NEWS 4 BONGAIGAON

👉প্ৰধানমন্ত্ৰী কিষাণ সন্মান নিধি আঁচনিত অনিয়ম 

👉বঙাইগাৱঁৰ স্থানীয় বিধায়ক তথা মন্ত্ৰী ফনীভূষণ চৌধুৰী, জিলা কৃষি বিষয়াসহ আঠ জনৰ বিৰুদ্ধে এজাহাৰ 

👉খেতি-পথাৰ পৰিচালনা সমিতি আৰু সচেতন মঞ্চই দাখিল কৰিলে এজাহাৰ 

                                      বঙাইগাঁওঃ ২৩ মেঃ

🔯 প্ৰধানমন্ত্ৰী কিষাণ সন্মান নিধি আঁচনিত হিতাধিকাৰী বাচনিত হোৱা অনিয়মে ৰাজ্য জোকাৰি যোৱাৰ সময়তে বঙাইগাঁও জিলাতো এই আঁঁচনিখন ৰূপায়ণৰ ক্ষেত্রত ব্যাপক খেলিমেলি সংঘটিত হৈছে ৷ জিলাখনৰ আন পঞ্চায়তসমূহৰ লগতে ঢালিগাঁও গাঁও পঞ্চায়ততো সংঘটিত হৈছে ব্যাপক কেলেংকাৰী ৷ পঞ্চায়তখনত সংঘটিত এই কেলেংকাৰী সন্দৰ্ভত শুকুৰবাৰে ঢালিগাঁও খেতি-পথাৰ পৰিচালনা সমিতি আৰু ঢালিগাঁও সচেতন মঞ্চই বঙাইগাঁও বিধান সভা সমষ্টিৰ বিধায়ক তথা মন্ত্ৰী ফনীভূষণ চৌধুৰীৰ লগতে চৰকাৰী কৃষি বিভাগৰ বিষয়া, জিলা পৰিষদৰ সদস্য, গাঁও পঞ্চায়তৰ সদস্য, গ্ৰাম সেৱক আদিকে ধৰি আঠ গৰাকী ব্যক্তিৰ বিৰুদ্ধে নিউ বঙাইগাঁও আৰক্ষী পহৰা চকীত এখন এজাহাৰ দাখিল কৰে ৷ বঙাইগাঁও জিলাৰ  ডাংতল উন্নয়ন খণ্ডৰ অধীনৰ ঢালিগাওঁ গাওঁ পঞ্চায়তত সংঘটিত হোৱা প্ৰধান মন্ত্ৰী কিষাণ সন্মান নিধিৰ আচঁনিৰ নামত সংঘটিত হোৱা কেলেংকাৰী সন্দৰ্ভত  ঢালিগাঁও খেতি পথাৰ পৰিচালনা সমিতি আৰু ঢালিগাঁও সচেতন মঞ্চই স্থানীয় বিধায়ক তথা মন্ত্ৰী গৰাকীৰ উপৰিও ঢালিগাঁও জিলা পৰিষদৰ সদস্য ৰঞ্জু সিংহ, প্ৰাক্তন জিলা পৰিষদৰ সদস্য প্ৰণৱ চৌধুৰী, গাঁও পঞ্চায়তৰ সদস্য পাৰ্ৱতী ৰায়, বঙাইগাঁও জিলা কৃষি বিভাগৰ কৃষি বিষয়া লক্ষেশ্বৰ ৰয়, বঙাইগাঁও জিলা কৃষি বিভাগৰ অন্তৰ্গত বিদ্যাপুৰ কৃষি উন্নয়ন খণ্ডৰ খণ্ড কৃষি উন্নয়ন বিষয়া মহম্মদ নজৰুল, কৃষি বিভাগৰ ঢালিগাঁও অঞ্চলৰ গ্ৰাম সেৱক কৃতি লোধ আৰু ঢালিগাঁও জিলা পৰিষদৰ সদস্য গৰাকীৰ দেওৰেক জয়ন্ত সিংহৰ বিৰুদ্ধে এই এজাহাৰ দাখিল কৰে ৷

উল্লেখ্য যে পি এম কিষাণ সন্মান নিধি আঁচনি ৰূপায়ণৰ ক্ষেত্ৰত ঢালিগাঁও পঞ্চায়তত ব্যাপক হাৰত অনিয়ম, কেলেংকাৰী সংঘটিত হোৱাৰ তথ্য ৰাজহুৱা ভাবে উদঙাই দিয়াৰ বাবে জিলা পৰিষদৰ সদস্য ৰঞ্জু সিংহৰ দেওৰেক জয়ন্ত সিংহই  ঢালিগাঁও সচেতন মঞ্চৰ সভাপতি-সম্পাদক ক্ৰমে মনোজ কুমাৰ বৰুৱা আৰু  দিগম্বৰ বৰ্মনৰ লগতে  ঢালিগাঁও খেতি- পথাৰ পৰিচালনা সমিতিৰ  সভাপতি ৰাম কিশোৰ দিহিদাৰ আৰু  সম্পাদক গোকুল  মেধিৰ বিৰুদ্ধে থানাত গোচৰ  ৰুজু কৰিছিল ৷ ইয়াৰ পৰিপ্ৰেক্ষিতত খেতি-পথাৰ পৰিচালনা সমিতি আৰু সচেতন মঞ্চই শুকুৰবাৰে নিউ বঙাইগাওঁ আৰক্ষী পহৰা চকীত  মন্ত্ৰী ফনীভূষণ চৌধুৰীসহ  মুঠ আঠ গৰাকী লোকৰ বিৰুদ্ধে এই লোক চাৰিজনে এজাহাৰ দাখিল কৰে  ৷ ইপিনে আৰক্ষীৰ এক সূত্ৰৰ পৰা জানিব পৰা মতে আজি গুচৰীয়া পক্ষৰ পৰা মন্তব্য গ্ৰহণ কৰিবলৈ তেওঁলোকক থানালৈ মাতি অনা হয় যদিও এতিয়ালৈ গোচৰ পঞ্জীয়ণ হোৱা নাই বুলি কয় ৷ আনহাতে বঙাইগাঁও জিলাত সংঘটিত পিএম কৃষাণ সন্মান নিধিৰ কেলেংকাৰী সন্দৰ্ভত জিলা উপায়ুক্ত আৰু জিলা কৃষি বিষয়াই এখন ৰাজহুৱা গোহাৰি প্ৰকাশ কৰি যদি কোনোবা অযোগ্য ব্যক্তিয়ে ভুলতে বা অজ্ঞাতে হিতাধিকাৰীৰ তালিকাত নাম অন্তৰ্ভুক্ত কৰোৱাইছিল, তেতিয়াহ'লে তেনে লোকসকলক অনতিপলমে নাম প্ৰত্যাহাৰ কৰিবলৈ আৰু ইতিমধ্যে অনুদান পোৱা ধনৰাশি ঘূৰাই দিবলৈ অনুৰোধ জনাইছে ৷ অন্যথা তেনে ব্যক্তিৰ বিৰুদ্ধে আইনী ব্যৱস্থা গ্ৰহণ কৰিব বুলিও গোহাৰিত উল্লেখ কৰিছে ৷ ইয়াৰ পৰা স্পষ্ট হৈ পৰিছে যে ভুৱা হিতাধিকাৰীসকলৰ বিৰুদ্ধে চৰকাৰে কোনো শাস্তিমূলক ব্যৱস্থা গ্ৰহণ নকৰিব নেকি?  যদি সেয়াই হয়, তেতিয়াহলে দুৰ্নীতি কৰিবলৈ উৎসাহে যোগোৱা হ'ব ৷🔯