NEWS 4 BONGAIGAON

👉কেন্দ্ৰীয় চৰকাৰৰ শ্ৰমিক বিৰোধী নীতি আৰু ৰাজহুৱা খণ্ডৰ শিল্প বিলগ্নীকৰণৰ বিৰুদ্ধে বঙাইগাঁৱত ট্ৰেড ইউনিয়নসমূহৰ প্ৰতিবাদী কাৰ্যসূচী 

                           বঙাইগাঁওঃ ২২ মেঃ 

🔯কেন্দ্ৰীয় চৰকাৰৰ শ্ৰমিক বিৰোধী নীতি আৰু ৰাজহুৱা খণ্ডৰ শিল্প বিলগ্নীকৰণৰ বিৰুদ্ধে আজি বঙাইগাঁৱতো ট্ৰেড ইউনিয়নসমূহে প্ৰতিবাদী কাৰ্যসূচী ৰূপায়ণ কৰে ৷ উল্লেখ্য যে লক ডাউনৰ সুযোগলৈ দেশবাসীক আৰ্থিক সহায়ৰ নামত বিজেপি নেতৃত্বাধীন কেন্দ্ৰীয় চৰকাৰ তথা ৰাজ্য চৰকাৰৰ শ্ৰমিক বিৰোধী নীতিৰ প্ৰতিবাদত সৰ্বভাৰতীয় প্ৰতিবাদ দিৱসৰ আহ্বানৰ প্ৰতি সঁহাৰি জনাইয়ে আজি চিটু ,এইচ এম এচ ,আই এন টি ইউ চি ,পূৰ্বাঞ্চলীয় ৰে'ল কৰ্মচাৰী পৰিষদ  আৰু বেংক এমপ্লয়িজ ফেডাৰেচন অৱ ইণ্ডিয়াৰ যুটীয়া উদ্যোগত বঙাইগাঁও আৰু চিৰাং জিলাৰ বিভিন্ন শিল্পক্ষেত্ৰত শ্ৰমিক - কৰ্মচাৰীয়ে এই প্ৰতিবাদী কাৰ্যসূচী ৰূপায়ণ কৰে ৷ ইপিনে বঙাইগাঁৱত এই প্ৰতিবাদী কাৰ্যসূচী ৰূপায়ণ কৰে পাগলাস্থানত ৷

 এই কাৰ্যসূচী ৰূপায়ণৰ বাবে ট্ৰেড ইউনিয়নৰ তৰফৰ পৰা জিলা প্ৰশাসনৰ ওচৰত আগতীয়কৈ অনুমতি বিচৰা স্বত্বেও মূৰকত অৱস্থান ধৰ্মঘটৰ অনুমতি নোপোৱাত কেন্দ্ৰীয় নেতৃত্ববৃন্দৰ হৈ হৰেশ্বৰ দাস ,আশীষ বিশ্বাস , প্ৰফুল্ল সূত্ৰধৰ আৰু আৰ কে ৰাস্তগীয়ে বঙাইগাঁও চহৰৰ পাগলাস্থানৰ মহাত্মা গান্ধীৰ প্ৰতিমূৰ্তিৰ তলত সামাজিক দূৰত্ব মানি চলি প্ৰতীকি প্ৰতিবাদী কাৰ্যসূচী ৰূপায়ণ কৰে৷ কিন্তু কিছু সময় পিচত উক্ত স্থানত আৰক্ষী উপস্থিত হৈ প্ৰতিবাদী কাৰ্যসূচীত অংশ লোৱা নেতা চাৰিজনক কাৰ্যসূচী সামৰিবলৈ বাধ্য কৰে ৷ শ্ৰমিক সংগঠনকেইটাই মূলত কৰ্পোৰেটৰ স্বাৰ্থত শ্ৰম আইন সংশোধন কৰা, লকডাউনৰ সময়চোৱাত কামৰ পৰা বিৰত থকা সকলো শ্ৰমিকৰ মজুৰি নিশ্চিত কৰা, প্ৰব্ৰজিত শ্ৰমিকক সুৰক্ষা তথা বিনামূলীয়াকৈ ঘৰলৈ উভোতাই অনা, দিহিং পাতকাইৰ বৰ্ষাৰণ্যক ৰক্ষাৰ স্বাৰ্থত ব্যাপক কয়লা খনন ৰোধ কৰা , তৈল খাদসমূহ আৰু আন ৰাজহুৱা খণ্ডসমূহক ৰক্ষাৰ স্বাৰ্থত বিলগ্নীকৰণ নীতি প্ৰত্যাহাৰৰ দাবীত এই প্ৰতিবাদী কাৰ্যসূচী ৰূপায়ণ কৰে ৷ 

ইপিনে মেডিচিন ৰিপ্ৰেজেণ্টেটিভ ইউনিয়ন , ব্ৰহ্মপুত্ৰ কাৰ্বন শ্ৰমিক ইউনিয়নকে ধৰি চি আই টি ইউৰ অন্তৰ্ভুক্ত আইবোৰ শ্ৰমিক সংগঠনে বিভিন্ন স্থানত হাতে হাতে বিভিন্ন দাবী সম্বলিত প্লেকাৰ্ডলৈ নিজ নিজ কৰ্মস্থলীৰ পৰাই এই প্ৰতিবাদী কাৰ্যসূচীত অংশ লয় ৷ তাৰোপৰি বঙাইগাঁও শোধনাগাৰৰ বিভিন্ন অস্থায়ী শ্ৰমিক ইউনিয়নৰ লগতে বিজনী আৰু মাণিকপুৰতো প্ৰাকৃতিক দূৰ্যোগক নেওচা দি প্ৰতিবাদী কাৰ্যসূচী ৰূপায়ণ কৰে বুুুুলি চি আই টি ইউৰ বঙাইগাঁও- চিৰাং জিলা সমিতিৰ সভাপতি হৰেশ্বৰ দাসে এক প্ৰেছ বিবৃতিত উল্লেখ কৰিছে ৷🔯