NEWS 4 BONGAIGAON

👉ৰাজহুৱা খণ্ডৰ প্ৰতিস্থানসমূহ  ব্যক্তিগত খণ্ডক বিক্ৰী কৰিবলৈ ওলোৱা কেন্দ্ৰীয় চৰকাৰৰ কাৰ্যৰ প্ৰতিবাদ 

👉কাইলৈৰ দেশজুৰি ট্ৰেড ইউনিয়নৰ প্ৰতিবাদী কাৰ্যসূচীলৈ উত্তৰ পূৱ সীমান্ত ৰে'লৱে মজদুৰ ইউনিয়নৰ সমৰ্থন 

বঙাইগাঁওঃ ২১মেঃ 

🔯কোৰোনাৰ আতংকৰ মাজতেই কেন্দ্ৰীয় চৰকাৰে দেশৰ সম্পদ তথা ৰাজহুৱা খণ্ডৰ প্ৰতিস্থানসমূহ এপদ এপদকৈ ব্যক্তিগত খণ্ডক বিক্ৰী কৰিবলৈ ওলোৱা কাৰ্যৰ প্ৰতিবাদত কাইলৈ (২২ মে) সমগ্ৰ দেশজুৰি সকলো ট্ৰেড ইউনিয়নে একেলগে প্ৰতিবাদ সাব্যস্ত কৰিব ৷ এই সন্দৰ্ভত এক প্ৰেছ বিবৃতিত উত্তৰ পূৱ সীমান্ত ৰেলৱে মজদুৰ ইউনিয়নৰ সাধাৰণ সম্পাদক তথা অল ইণ্ডিয়া ৰে'লৱেমেনচ ফেডাৰেচনৰ সভাপতি ৰাখাল দাসগুপ্তই উল্লেখ কৰা মতে ট্ৰেড ইউনিয়নসমূহৰ এই প্ৰতিবাদী কাৰ্যসূচী সমূহলৈ সম্পূৰ্ণ সমৰ্থন আৰু সহযোগিতা আগবঢ়াব উত্তৰ পূৱ সীমান্ত ৰেলৱে মজদুৰ ইউনিয়নে ৷ তেওঁ কয় যে মোদী নেতৃত্বাধীন কেন্দ্ৰীয় চৰকাৰে ৰঙা দলিচা পাৰি পুঁজিপতি গোষ্ঠীক জাতীয় সম্পদ তৈলক্ষেত্ৰ , কয়লাখনি , বনজ সম্পদ , লাভজনক শিল্পসমূহ পানীৰ দামত হস্তান্তৰ কৰিবলৈ ওলাইছে ৷ সমান্তৰালভাৱে শ্ৰমিক শ্ৰেণীৰ অধিকাৰ কাঢ়ি শ্ৰম আইন বিলুপ্তিকৰণেৰে  কামৰ সময় ৮ ঘণ্টাৰ পৰা ১২ ঘণ্টা কৰা , শ্ৰমিক চাটাই কৰি দেশৰ নিবনুৱা সমস্যা বৃদ্ধি কৰা , কোৰোনা মহামাৰীৰ বাবে লকডাউনৰ সময়চোৱাতো দিনে নিশাই কাম কৰা চৰকাৰী কৰ্মচাৰীসকলৰ মৰগীয়া ভাট্টা কৰ্তন কৰা আদিৰ দৰে কাৰ্য কৰিবলৈ ওলাইছে ৷ উত্তৰ পূৱ সীমান্ত ৰেলৱে মজদুৰ ইউনিয়নে এই অন্যায় কাৰ্যৰ তীব্ৰ বিৰোধিতা কৰাৰ লগতে ইয়াৰ বিৰুদ্ধে আন্দোলন চলাই যাবলৈ বদ্ধপৰিকৰ ৷ সেই বাবেই অইন ট্ৰেড ইউনিয়নসমূহৰ লগতে অল ইণ্ডিয়া ৰে'লৱেমেনচ ফেডাৰেচন আৰু মজদুৰ ইউনিয়নৰ কৰ্মীসকলে কাইলৈ নিজ কৰ্মস্থলীত উপস্থিত থাকি , নিজ কৰ্ম সম্পাদন কৰি , লকডাউনৰ বিধি মানি আৰু সামাজিক দূৰত্ব বজাই ৰাখি প্ৰতিবাদী কাৰ্যসূচী ৰূপায়ণ কৰিব বুলি ৰাখাল দাসগুপ্তই বিবৃতিটোত উল্লেখ কৰিছে ৷