👉কোচ ৰাজবংশী সংগ্ৰাম সমিতিৰ হুংকাৰ

👉কোচ ৰাজবংশী সংগ্ৰাম সমিতিৰ হুংকাৰ 

👉বিজেপি চৰকাৰে অতি সোনকালে জনজাতিকৰণৰ  ব্যৱস্থা গ্ৰহণ নকৰিলে আগন্তুক দিনত ইয়াৰ প্ৰতিফল ভোগ কৰিব লাগিব  

👉আগন্তুক বাজেট অধিবেশনত কমতাপুৰ স্বায়ত্ব শাসিত পৰিষদ গঠনৰ বিধেয়ক গৃহীত কৰক-- অতুল ৰায়

👉আন্দোলনৰ কাৰ্যসূচী ঘোষণা 

         🔯বঙাইগাঁওঃ ৩০ জুলাইঃ 

📝বিজেপি নেতৃত্বাধীন ৰাজ্য আৰু কেন্দ্ৰীয় চৰকাৰখনে অতি সোনকালে জনজাতিকৰণৰ সমস্যাটো সমাধানৰ ব্যৱস্থা কৰক ৷ অন্যথা আগন্তুক দিনত বিজেপি দলে ইয়াৰ প্ৰতিফল ভোগ কৰিব লাগিব ৷ এই হুংকাৰ দিছে কোচ ৰাজবংশী সংগ্ৰাম সমিতিয়ে ৷ লগতে অহা ৩১ আগষ্টৰ পৰা অনুষ্ঠিত হ'বলগীয়া অসম বিধান সভাৰ  বাজেট অধিৱেশনত কমতাপুৰ স্বায়ত্ব শাসিত পৰিষদৰ বিধেয়ক গৃহীত কৰি স্বায়ত্ব শাসিত পৰিষদখন গঠন কৰাৰ বাবে যি যাৱতীয় আইনী প্ৰক্ৰিয়াৰ প্ৰয়োজন তাক সম্পূৰ্ণ কৰিবলৈকো দাবী জনাইছে ৷ একেদৰে ঘোষণা কৰে আন্দোলনৰ কাৰ্যসূচীও ৷ আজি বঙাইগাঁও চহৰৰ বৃহত্তৰ বঙাইগাঁও প্ৰেছ ক্লাৱত আয়োজিত এখন সংবাদ মেলত সংগঠনটোৰ সভাপতি অতুল ৰায়ে বিজেপি চৰকাৰক উদ্দেশ্যি এই হুংকাৰ দিয়ে ৷ সভাপতিগৰাকীয়ে চৰকাৰৰ বিৰুদ্ধে ক্ষোভ প্ৰকাশ কৰি কয় যে কোচ ৰাজবংশীসকলৰ  দীৰ্ঘদিনীয়া দাবীটোৱে হ'ল জনজাতিকৰণৰ দাবী ৷ এই জনজাতিকৰণৰ দাবী সন্দৰ্ভত বিভিন্ন সময়ত বিভিন্ন চৰকাৰ আহিছে আৰু বিভিন্ন পদক্ষেপ লৈছিল ৷ শেহতীয়াভাৱে বিজেপি চৰকাৰো শাসনলৈ আহিল আৰু শাসনলৈ অহাৰ পিচত দুই এটা পদক্ষেপ লৈছিল ৷ কিন্তু দেখা গ'ল যে কেন্দ্ৰত বিজেপিয়ে পাঁচ বছৰ সময় ইতিমধ্যে অতিবাহিত কৰিলে আৰু দ্বিতীয়টো কাৰ্যকালৰো এবছৰ পাৰ হৈ গ'ল ৷ দ্বিতীয় কাৰ্যকালৰ এবছৰ অতিক্ৰম কৰাৰ পিচতো আমাৰ যি জনজাতিকৰণৰ সমস্যা সেয়া সমাধানৰ ব্যৱস্থা নকৰিলে ৷ যদিওবা বিভিন্ন সময়ত উচ্চ পৰ্যায়ৰ সমিতি আদি গঠন কৰা হৈছিল , তথাপিতো কিন্তু সমস্যাটো সমাধান নকৰিলে ৷ ইপিনে যোৱা লোক সভা নিৰ্বাচনৰ পূৰ্বে কোচ ৰাজবংশীকে ধৰি ছয় জনগোষ্ঠীৰ জনজাতিকৰণৰ যিখন বিধেয়ক ৰাজ্য সভাত উত্থাপন হৈছিল ,সেয়া কেৱল উত্থাপনহে হ'ল যদিও গৃহীত কিন্তু নহ'ল ৷ আনকি আলোচনাও নহ'ল ৷ তাৰ পিচত ছয় জনগোষ্ঠীৰ জনজাতিকৰণৰ বাবে চৰকাৰে ৰাজ্যৰ স্বাস্থ্যমন্ত্ৰী ড°হিমন্ত বিশ্ব শৰ্মাক অধ্যক্ষ হিচাপেলৈ এখন মন্ত্ৰী গোটৰ সমিতি বনালে ৷ নিৰ্বাচনৰ পূৰ্বে মন্ত্ৰী গোটে জনজাতিকৰণৰ বাবে বৈশিষ্ট নিৰ্ধাৰণৰ কাৰণে এখন বৈঠক অনুষ্ঠিত কৰিছিল আৰু সেই বৈঠকত এটা কথা আলোচনা হৈছিল যে ইতিমধ্য যিসকল জনজাতিৰ মৰ্যদা লাভ কৰি আছে তেওঁলোকৰ কোনো ক্ষতি নোহোৱাকৈ ছয় জনগোষ্ঠীক জনজাতিকৰণ কৰা হ'ব ৷ তাকো আলোচনা হ'ল যদিও কোনো চূড়ান্ত সিদ্ধান্ত নহ'ল ৷ এই বৈঠকৰ পিচত আৰু আজিলৈকে জনজাতিতৰণ সন্দৰ্ভত চৰকাৰৰ লগত কোনো আনুষ্ঠানিক আলোচনা হোৱা নাই ৷ সেয়ে আমি কোচ ৰাজবংশী সংগ্ৰাম সমিতিয়ে বিজেপি নেতৃত্বাধীন ৰাজ্য আৰু কেন্দ্ৰীয় চৰকাৰখনক সকিয়াই দিব বিচাৰিছো যে অতি সোনকালে জনজাতিকৰণৰ সমস্যাটো সমাধানৰ ব্যৱস্থা কৰক ৷ অন্যথা আগন্তুক দিনত বিজেপি দলে ইয়াৰ প্ৰতিফল ভোগ কৰিব লাগিব ৷  ইপিনে জনজাতিকৰণৰ প্ৰক্ৰিয়া চলি থকাৰ সময়তে অসম চৰকাৰে কেবিনেটত এটা প্ৰস্তাৱ লৈ সিদ্ধান্ত গ্ৰহণ কৰিছিল যে কমতাপুৰ স্বায়ত্ব শাসিত পৰিষদ , মটক স্বায়ত্ব শাসিত পৰিষদ আৰু মৰাণ স্বায়ত্ব শাসিত পৰিষদ নামেৰে তিনিখন স্বায়ত্ব শাসিত পৰিষদ গঠন কৰিব ৷ কিন্তু দুৰ্ভাগ্যজনক কথা এয়ে যে স্বায়ত্ব শাসিত পৰিষদ গঠনৰ প্ৰস্তাৱ কেবিনেটত গৃহীত কৰিছে যদিও কোনো ধৰণৰ আইনী প্ৰক্ৰিয়া সম্পন্ন কৰা নাই ৷ সেয়ে আমি  অহা ৩১ আগষ্টৰ পৰা হ'বগীয়া অসম বিধান সভাৰ যিখন বাজেট অধিৱেশন হ'ব ,সেই বাজেট অধিৱেশনত কমতাপুৰ স্বায়ত্ব শাসিত পৰিষদখনৰ লগতে তিনিখন স্বায়ত্ব শাসিত পৰিষদৰ বিধেয়ক গৃহীত কৰি স্বায়ত্ব শাসিত পৰিষদকেইখন গঠন কৰাৰ বাবে যি যাৱতীয় আইনী প্ৰক্ৰিয়াৰ প্ৰয়োজন তাক সম্পূৰ্ণ কৰিবলৈ দাবী জনাইছো ৷ লগতে অতি সোনকালে কমতাপুৰ স্বায়ত্ব শাসিত পৰিষদখন অন্তৱৰ্তীকালীন পৰিষদ হিচাপে গঠন কৰিবলৈকো বিজেপি নেতৃত্বাধীন চৰকাৰখনক দাবী জনায় সভাপতিগৰাকীয়ে ৷ 

আনহাতে সংবাদ মেলত সভাপতিগৰাকীয়ে কোচ ৰাজবংশী উন্নয়ন পৰিষদখনৰ প্ৰসংগ উত্থাপন কৰি স্বায়ত্ব শাসিত পৰিষদ এলেকাৰ বাহিৰৰ যিসকল কোচ ৰাজবংশী লোক আছে তেওঁলোকৰ উন্নয়নৰ বাবে পূৰ্ৱৰে পৰা যিখন কোচ ৰাজবংশী উন্নয়ন পৰিষদ চলি আছে , সেই উন্নয়ন পৰিষদখনক অধিক পুঁজি আৱণ্টন দি শক্তিশালী কৰিবলৈ ব্যৱস্থা গ্ৰহণ কৰিবলৈ চৰকাৰৰ ওচৰত দাবী জনায় ৷ যাতে উন্নয়ন পৰিষদখনে স্বায়ত্ব শাসিত পৰিষদ এলেকাৰ বাহিৰৰ কোচ ৰাজবংশী লোকসকলক উপকৃত কৰিব পাৰে তাৰ বাবে কাৰ্যকৰী ব্যৱস্থা গ্ৰহণ কৰিব লাগে বুলিও কয় ৷ ইপিনে এই সমগ্ৰ প্ৰক্ৰিয়াটো ত্বৰাম্বিত কৰাৰ বাবে তথা দাবীসমূহ ৰাইজৰ মাজলৈ নিয়াৰ লগতে চৰকাৰৰ দৃষ্টি আকৰ্ষণ কৰাৰ বাবে সংগঠনটোৱে এলানি আন্দোলনৰ কাৰ্যসূচীও ঘোষণা কৰে ৷ সভাপতিগৰাকীয়ে সংবাদ মেলত ঘোষণা কৰা অনুসৰি অহা আগষ্ট মাহৰ প্ৰথম সপ্তাহৰ পৰা কেন্দ্ৰীয় সমিতিৰ লগতে জিলা সমিতিসমূহে ৰাজ্য চৰকাৰ আৰু কেন্দ্ৰীয় চৰকাৰৰ বিভাগীয় মন্ত্ৰী তথা মুৰব্বীলৈ কোচ ৰাজবংশীসকলৰ জনজাতিকৰণ আৰু কমতাপুৰ স্বায়ত্ব শাসিত পৰিষদ গঠনৰ দাবীত স্মাৰক পত্ৰ প্ৰদান কৰিব ৷ সেইদৰে আগষ্ট মাহৰ মাজ ভাগত জনগোষ্ঠীটোৰ সমভাবাপন্ন বিভিন্ন দল- সংগঠনকলৈ আলোচনা অনুষ্ঠিত কৰিব ,যাতে স্বায়ত্ব শাসিত পৰিষদ আৰু জনজাতিকৰণৰ দাবী সন্দৰ্ভত একমতত উপনীত হ'ব পাৰে ৷ লগতে একেলগে যাতে স্বায়ত্ব শাসিত পৰিষদখন গঠনৰ বাবে আগুৱাই যাব পাৰে সেই উদ্দেশ্যে এই আলোচনা সভা অনুষ্ঠিত কৰিব বুলি কয় ৷ আনহাতে অহা ৩১ আগষ্টত জনজাতিকৰণ আৰু স্বায়ত্ব শাসিত পৰিষদ গঠনৰ দাবীত বঙাইগাঁও চহৰত এক প্ৰতীকী প্ৰতিবাদী কাৰ্যসূচী ৰূপায়ণ কৰিব ৷ বৰ্তমান যিহেতু কেৱল ৰাজ্য বা দেশেই নহয় বৰং সমগ্ৰ  বিশ্বজুৰি কৰ'না মহামাৰীয়ে গ্ৰাস কৰিছে সেয়ে সকলো নীতি- নিয়ম মানি প্ৰতীকী ৰূপত এই প্ৰতিবাদী কাৰ্যসূচী ৰূপায়ণ কৰা হ'ব বুলি সভাপতি অতুল ৰায়ে কয় ৷ সভাপতিগৰাকীয়ে ইয়াৰ পিচত অহা অক্টোৱৰ মাহৰ প্ৰথম সপ্তাহত জনজাতিকৰণ আৰু কমতাপুৰৰ দাবীক ভৱিষ্যতে কিদৰে আগুৱাই লৈ যোৱা হ'ব, সেই সন্দৰ্ভত এখন জাতীয় অভিৱৰ্তন আয়োজন কৰা হ'ব বুলি উল্লেখ কৰে ৷ অৱশ্যে যদিহে বৰ্তমান চলি থকা কৰ'না মহামাৰীৰ পৰিৱেশ ভাল হয় তেতিয়াহে অভিৱৰ্তনখন অনুষ্ঠিত কৰিব বুলিও কয় ৷ তাৰ পিচত পৰৱৰ্তী আন্দোলনৰ কাৰ্যসূচী ঘোষণা কৰা হ'ব বুলিও সংবাদ মেলত সভাপতিগৰাকীয়ে কয় ৷ সংবাদ মেলত সংগঠনটোৰ কেন্দ্ৰীয় সমিতিৰ প্ৰচাৰ সম্পাদক চহেন ৰায় , বঙাইগাঁও জিলা সমিতিৰ সভাপতি নাৰায়ণ মেধি আৰু সাধাৰণ সম্পাদক ৰাতুল ৰায় আদিও উপস্থিত আছিল🔯 ৷