NEWS 4 BONGAIGAON

👉বঙাইগাঁও জিলাৰ পুনৰ দুজন ব্যক্তিৰ দেহত ধৰা পৰিল কোভিড- ১৯ পজিটিভ 

👉১৭ জনলৈ বৃদ্ধি পালে আক্ৰান্তৰ সংখ্যা 

                        বঙাইগাঁওঃ ৭ জুনঃ 

🔯বঙাইগাঁও জিলাৰ পুনৰ দুগৰাকী ব্যক্তিৰ দেহত কোভিড- ১৯ পজিটিভ ধৰা পৰিছে ৷ বহিঃ ৰাজ্য হাৰিয়ানা আৰু তামিলনাডুৰ পৰা অহা ব্যক্তি দুজনৰ এজন হোম কোৱাৰেণ্টাইনত থকাৰ বিপৰীতে আন এজন প্ৰতিষ্ঠানিক কোৱাৰেণ্টাইনত আছিল ৷ কোভিড- ১৯ ত আক্ৰান্ত ব্যক্তি দুজন জিলাখনৰ মাণিকপুৰৰ চিটকিবাৰী আৰু গোসাইগাঁও অঞ্চলৰ  বুলি জানিব পৰা গৈছে ৷ এই সন্দৰ্ভত জিলা প্ৰশাসনৰ তৰফৰ পৰা জানিবলৈ দিয়া মতে চিটিকাবাৰীৰ ব্যক্তিজন ওদালগুৰি আৰু বৰপেটাৰ দুজন ব্যক্তিৰ সৈতে ব্যক্তিগত বাহনেৰে অসমলৈ আহিছিল ৷ ব্যক্তিজন কোকৰাঝাৰৰ প্ৰতিষ্ঠানিক কোৱাৰেণ্টাইন কেন্দ্ৰত সাত দিন কোৱাৰেণ্টাইন হৈ থকাৰ পিচত হোম কোৱাৰেণ্টাইনৰ বাবে ষ্টাম্প মাৰি দিয়াৰ লগতে ব্যক্তিজনৰ নমুনা পৰীক্ষাৰ বাবে সংগ্ৰহ কৰা হৈছিল ৷ যোৱা ২৭ মে'ত বঙাইগাঁও অসামৰিক চিকিৎসালয়ত ব্যক্তিজনৰ নমুনা সংগ্ৰহ কৰি পৰীক্ষাৰ বাবে বৰপেটা চিকিৎসা মহাবিদ্যালয় হাস্পতাললৈ প্ৰেৰণ কৰা হৈছিল ৷ পিচত যোৱা নিশা পৰীক্ষাৰ ফলাফলত ব্যক্তিজনৰ দেহত কোভিড - ১৯ পজিটিভ ধৰা পৰে ৷ 

আনহাতে মাণিকপুৰ গোসাইগাঁও অঞ্চলৰ আনজন ব্যক্তি যোৱা ২৭ মে'ত তামিলনাডুৰ পৰা ৰে'লযোগে কোকৰাঝাৰলৈ আহিছিল ৷ পিছত সিদিনাই আন ৫- ৬ জন ব্যক্তিৰ সৈতে কোকৰাঝাৰৰ পৰা বাছেৰে বঙাইগাঁওলৈ আহে ৷ বঙাইগাঁৱত অহাৰ পিচত ব্যক্তিজনৰ নমুনা পৰীক্ষাৰ বাবে সংগ্ৰহ কৰা হয় আৰু এদিনৰ বাবে লাকী হোটেলত ৰখা হয় ৷ পিছদিনা ব্যক্তিজনক মাণিকপুৰ নগৰঝাৰ এম ই স্কুলৰ কোৱাৰেণ্টাইন কেন্দ্ৰলৈ লৈ যোৱা হয় ৷ ইয়াৰ মাজতে শনিবাৰে নিশা বৰপেটা চিকিৎসা মহাবিদ্যালয় হাস্পতালৰ নমুনা পৰীক্ষাৰ ফলাফলত ব্যক্তিজনৰ দেহত কোভিড- ১৯  পজিটিভ ধৰা পৰে ৷ ব্যক্তি দুজনৰ দেহত কোভিড- ১৯ পজিটিভ ধৰা পৰাৰ পিচতে দেওবাৰে পুৱতি নিশা প্ৰায় ৩:৩০ বজাত ব্যক্তি দুজনক উন্নত চিকিৎসাৰ বাবে স্বাস্থ্য বিভাগে ১০৮ এম্বুলেন্সেৰে বঙাইগাঁও অসামৰিক চিকিৎসালয়লৈ ( কোভিড- ১৯ হাস্পতাল)  আনে ৷ উল্লেখ্য যে এই ব্যক্তি দুজনকে ধৰি বৰ্তমানলৈকে জিলাখনত কোভিড- ১৯ ত আক্ৰান্তৰ সংখ্যা ১৭ জনলৈ বৃদ্ধি পালে ৷ আক্ৰান্তসকলৰ ভিতৰত  পাঁচজন ব্যক্তি ইতিমধ্যে সুস্থ হৈ উঠিছে বুলি জিলা প্ৰশাসনৰ তৰফৰ পৰা জানিবলৈ দিছে ৷🔯