱাত ইয়াক প্ৰতিৰোধৰ বাবে জিলা প্ৰশাসন আৰু স্বাস্থ্য বিভাগে দিনে - নিশাই উঠি- পৰি লগা দেখা গৈছে ৷ সকলোৰে এটাই আশা বঙাইগাঁও জিলাখনক পুনৰ গ্ৰীণ জ'নলৈ নিয়াৰ ৷ সেয়ে প্ৰশাসনে বিচাৰিছে জিলাবাসীৰ সহযোগিতা ৷ কোনো ব্যক্তি যদি ইতিমধ্যে আক্ৰান্ত পাঁচ ব্যক্তিৰ সংস্পৰ্শলৈ আহিছিল আৰু এতিয়াও স্বাস্থ্য পৰীক্ষা কৰা নাই, তেতিয়াহলে নিজে আগবাঢ়ি আহি নিজৰ লগতে পৰিয়ালৰ সুৰক্ষাৰ বাবে স্বাস্থ্য বিভাগৰ সৈতে যোগাযোগ কৰিবলৈকো অনুৰোধ জনাইছে ৷