NEWS 4 BONGAIGAON

👉শিলচৰত মুখ্যমন্ত্ৰী সৰ্বানন্দ সোণোৱাল 

👉বৰাক উপত্যকাৰ তিনি জিলাৰ বিষয়াবৰ্গৰ সৈতে মিলিত হ'ল বৈঠকত

👉বুজ ললে ভূমিস্খলনত হোৱা ক্ষয়-ক্ষতিৰ 

                       নিউজ ডেস্কঃ ৪ জুনঃ

🔯 বৃহস্পতিবাৰে মুখ‍্যমন্ত্ৰী সৰ্বানন্দ সোণোৱালে শিলচৰত বৰাক উপত্যকাৰ তিনিওখন জিলা- কাছাৰ, কৰিমগঞ্জ আৰু হাইলাকান্দিৰ বিষয়াবৰ্গৰ সৈতে বৈঠকত মিলিত হৈ শেহতীয়া ভূমিস্খলনত হোৱা ক্ষয়-ক্ষতিৰ বুজ লয় আৰু নিহত প্ৰতিগৰাকী লোকৰ বিপৰীতে নিকটাত্মীয়ক ৪ লাখ টকাকৈ আৰ্থিক সাহায্য প্ৰদান কৰে। তেওঁ অসমৰ ভূমিস্খলন প্ৰৱণ অঞ্চলসমূহ চিনাক্ত কৰি এই দুৰ্যোগ ৰোধ কৰাৰ বাবে ভাৰতীয় ভূতাত্ত্বিক জৰীপ বিভাগৰ জৰিয়তে জৰীপ চলাবলৈ বিষয়াসকলক নিৰ্দেশ দিয়ে।

লগতে অবৈধ খননকাৰ্য সন্দৰ্ভত সজাগতা গঢ়ি তোলাৰ উপৰিও আৰক্ষী, এছ ডি আৰ এফ আৰু বন বিভাগৰ লোকক জড়িত কৰি চক্ৰ পৰ্যায়ত ভূমিস্খলন নিৰীক্ষণ আৰু সঁহাৰি গোট গঠন কৰিবলৈও তেওঁ নিৰ্দেশ প্ৰদান কৰে। বৈঠকত এই দুৰ্যোগৰ সময়ত তৎপৰতাৰে গ্ৰহণ কৰা পদক্ষেপৰ বাবে জিলা প্ৰশাসন, অসম আৰক্ষীৰ বিষয়া, স্বাস্থ্যকৰ্মী আৰু জৰুৰীকালীন সেৱাৰ সৈতে জড়িত সকলোৰে মুখ্যমন্ত্ৰীয়ে আন্তৰিকতাৰে শলাগ লয়।

তদুপৰি ক'ভিড-১৯কে ধৰি জিলা তিনিখনৰ বানপানী আৰু গৰাখহনীয়া সংক্ৰান্তীয় পৰিস্থিতিৰো মুখ্যমন্ত্ৰীয়ে বিতংভাৱে পৰ্যালোচনা কৰে আৰু বান সাহায্য শিবিৰসমূহত গুণগত খাদ্য যোগান, সামাজিক দূৰত্ব বজাই ৰখা আদি বিভিন্ন দিশত যাৱতীয় ব্যৱস্থা ল'বলৈ বিষয়াবৰ্গক নিৰ্দেশ দিয়ে।🔯