NEWS 4 BONGAIGAON

👉বঙাইগাঁৱত পেট্ৰ'ল - ডিজেলৰ মূল্যবৃদ্ধিৰ প্ৰতিবাদত চি পি আই ( এম)ৰ বিক্ষোভ প্ৰদৰ্শন 

                        
              বঙাইগাঁওঃ ১ জুলাই ঃ

🔯পেট্ৰ'ল- ডিজেলৰ মূল্যবৃদ্ধিৰ প্ৰতিবাদত আজি বঙাইগাঁৱত চি পি আই (এম) ৰ বঙাইগাঁও জিলা সমিতিয়ে বিক্ষোভ কাৰ্যসূচী ৰূপায়ণ কৰে ৷ উল্লেখ্য যে কেন্দ্ৰীয় তথা ৰাজ্য চৰকাৰে বিগত এমাহ ধৰি ক্ৰমাগতভাৱে পেট্ৰ'ল - ডিজেলৰ মূল্যবৃদ্ধি ঘটাই থকাৰ প্ৰতিবাদত চি পি আই (এম) ৰ অসম ৰাজ্যিক সমিতিয়ে সমগ্ৰ ৰাজ্যজুৰি আহ্বান জোনোৱা বিক্ষোভ কাৰ্যসূচীৰ অংশ হিচাপে দলটোৰ বঙাইগাঁও জিলা সমিতিয়েও বঙাইগাঁও চহৰৰ তিনিটাকৈ পেট্ৰ'ল পাম্পৰ সন্মুখত বিক্ষোভ প্ৰদৰ্শন কৰে ৷ বিক্ষোভকাৰীসকলে হাতে হাতে বেনাৰ , প্লেকাৰ্ড লৈ পেট্ৰ'ল - ডিজেলৰ মূল্যবৃদ্ধি ৰোধ কৰিব নোৱাৰা কেন্দ্ৰীয় চৰকাৰ হায় হায় , বয়-বস্তুৰ আকাশলংঘী মূল্যবদ্ধি ৰোধ কৰক , কৰ্পৰেটৰ দালাল বিজেপি চৰকাৰ হায় হায় আদি শ্লগানো দিয়ে ৷ 

ইপিনে চি পি আই (এম) ৰ জিলা সমিতিয়ে এক প্ৰেছ টোকাত কয় যে কোৰোনা ভাইৰাছ সংক্ৰমিত কোভিড- ১৯ জনিত বিত্তীয় পকিস্থিতিৰ জোৰা মৰাৰ নামত ৰাজ্য চৰকাৰে পেট্ৰ'লৰ প্ৰতি লিটাৰত ৮৫ টকা আৰু ডিজেলৰ প্ৰতি লিটাৰত ৭৯ টকা আৰোপ কৰিছে ৷ যিটো সময়ত আন্তৰ্জাতিক বজাৰত খাৰুৱা তেলৰ মূল্য শূন্য ডলাৰলৈ অৱনমিত হৈছে ,তেনেক্ষেত্ৰত  কৰ সংগ্ৰহৰ বাবে গ্ৰহণ কৰা এনে নীতিৰ ফলত সৰ্বসাধাৰণ ৰাইজ বাৰুকৈয়ে ক্ষতিগ্ৰস্থ হৈছে ৷ বিশেষকৈ এইমূহুৰ্তত ডিজেলৰ মূল্যবৃদ্ধিয়ে অত্যাৱশ্যকীয় সামগ্ৰীসমূহৰ দাম বজাৰত হুৰ হুৰাই বৃদ্ধি পাব ধৰিছে ৷ এনেক্ষেত্ৰত অটো ,টেম্প',ট্ৰাক তথা বাছৰ ক্ষুদ্ৰ গৰাকীসকলে প্ৰভূত লোকচানৰ সন্মুখীন হৈছে ৷ লক ডাউনজনিত বিত্তীয় পৰিস্থিতিৰ জোৰা মৰাৰ বাবে কেৱল পেট্ৰ'ল - ডিজেলৰ নিচিনা জনসাধাৰণৰ সকলো অংশৰ মানুহৰ সততে প্ৰয়োজনীয় সামগ্ৰীৰ মূল্য বৃদ্ধি ঘটাই ৰাজকোষ টনকিয়াল কৰিব বিচৰা কেন্দ্ৰীয় চৰকাৰৰ সিদ্ধান্ত চূড়ান্ত হঠকাৰী বুলিও চি পি আই ( এম)য়ে অভিহিত কৰি ইয়াক তাৎক্ষণিকভাৱে পুনৰ বিৱেচনা কৰি মূল্যবৃদ্ধিৰ হ্ৰাস কৰিবলৈ দাবী জনায় ৷ উল্লেখ্য যে এই প্ৰতিবাদী কাৰ্যসূচী বিজনী আৰু মাণিকপুৰতো পালন কৰা হয় ৷ 🔯