NEWS 4 BONGAIGAON

👉বঙাইগাঁৱত বহিঃৰাজ্যৰ পৰা কণ্টেইনাৰযোগে গোপনে প্ৰৱেশ কৰা ৫১ শ্ৰমিকক আটক 

👉কোৱাৰেণ্টাইনৰ বাবে সৰুসজাই ষ্টেডিয়ামলৈ প্ৰেৰণ

                                   বঙাইগাঁওঃ১৬ মেঃ

🔯দেশজুৰি কোৰোনা ভাইৰাছৰ সংক্ৰমণ প্ৰতিৰোধৰ বাবে চলি থকা লকডাউনৰ ফলত হাহাকাৰ অৱস্থাৰ সৃষ্টি হৈছে বহিঃ ৰাজ্যত আৱদ্ধ হৈ থকা অসমৰ হাজাৰ হাজাৰ শ্ৰমিক তথা লোকৰ মাজত ৷ যাৰ বাবে যিয়ে যেনেকৈ পাৰে ঘৰমূৱা হৈছে ৷ কিন্তু চৰকাৰে বহিঃ ৰাজ্যৰ পৰা উভতি অহাসকলক প্ৰথমে কোৱাৰেণ্টাইনত ৰখাৰ বাবে ব্যৱস্থা গ্ৰহণ কৰাত এতিয়া গোপনে ৰাজ্যখনত প্ৰৱেশ কৰিবলৈ লৈছে একাংশ শ্ৰমিকে ৷ এইসকল শ্ৰমিকে কণ্টেইনাৰ আদিৰে প্ৰৱেশ কৰিবলৈ লৈছে ৷ অসমত প্ৰৱেশ কৰাৰ পিছত আনকি স্বাস্থ্য পৰীক্ষা নকৰাকৈয়ে নিজ নিজ জিলালৈ ৰাওনা হৈছে ৷ আজি বঙাইগাঁৱৰ চাপৰাকাটাত এইদৰে এখন কণ্টেইনাৰৰ ভিতৰত সোমাই বহিঃৰাজ্যৰ পৰা গোপনে অসমলৈ অহা ৫১ জন শ্ৰমিকক বঙাইগাঁও আৰক্ষীয়ে আটক কৰে ৷ শ্ৰমিকসকলে ইউ পি ২১ চি এন ২০৫০ নম্বৰৰ এখন কণ্টেইনাৰখনত উঠি বহিঃ ৰাজ্যৰ পৰা অসমত প্ৰৱেশ কৰিছিল ৷ কণ্টেইনাৰখনৰ চালকে কণ্টেইনাৰখন গুৱাহাটীলৈ গৈ থকা বুলি জানিবলৈ দিয়ে ৷ পিছত বঙাইগাঁৱৰ চাপৰাকাটাত কণ্টেইনাৰখনৰ ওপৰত আৰক্ষীৰ সন্দেহ ওপজে আৰু তালাচী চলোৱাত ভিতৰত শ্ৰমিকসকলক উদ্ধাৰ কৰে ৷

আৰক্ষীয়ে পিছত শ্ৰমিকসকলৰ স্বাস্থ্য পৰীক্ষাৰ ব্যৱস্থা কৰাৰ লগতে খাদ্য সামগ্ৰীও যোগান ধৰে ৷ পিছত গাড়ীযোগে গুৱাহাটীৰ সৰুসজাই ষ্টেডিয়ামৰ কোৱাৰেণ্টাইন কেন্দ্ৰলৈ প্ৰেৰণৰ ব্যৱস্থা গ্ৰহণ কৰে ৷ জানিব পৰা মতে শ্ৰমিকসকল পশ্চিম বংগৰ ৰায়গঞ্জৰ পৰা অসমলৈ আহিছে ৷ প্ৰথমে প্ৰায় ৫০ কিলোমিটাৰ পথ পদব্ৰজে অহাৰ পিছত পশ্চিমবংগৰ ডালখোলা অঞ্চলত কণ্টেইনাৰখন পায় ৷ শ্ৰমিকসকলে কণ্টেইনাৰখনৰ চালকক তেওঁলোকক অসমলৈ অনাৰ বাবে অনুৰোধ জনায় আৰু পিছত চালকজনে ধনৰ বিনিময়ত আনিবলৈ ৰাজি হয় ৷ কিন্তু মূল কথা হ'ল কণ্টেইনাৰখন বহিঃ ৰাজ্যৰ পৰা শ্ৰীৰামপুৰহৈ প্ৰৱেশ কৰি আহি কোকৰাঝাৰ আৰু চিৰাং জিলাৰ মাজেৰে আহি বঙাইগাঁও জিলা পালে যদিও কতো তালাচীয়ে কৰা নহ'ল ৷ শেষত বঙাইগাঁও জিলাতহে বিষয়টো পোহৰলৈ আহিল ৷ গতিকে শ্ৰীৰামপুৰ প্ৰৱেশ পথত কি চলি আছে সেয়া সহজেই অনুমান কৰিব পাৰি ৷ সেইদৰে শ্ৰমিকসকলক কণ্টেইনাৰখনত উঠাই অনাৰ বাবে নাই কোনো নথি- পত্ৰও ৷ ইয়াৰ পৰা বুজিব পাৰি যে শ্ৰীৰামপুৰ প্ৰৱেশ পথেৰে ৰাজ্যখনত প্ৰৱেশ কৰা ট্ৰাক তথা বাহনসমূহ তালাচী চলোৱা হয় নে বিনা বাধাই আহিবলৈ দিয়া হৈছে ? সেয়া বৰ্তমান সময়ত চিন্তাৰ বিষয় হৈ পৰিছে ৷ এই শ্ৰমিকসকল ৰাজ্যখনৰ সাত খন জিলাৰ বুলিও জানিব পৰা গৈছে ৷ শ্ৰমিকসকলে বহিঃ ৰাজ্যৰ বিভিন্ন উদ্যোগত কাম কৰিছিল যদিও বৰ্তমানৰ পৰিস্থিতিত উদ্যোগসমূহ বন্ধ হৈ যোৱাত হাহাকাৰ অৱস্থাত পৰে ৷ হাতৰ ধন শেষ হৈ অহাত উপায়ন্তৰ হৈ ঘৰলৈ বুলি ৰাওনা হয় শ্ৰমিকসকল ৷

উল্লেখ্য যে বহিঃ ৰাজ্যত আৱদ্ধ হৈ থকা শ্ৰমিকসকলৰ বাবে চৰকাৰে শেহতীয়াকৈ বিশেষ ৰে'লৰ ব্যৱস্থা কৰিছে যদিও যিয়ে যেনেকৈ পাৰে ৰাওনা হৈছে নিজ ৰাজ্যলৈ ৷ কোনোবাই যদি হাতত ধন নথকাৰ বাবে খোজ কাঢ়ি ৰাওনা হৈছে , আন কোনোবাই আকৌ কোৰোনা মহামাৰীৰ আতংকৰ মাজতো ট্ৰাক ,কণ্টেইনাৰ আদিত কোনো সামাজিক দূৰত্ব মানি নচলাকৈয়ে গোপনে ৰাওনা হৈছে ৷ সকলোৰে উদ্দেশ্য এটাই আৰু সেয়া হ'ল এই মহামাৰীৰ সময়ত নিজ ঘৰত পৰিয়ালৰ কাষত উপস্থি হ'ব লাগে ৷