NEWS 4 BONGAIGAON

👉বঙাইগাঁৱৰ মূলাগাঁওস্থিত লালবাহাদুৰ শাস্ত্ৰী বিদ্যাপীঠৰ প্ৰধান শিক্ষক অজিত কুমাৰ দাসৰ অৱসৰ গ্ৰহণ 

বঙাইগাঁওঃ ৩০ মেঃ

🔯 বঙাইগাঁৱৰ মূলাগাঁওস্থিত লাল বাহাদুৰ শাস্ত্ৰী বিদ্যাপীঠৰ প্ৰধান শিক্ষক অজিত কুমাৰ দাসে আজি অৱসৰ গ্ৰহণ কৰে ৷ এই উপলক্ষে বিদ্যালয় পৰিচালনা আৰু উন্নয়ন সমিতিৰ সভাপতি অনিল কুমাৰ সিংহৰ পৌৰহিত্যত বিদ্যালয় প্ৰাংগণত এখন বিদায় সম্বৰ্ধনা সভা অনুষ্ঠিত হয় ৷ সাম্প্ৰতিক পৰিস্থিতিৰ বাবে সামাজিক দূৰত্ব বজাই চলি বিদ্যালয়খনৰ শিক্ষক- শিক্ষয়িত্ৰী আৰু সীমিত সংখ্যক  শুভাকাংক্ষীৰ উপস্থিতিত অনুষ্ঠিত সম্বৰ্ধনা সভাত উদ্দেশ্য ব্যাখ্যা কৰি বিদ্সালয়খনৰ জ্যেষ্ঠ শিক্ষক মমিৰুদ্দিন সেখে সাম্প্ৰতিক পৰিস্থিতিত যথেষ্ঠ সাৱধানতাৰে কম সংখ্যক লোকৰ উপস্থিতিত বিদায় সভাখন অনুষ্ঠিত কৰিবলগীয়া হোৱা বুলি কয় ৷ আনহাতে সভাত বিশিষ্ট অতিথি হিচাপে উপস্থিত থকা বঙাইগাঁও পলিটেকনিকৰ অধ্যাপক বীৰব্ৰত দাস চৌধুৰীয়ে সাহিত্যত বিশিষ্ট স্থান দখল কৰিবলৈ সক্ষম হোৱা অজিত কুমাৰ দাসে অৱসৰৰ সময়খিনি কঠিনতা নোপোৱাকৈ পাৰ কৰিব পাৰিব বুলি কয় ৷ সেইদৰে বিশিষ্ট শিক্ষাবিদ ৰুদ্ৰেশ্বৰ পাঠক আৰু ধনীৰাম চৌধুৰীয়ে দাসক বিশিষ্ট শিক্ষক বুলি অভিহিত কৰি তেওঁৰ সাহিত্য চৰ্চা অব্যাহত থাকিব বুলি আশা প্ৰকাশ কৰে ৷ ইপিনে বঙাইগাঁৱৰ বিশিষ্ট সমাজকৰ্মী প্ৰভাত বৈষ্ণৱে অৱসৰ গ্ৰহণ কৰা দাসক প্ৰতিভাৰ আকৰ বুলি মন্তব্য কৰি পৰৱৰ্তী সময়ত তেওঁ সমাজৰ দায়িত্বত বৰ্তমানতকৈও অধিক আগ্ৰহেৰে অৱতীৰ্ণ হ'ব বুলি মন্তব্য কৰে ৷ আনহাতে নৱ নিযুক্ত প্ৰধান শিক্ষক দ্বিজমোহন নাথে অজিত কুমাৰ দাসে বিদ্যালয়খনৰ প্ৰতি লোৱা দায়িত্ব তথা শিক্ষক হিচাপেও তেওঁৰ পাৰদৰ্শিতাৰ কথা শ্ৰদ্ধাৰে সুঁৱৰি  আগন্তুক দিনতো বিদ্যালয়খনলৈ আহি সকলোৰে খা- খবৰ ল'ব বুলি আশা প্ৰকাশ কৰে ৷ সভাত পঞ্চায়ত সভানেত্ৰী কুহিলা সৰকাৰ ,ইন্দুমতী শইকীয়া ,কুঞ্জ নাৰায়ণ দেৱেও অজিত কুমাৰ দাসে বিদ্যালয়খনলৈ আগবঢ়োৱা সেৱাৰ কথা সোঁৱৰে ৷ 

ইপিনে অৱসৰ গ্ৰহণ কৰা অজিত কুমাৰ দাসে নিজৰ বক্তব্যত শিক্ষকতাৰ চাকৰি নিষ্ঠাৰে কৰিবলৈ শিক্ষক- শিক্ষয়িত্ৰী সকললৈ আবেদন জনাই কয় যে অন্য চাকৰিৰ নিচিনা শিক্ষকৰ চাকৰিত জটিলতা নাই ৷ প্ৰতিজন শিক্ষকে নিষ্ঠাৰে সেৱা আগবঢ়াই জাতিৰ ভৱিষ্যৎ সুদৃঢ় কৰা উচিত বুলিও মন্তব্য কৰে ৷ লগতে তেওঁৰ কাৰ্যকালত সহযোগিতা পোৱাসকললৈ কৃতজ্ঞতাও জনায় ৷ শেষত সভাৰ সভাপতি অনিল কুমাৰ সিংহই বিদায়ী প্ৰধান শিক্ষক অজিত কুমাৰ দাসক আগন্তুক দিনতো তেওঁৰ পৰা বিদ্যালয়ৰ উন্নয়নত সহযোগ পাই থাকিব বুলি আশা ব্যক্ত কৰে ৷ সভাত অৱসৰ গ্ৰহণ কৰা বিদ্যালয়খনৰ প্ৰধান শিক্ষক অজিত কুমাৰ দাসক বিদায়ী সম্বৰ্ধনা জনোৱা হয় ৷