NEWS 4 BONGAIGAON

👉আমফানৰ প্ৰভাৱ 

👉বঙাইগাঁও জিলাত নেৰানেপেৰা বৰষুণ  

                                     বঙাইগাঁওঃ ২১ মেঃ

 🔯বতৰ বিজ্ঞান কেন্দ্ৰৰ আগজাননী মতেই কালি নিশাৰে পৰা অসমতো আমফান নামৰ সাগৰীয় ধুমুহাৰ প্ৰভাৱ পৰা পৰিলক্ষিত হৈছে । অৱশ্যে অসমত ধুমুহাৰ প্ৰকোপ এতিয়ালৈকে কম হৈ আছে যদিও নেৰানেপেৰা বৰষুণ হৈ আছে । ৰাজ্যৰ আন আন জিলাৰ লগতে বঙাইগাঁও জিলাতো আমফান নামৰ সাগৰীয় ধুমুহা আৰু নেৰানেপেৰা বৰষুণে জন জীৱন স্তব্ধ কৰি তুলিছে । ধুমুহাই বঙাইগাঁও জিলাৰ ভালেমান ঠাইত পুৱাৰ ভাগত গছ- গছনি ভাঙি পেলায় ৷ সেইদৰে বৰষুণ হৈ থকাৰ ফলত ঘৰৰ পৰা বাহিৰলৈ ওলাব পৰা নাই লোক। ইফালে আমফানৰ সাম্ভাব্য ভয়াবহতাৰ আশংকা কৰি অসম চৰকাৰৰ নিৰ্দেশ অনুসৰি বঙাইগাঁও জিলা প্ৰশাসনেও জিলাখনত বিশেষ সতৰ্ক বাণী জাৰি কৰিছে। জিলা বাসীক এই ক্ষেত্ৰত সতৰ্কতা অৱলম্বন কৰিবলৈ আহ্বান জনোৱাৰ লগতে বঙাইগাঁও জিলাত জিলা প্ৰশাসনে গাঁৱে গাঁৱে জনসাধাৰণক মাইকযোগে সতৰ্কতা অৱলম্বন কৰিবলৈ আহ্বান জনাইছে ৷

চহৰ অঞ্চলত জনসংযোগ বিভাগৰ এফ এল এছ যোগে তথা জিলাখনৰ কিছু গ্ৰামাঞ্চলত আৰক্ষীৰ ফালৰ পৰা প্ৰচাৰ চলায় ৷ সেইদৰে জিলাখনৰ পাঁচটা ৰাজহ চক্ৰৰ ১২৮ খন গাঁও আমফানৰ ফলত কিছু ক্ষতি হোৱাৰ শংকা প্ৰকাশ কৰি জিলা প্ৰশাসনে সতৰ্কতা জাৰি কৰিছিল ৷ উল্লেখ্য যে চহৰ অঞ্চলত ক্ষয় - ক্ষতি হোৱা নাই যদিও গ্ৰামাঞ্চলত বিভিন্ন গছ- গছনি ভাঙি পৰাৰ লগতে বিভিন্ন জনৰ ঘৰৰ ওপৰতো গছ বাগৰি পৰিছে ৷ ঠায়ে ঠায়ে বিদ্যুতৰ তাঁৰ চিঙি পৰিছে ৷ যোৱা নিশাৰে পৰা বিভিন্ন অঞ্চলত বিদ্যুৎ সংযোগ কৰ্তন কৰা হৈছে ৷🔯