NEWS 4 BONGAIGAON

👉বইটামাৰী মডেল হাস্পতালৰ সহকাৰী মেট্ৰনৰ পিচত এইবাৰ হাস্পতালৰ হিচাপ ৰক্ষকগৰাকীও অকৰ্তৃত্বশীলভাৱে দীৰ্ঘদিন ধৰি অনুপস্থিত থকাৰ উত্থাপিত হৈছে অভিযোগ  

                                  বঙাইগাঁওঃ ২৩ মেঃ

 🔯বঙাইগাঁও জিলাৰ বইটামাৰী মডেল হাস্পতালৰ সহকাৰী মেট্ৰন পুষ্পা দত্তই বিগত ২০ মাৰ্চৰ পৰা অকৰ্তৃত্বশীলভাৱে চিকিৎসালয়খনত অনুপস্থিত থকাৰ বাতৰি সংবাদ মাধ্যমত বিস্তাৰিতভাৱে প্ৰকাশিত হোৱাৰ পিচত এতিয়া সমগ্ৰ বিষয়টোকলৈ হাহাকাৰ লাগিছে ৷ ইতিমধ্যে জিলা স্বাস্থ্য বিভাগে সমগ্ৰ বিষয়টো অতি গুৰুত্বসহকাৰে লৈ তদন্ত আৰম্ভ কৰা বুলিও জানিব পৰা গৈছে ৷ ইপিনে ইয়াৰ মাজতে হাস্পতালখনৰ আন এগৰাকী কৰ্মচাৰীৰ বিৰুদ্ধেও উত্থাপিত হৈছে দীৰ্ঘদিন ধৰি নিজ কৰ্তব্যস্থলীত অনুপস্থিত থকাৰ অভিযোগ ৷ প্ৰাপ্ত অভিযোগ মতে হাস্পতালখনৰ নিম্নবৰ্গৰ সহায়ক তথা হিচাপ ৰক্ষক অৰূপ কুমাৰ দাসও একে সময়ৰে পৰা চিকিৎসা সেৱা প্ৰতিষ্ঠানখনত অকৰ্তত্বশীলভাৱে অনুপস্থিত আছিল। উত্থাপিত অভিযোগ মতে হাস্পতালখনৰ নিম্ন বৰ্গৰ সহায়ক তথা হিচাপ ৰক্ষক অৰূপ কুমাৰ দাসৰ লগত গোপন মিতিৰালি কৰি বইটামাৰী মডেল হাস্পতালৰ অধীক্ষক তথা বইটামাৰী ব্লক প্ৰাথমিক স্বাস্থ্য কেন্দ্রৰ ভাৰপ্ৰাপ্ত মহকুমা চিকিৎসা আৰু স্বাস্থ্য বিষয়া ডাঃ গোপাল চন্দ্র ৰয়ে হেনো তেওঁৰ সহধর্মিণী পুষ্পা দত্তক চিকিৎসালয়ৰ কৰ্তব্যত নিয়োজিত কৰণৰ পৰা বিৰত ৰাখিছিল। ইপিনে দুয়োগৰাকী কৰ্মচাৰীয়ে অকৰ্তৃত্বশীল ভাৱে হাস্পতালখনত অনুপস্থিত থকাৰ সময়তে দুয়োগৰাকী কৰ্মচাৰীয়ে কিন্তু মাৰ্চ আৰু এপ্রিল মাহৰ দৰমহা লাভ কৰিছে। আশ্চৰ্যৰ বিষয় এয়ে যে বইটামাৰী মডেল হাস্পতালৰ সহকাৰী মেট্ৰন পুষ্পা দত্ত আৰু নিম্ন বৰ্গৰ সহায়ক তথা হিচাপ ৰক্ষক অৰূপ দাস চিকিৎসালয়খনত অনুপস্থিত থকাৰ সময়ৰে পৰা বইটামাৰী মডেল হাস্পতালৰ কৰ্মচাৰীসকলৰ উপস্থিতিৰ স্বাক্ষৰ কৰা বহীখনো নিখোঁজ হৈ পৰে। 

চিকিৎসালয়ৰ অন্যান্য কৰ্মচাৰীয়ে তেওঁলোকৰ কৰ্তব্যৰ সাক্ষী বহন কৰা উপস্থিতিৰ স্বাক্ষৰ কৰা বহীখন নাপাই বিষয়টো হাস্পতালৰ মুৰব্বী ডাঃ গোপাল চন্দ্র ৰয়ক অৱগত কৰাত মুৰব্বী ৰয়ে কৰ্মচাৰীসকলক  'উপস্থিতিৰ বহীখন নাপালেও তেওঁলোকে নিয়মিত মাহিলী দৰমহা পাইয়ে থাকিব' বুলি ওলোটাই বুজনি দি আহিছিল ৷ কিন্তু ১৮ মে'ত এই সমগ্ৰ বিষয়টো সংবাদ মাধ্যমত আৰু সামাজিক মাধ্যমত প্ৰকাশ পোৱাৰ পিছতে লাগে হাহাকাৰ । বিশেষকৈ হাস্পতালখনৰ  অধীক্ষকগৰাকী ব্যস্ত হৈ পৰে গোপনে থকা বিষয়টো কেনেকৈ সংবাদ মাধ্যমত প্ৰকাশ পালে তাক জানিবলৈ ? কোনে গোপনে এই বিষয়টো সংবাদ মাধ্যমৰ লোকক অৱগত কৰিলে তাৰ অনুসন্ধানো চলায় ৷ ইপিনে দেশ তথা ৰাজ্যত কোৰোনা ভাইৰাছৰ ভয়াৱহতাৰ সময়তে হাস্পতালখনৰ সহকাৰী মেট্ৰন পুষ্পা দত্ত আৰু নিম্ন বৰ্গৰ সহায়ক তথা হিচাপ ৰক্ষক অৰূপ কুমাৰ দাস চিকিৎসালয়খনত অনুপস্থিত থকাৰ সংবাদ ফাদিল হোৱাত ১৯ মে'ত বঙাইগাঁও জিলাৰ স্বাস্থ্য সেৱা বিভাগৰ জিলাৰ মুখ্য চিকিৎসা আৰু স্বাস্থ্য বিষয়া ডাঃ ভূপেন বৈশ্য, উত্তৰ শালমাৰা মহকুমা চিকিৎসা আৰু স্বাস্থ্য বিষয়া ডাঃ মুস্তাফিজুৰ ৰহমান আৰু বঙাইগাঁও জিলা মেলেৰিয়া বিষয়া ডাঃইমদাদুল খানসহ দল এটা বইটামাৰী মডেল হাস্পতালত তদন্ত কৰিবলৈ উপস্থিত হয়। দলটোৱে হাস্পতালখনত উপস্থিত হৈ চলি থকা এনে বিশৃংখল পৰিস্থিতি তথা বিভিন্ন দিশ সন্দৰ্ভত অধ্যয়ন কৰাৰ লগতে বইটামাৰী মডেল হাস্পতালৰ কৰ্মচাৰীক সোধ-পোচ কৰা বুলিও জানিব পৰা গৈছে । এনে অৱস্থাত জিলা স্বাস্থ্য বিভাগে অকৰ্তৃত্বশীলভাৱে নিজ কৰ্তব্যত অনুপস্থিত থকা কৰ্মচাৰী আৰু কাৰ সহযোগৰ বাবে কোৰোনা মহামাৰীৰ সংক্ৰমণৰ সময়ত এইদৰে কৰ্মস্থলীত অনুপস্থিত থাকি ঘৰত বহিয়ে দৰমহা ল'বলৈ সক্ষম হ'ল সেইসকলৰ বিৰুদ্ধে কিবা ব্যৱস্থা গ্ৰহণ কৰে নে নকৰে সেয়া হ'ব লক্ষণীয় ৷ আনহাতে হাস্পতালখনৰ কৰ্মচাৰীসকৰ উপস্থিতিৰ স্বাক্ষৰ কৰা বহীখন নাইকীয়া হোৱাৰ পিচত শেহতীয়াভাৱে এখন নতুন বহীৰ ব্যৱস্থা কৰা হৈছে বুলিও জানিব পৰা গৈছে ৷🔯