NEWS 4 BONGAIGAON

👉শ্ৰম সংস্কাৰ আৰু ৰাজহুৱা খণ্ড ব্যক্তিগতকৰণৰ বিৰুদ্ধে ট্ৰেড ইউনিয়নসমূহৰ দেশজোৰা প্ৰতিবাদ

👉অসমতো ব্যাপক সঁহাৰিঃ গুৱাহাটীত চি আই টি ইউ আৰু এ আই টি ইউ চিৰ নেতৃত্বক গ্ৰেপ্তাৰ

                  গুৱাহাটীঃ ২২ মেঃ 

🔯বিজেপি চৰকাৰৰ শ্ৰমিক বিৰোধী শ্ৰম সংস্কাৰ নীতি তথা ৰাজহুৱা খণ্ডৰ সম্পত্তি ব্যক্তিগত খণ্ডলৈ বিক্ৰী কৰা কাৰ্যৰ বিৰুদ্ধে আজি সমগ্ৰ দেশজুৰি কেন্দ্ৰীয় ট্ৰেড ইউনিয়ন আৰু কৰ্মচাৰী ফেডাৰেচনসমূহে প্ৰতিবাদী কাৰ্যসূচী ৰূপায়ণ কৰে। এই কাৰ্যসূচীৰ প্ৰতি সঁহাৰি জনাই অসমত ডিব্ৰুগড়, তিনিচুকীয়া, যোৰহাট, গোলাঘাট, নগাওঁ, মৰিগাওঁ, হোজাই আদি উজনি তথা মধ্য অসমৰ প্ৰতিখন জিলাতে ঠায়ে ঠায়ে লক'কডাউনৰ নিয়ম মানি এই আন্দোলনৰ কাৰ্যসূচী পালন কৰে। একেদৰে কোকৰাঝাৰ, বঙাইগাঁও, ধুবুৰী, গোৱালপাৰা, বৰপেটা, নলবাৰী, কামৰূপ, দক্ষিণ কামৰূপ আদি জিলাৰ বিভিন্ন অঞ্চলত চি আই টি ইউৰ সদস্যসকলে হাতে হাতে দাবী সম্বলিত প্লে-কাৰ্ড প্ৰদৰ্শন কৰি প্ৰতিবাদ সাব্যস্ত কৰে। কামৰূপ আৰু কামৰূপ মহানগৰৰ উদ্যোগীক অঞ্চলসমূহত কল-কাৰখানা শ্ৰমিকসকলেও এই কাৰ্যসূচী ৰূপায়ণ কৰে। আনহাতে মটৰ পৰিবহন শ্ৰমিক, নিৰ্মাণ শ্ৰমিক, আঁচনিভূক্ত তথা নাৰ্চিংহোমৰ শ্ৰমিক কৰ্মচাৰীৰ সংগঠন সমূহে সমগ্ৰ ৰাজ্যত এই কাৰ্যসূচীৰ জৰিয়তে দাবীসমূহ চৰকাৰৰ দৃষ্টিগোচৰ কৰে। গুৱাহাটীৰ বিৰুবাৰী, নাৰেঙ্গী, আঠগাঁও, মালিগাঁও আদিৰ লগতে বিভিন্ন স্থানত শ্ৰমিক কৰ্মচাৰীসকলে কৰ্মস্থলীত পোষ্টাৰ প্ৰদৰ্শণ কৰি প্ৰতিবাদী কাৰ্যসূচী ৰূপায়ণ কৰে। ট্ৰেড ইউনিয়নসমূহৰ ৰাজ্যিক নেতৃবৃন্দই দীঘলীপুখুৰীপাৰত প্ৰতিবাদ সাব্যস্ত কৰিবলৈ লওতেই চি আই টি ইউ আৰু এ আই টি ইউৰ নেতৃবৃন্দক পুলিছে গ্ৰেপ্তাৰ কৰে।

উল্লেখযোগ্য যে দেশৰ শ্ৰমিক কৰ্মচাৰীয়ে বহু বছৰ আন্দোলন কৰাৰ ফলত লাভ কৰা অৰ্জিত অধিকাৰসমূহ বিজেপি চৰকাৰে শ্ৰম সংস্কাৰৰ জৰিয়তে কৰ্তন কৰি আছে। ইতিমধ্যে বিজেপি শাসিত ৰাজ্যসমূহত ল'কডাউনৰ সুযোগ গ্ৰহণ কৰি শ্ৰম আইনবোৰ সংশোধন কৰিছে আৰু বৃহৎ পুঁজিপতিসকলক আৰু অধিক শ্ৰমিক শোষণৰ বাট মুকলি কৰিছে। কেন্দ্ৰীয় চৰকাৰৰ আৰ্হি অনুসৰি উত্তৰ প্ৰদেশ, মধ্যপ্ৰদেশ, গুজৰাট আদি ৰাজ্যৰ দৰে অসম চৰকাৰেও ফেক্টৰী আইন, ১৯৪৮, দোকান আৰু প্ৰতিষ্ঠান আইন,১৯৭১ আদি আইনবোৰ ল'কডাউনৰ সুযোগ গ্ৰহণ কৰি শ্ৰমিকৰ বিৰুদ্ধে সংশোধন কৰিলে। উল্লেখ্য যে এনে সংশোধনৰ ফলত অসমত বেছিভাগ কল-কাৰখানকে ধৰি বিভিন্ন প্ৰতিষ্ঠানত শ্ৰমিকৰ শ্ৰম আইনৰ জৰিয়তে অধিকাৰ ৰক্ষাৰ ব্যৱস্থা নাথাকিব। আনহাতে বিপদজনক বিষয় যে মালিক পক্ষই বিচাৰি থকা অনুসৰি চৰকাৰে অসমতো ‘নিৰ্দিষ্ট সময়ৰ বাবে নিয়োগ' (Fixed Term Employment)ব্যৱস্থা ৰূপায়ণ কৰিবলৈ আগবাঢ়িছে। ইয়াৰ জৰিয়তে অসমতো সকলো ধৰণৰ চাৰকাৰী-বেচৰকাৰী প্ৰতিষ্ঠানত অহা দিনত নিযুক্তি পাবলগা যুৱক-যুৱতীয়ে তেওঁলোকৰ কোনোধৰণৰ কামৰ স্থায়িত্ব নাথাকিব আৰু ভৱিষ্যত কামৰ নিৰাপত্তাৰ পৰা বঞ্চিত হব। আনহাতে অসম তথা দেশৰ ৰাজহুৱা সম্পত্তিবোৰ এটা এটাকৈ ধাৰাবাহিকভাৱে ব্যক্তিগতকৰণৰ কাৰ্য চলাই আছে বিজেপি চৰকাৰে। অসমৰ বহু কেইটা তৈলখাদ বিক্ৰীৰ লগতে কয়লা খনিও ব্যক্তিগত কোম্পানীক গোতাই দিয়া পৰিলক্ষিত হৈছে। সম্প্ৰতি ইয়াৰ বাবেই দিহিং পাটকাই অৰণ্যও বিপদৰ সন্মুখত পৰিছে। ইয়াৰ ফলত অসমৰ পৰিবেশ ভাৰসাম্যতা বিঘ্নিত হ'ব, যাৰ বাবে অসমৰ বিভিন্ন সংগঠনে ইয়াৰ বিৰুদ্ধে আন্দোলন কৰি আছে।এই সমস্যাবোৰৰ ভিত্তিত আজি আন্দোলনৰ লগতে অসমতো কেন্দ্ৰীয় ট্ৰেড ইউনিয়ন আৰু কৰ্মচাৰী ফেডাৰেচনসমূহে  অসম চৰকাৰৰ মুখ্যমন্ত্ৰীলৈ এক স্মাৰক পত্ৰও প্ৰেৰণ কৰে।🔯