NEWS 4 BONGAIGAON

👉বঙাইগাঁৱত মন্ত্ৰী ফণীভূষণ চৌধুৰীয়ে শুভাৰম্ভ কৰিলে "মিছন মৰম" আঁচনি

                             বঙাইগাঁওঃ ৬ জুনঃ 

🔯বঙাইগাওঁ জিলা প্ৰশাসনে আজি বিয়লিৰ ভাগত জিলা উপায়ুক্তৰ কাৰ্যালয়ত 'মিলিজুলি' প্ৰকল্পৰ অধীনত 'মিছন মৰম' শীৰ্ষক এখন আঁচনিৰ শুভাৰম্ভ কৰে ৷ এই আঁচনিখন স্থানীয় বিধায়ক তথা ৰাজ্যৰ খাদ্য আৰু যোগান বিভাগৰ মন্ত্ৰী ফণীভূষণ চৌধুৰী শুভ উন্মোচন কৰে । উক্ত অনুষ্ঠানত বঙাইগাঁও জিলাৰ উপয়ুক্ত ডা° এম. এছ. লক্ষ্মীপ্ৰীয়াই আঁচনিখনৰ বিষয়ে সদৰি কয় যে এই আঁচনিৰ অধীনত আমাৰ ক্ষেত্ৰপৰ্যায়ৰ দলে অসমৰ বিভিন্ন স্থানৰ পৰা উভতি অহা ব্যক্তি সকলোক সহায়, চিকিৎসা সেৱা আদিৰ প্ৰয়োজনীয়তাৰ বুজ ল'ব । 

ইয়াৰ উপৰিও তেওঁলোকক কৰ্মসংস্থানৰ বাবে এম.জি.এন.ৰেগা বা আন চৰকাৰী কল্যাণমূলক আচঁনিৰ যোগেদি সুযোগ দিয়াৰ ওপৰতো গুৰুত্ব দিয়া হ'ব। এই আঁচনিয়ে গৰ্ভৱতী আৰু দুগ্ধপান কৰোৱা মহিলা,বয়োজ্যষ্ঠ লোক, বিশেষভাৱে সক্ষম লোক,বিধৱা আৰু শিশু সকলোকো সাঙুৰি ল'ব ।'মিছন মৰম'ৰ অধীনত বহিঃ ৰাজ্যৰ পৰা অহা ৭০০০ ত কৈও অধীক লোকক সুবিধা প্ৰদান কৰা হ'ব ৷ এই আঁচনিখন মূলতো সমাজ কল্যাণ বিভাগ, পোষণ অভিযান, জিলা শিশু সুৰক্ষা, এ.এছ.আৰ.এল.এম, পি.এন.আৰ.ডি, স্বাস্থ্য বিভাগ আদিৰ অধীনত চলি থকা আঁচনিসমূহৰ সমন্বয় ৷ যিয়ে কোভিড-১৯ মহামাৰীৰ ফলত যিসকল লোকে সমস্যাৰ সন্মূখীন হৈছে তেওঁলোকক বিশেষ যত্ন আৰু সহায়ৰ হাত আগবঢ়াব । 

ইপিনে খাদ্য আৰু যোগান বিভাগৰ  মন্ত্ৰী ফণীভূষণ চৌধুৰীয়ে আৰ্তজনক সহায় আগবঢ়োৱাৰ বাবে জিলা প্ৰশাসনে যি মহান প্ৰচেষ্টা গ্ৰহণ কৰিছে, তাত একাগ্ৰতাৰে ব্ৰতী হ'বলৈ অনুষ্ঠানত উপস্থিত থকা অংগনৱাদী কৰ্মী, ছুপাৰভাইজাৰ আৰু দলৰ আন সদস্য সকলোক আহ্বান জনায় ।🔯