NEWS 4 BONGAIGAON

👉বঙাইগাঁও জিলাত পুনৰ দুজনৰ দেহত কোভিড ১৯ ৰ অৱস্থিতি 

👉জিলা খনত ১৯ জনলৈ ৰোগীৰ সংখ্যা বৃদ্ধি 

                             বঙাইগাঁওঃ ৮ জুনঃ

🔯বঙাইগাঁও জিলাত পুনৰ দুজনৰ দেহত কোভিড ১৯ ৰ অৱস্থিতি ধৰা পৰিছে ৷এতিয়ালৈকে জিলা খনৰ ১৯ জন লোক কোভিড ১৯ ৰোগত আক্ৰান্ত হোৱাৰ বিপৰীতে সাত গৰাকী লোক সুস্থ হৈ উঠিছে ৷ জিলা খনত নতুনকৈ কোভিড ১৯ ৰোগত আক্ৰান্ত দুজনৰ ভিতৰত এজন যুৱক হৈছে মাণিকপুৰ পি এইছ চিৰ অধীনৰ উজানডুবি গাঁৱৰ ৷ যুৱকজন অন্ধ্ৰ প্ৰদেশৰ পৰা এটা দলৰ স'তে ২৪ মে' ত আহি অসম সীমান্তৰ শ্ৰীৰামপুৰত আহি পাইছিল ৷ মুঠ ২৬ জনীয়া যাত্ৰী অহা গাড়ীখন পোনে পোনে গুৱাহাটী সৰুসজাই ষ্টেডিয়ামৰ কোৱাৰেন্টাইন কেন্দ্ৰলৈ গৈছিল যদিও পিচত এজন বন্ধুৰ স'তে ভাৰা গাড়ীত বঙাইগাঁওলৈ অহিছিল যুৱকজন ৷ যুৱকজন নিজ গাঁওলৈ আহি আশা কৰ্মীক খবৰ দিয়াত উজানডুবি প্ৰাথমিক বিদ্যালয়ত কোৱাৰেন্টাইনত থাকে ৷ পাছত ২৫ মে' ত যুৱকজনৰ নমুনা পৰীক্ষাৰ বাবে সংগ্ৰহ কৰা হয় আৰু ২৭ মে' ত  পৰীক্ষাৰ বাবে প্ৰেৰণ কৰা হয় ৷ পাছত ছয় জুনত নমুনা পৰীক্ষাৰ ফলাফলত  যুৱকজনৰ দেহত কোভিড- ১৯ পজিটিভ ধৰা পৰে ৷

ইপিনে জিলাখনৰ সৃজনগ্ৰাম পি এইছ চিৰ অধীনৰ জপেয়া গাঁৱৰ ১৯ বছৰীয়া যুৱক এজনৰ দেহতো ধৰা পৰিছে ক'ভিড ১৯ ৰ অৱস্থিতি ৷ যুৱকজন মুম্বাইৰ পৰা আত্মীয়ৰ স'তে ৰে'লেৰে ২৩ মে' ত অহাৰ পাছত ২৬ মে ত কোকৰাঝাৰ ৰে'ল ষ্টেচন পায় ৷ কোকৰাঝাৰৰ পৰা বাছেৰে ২৫ -৩০ জন লোকৰ স'তে যুৱকজনক উত্তৰ বঙাইগাঁওলৈ আনি নমুনা সংগ্ৰহ কৰা হয় ৷ পিচত বঙাইগাঁও আৰক্ষীয়ে  অভয়াপুৰী আৰক্ষীক গটাই দিয়াত যুৱকজন আন চাৰিজন লোকৰ স'তে জপেয়া এম ই মাদ্ৰাছা স্কুলত কোৱাৰেন্টাইনত আছিল ৷ পাঁচ জুনত যুৱক জনক কেন্সাৰ ৰোগী হিচাপে ঘৰলৈ যাবলৈ দিয়া হয় ৷ ছয় জুনত যুৱক জনৰ নমুনা পৰীক্ষাৰ ফলাফলত দেহত কোভিড ১৯ ৰ অৱস্থিতি ধৰা পৰে ৷ সম্প্ৰতি উল্লেখিত দুয়োজন যুৱকক বঙাইগাঁও অসামৰিক চিকিৎসালয়ত আছুতীয়া কোঠাত ৰাখি চিকিৎসা প্ৰদান কৰি থকা হৈছে ৷