NEWS 4 BONGAIGAON

👉বঙাইগাঁও জিলাৰ চৰকাৰী কাৰ্যালয়লৈও কোৰোনাৰ সংক্ৰমণ

👉আৰক্ষী উপ মহাপৰিদৰ্শকৰ কাৰ্যালয়ৰ কনিষ্টবলো কোভিড-১৯ ত আক্ৰান্ত

👉আক্ৰান্ত হ'ল সদ্যজাত শিশু আৰু মাতৃও 

               বঙাইগাঁওঃ৩০ জুনঃ 

🔯বঙাইগাঁও জিলাত এতিয়া দ্ৰুত গতিত বৃদ্ধি পাবলৈ ধৰিছে মহামাৰী কোৰোনাৰ সংক্ৰমণ ৷ আনকি শেহতীয়াভাৱে এটাৰ পিচত আন এটা চৰকৰী বিভাগৰ কাৰ্যালয়লৈকো কোৰোনাৰ সংক্ৰমণ ঘটিছে ৷ আক্ৰান্ত হৈছে চৰকাৰী বিষয়া - কৰ্মচাৰী ৷ যাৰ বাবে এতিয়া জিলাখনৰ সৰ্বত্ৰে কোৰোনাতংকই বিৰাজ কৰিছে ৷ উল্লেখ্য যে বঙাইগাঁও জিলা উপায়ুক্ত কাৰ্যালয়ৰ আৱকাৰী বিভাগৰ অধীক্ষকগৰাকী কোভিড- ১৯ ত আক্ৰান্ত হোৱাৰ পিচত এইবাৰ বঙাইগাঁওস্থিত আৰক্ষী উপ মহাপৰিদৰ্শৰ কাৰ্যালয়ৰ এজন কনিষ্টবলৰ দেহটো কোভিড- ১৯ পজিটিভ ধৰা পৰিছে ৷ বঙাইগাঁও চহৰৰ দোলাইগাঁওস্থিত পশ্চিম অসম সংমণ্ডলৰ আৰক্ষী উপ মহাপৰিদৰ্শকৰ কাৰ্যালয়ত এই কনিষ্টবলজন কৰ্মৰত আছিল ৷ জানিব পৰা মতে পশ্চিম অসম সংমণ্ডলৰ আৰক্ষী উপ মহা পৰিদৰ্শক ৰৌণাক আলী হাজৰিকাসহ কাৰ্যালয়টোত কৰ্মৰত ১২ জন কনিষ্টবলৰ সোমবাৰে বৰপেটাৰ ফকৰুদ্দিন আলী আহমেদ চিকিৎসা মহাবিদ্যালয়ত স্বাৱ পৰীক্ষাৰ বাবে সংগ্ৰহ কৰা হৈছিল ৷

কিন্তু আজি প্ৰকাশ কৰা নমুনা পৰীক্ষাৰ ফলাফল মতে উক্ত কাৰ্যালয়ৰ এজন কনিষ্টবলৰ দেহত ধৰা পৰে কভিড ১৯ পজিটিভ ৷ কোভিড ১৯ পজিটিভ আক্ৰান্ত কনিষ্টবলজনৰ ভ্ৰমণ ইতিবৃত্ত প্ৰকাশ কৰা নাই জিলা প্ৰশাসনে ৷ সেইদৰে প্ৰকাশ কৰা নাই নাম -ঠিকনাও ৷ উল্লেখ্য যে বঙাইগাঁও জিলাৰ অভয়াপুৰিস্থিত অষ্টম অসম আৰক্ষী বাহিনীৰ কমাণ্ডেণ্টগৰাকীও কোভিড- ১৯ ত আক্ৰান্ত হৈছে ৷ আনহাতে জিলাখনৰ পাতিলাদহাৰ বাওবাৰীৰ এটি সদ্যজাত কন্যা শিশু আৰু মাতৃগৰাকীও কোভিড- ১৯ ত আক্ৰান্ত হৈছে ৷ ইতিমধ্যে মাতৃ- কন্যাক চিকিৎসাৰ বাবে গুৱাহাটীৰ মহেন্দ্ৰ মোহন চৌধুৰী হাস্পতাললৈ প্ৰেৰণ কৰা হৈছে ৷ জিলাখনত আজিৰ দিনলৈ মুঠ ৯০ গৰাকী ব্যক্তি কোভিড- ১৯ ৰোগত আক্ৰান্ত হোৱাৰ বিপৰীতে ৬৮ জন ৰোগীয়ে আৰোগ্য লাভ কৰাত ঘৰলৈ উভতিছে ৷ বৰ্তমান ২২ গৰাকী ৰোগী জিলাখনৰ চিকিৎসালয়ত চিকিৎসাধীন হৈ আছে ৷🔯