NEWS 4 BONGAIGAON

👉বিজেপি চৰকাৰ খিলঞ্জীয়া বিৰোধী-- কোচ ৰাজবংশী জাতীয় মহাসভা

👉কমতাপুৰত অসম চৰকাৰৰ  উদ্যোগ নীতি প্ৰয়োগ হ'বলৈ দিয়া নহ'ব-বিশ্বজিৎ ৰায় ৷ 

             বঙাইগাঁওঃ ৩ জুলাইঃ 

🔯খিলঞ্জীয়া আৰু জাতি, মাটি, ভেটিৰ সুৰক্ষাৰ শপত খাই অসমত বিজেপি মিত্ৰজোঁট চৰকাৰে যোৱা ৪ বছৰে ওলোটা খোৰ মাৰি অসম তথ খিলঞ্জীয়া বিৰোধি কামহে কৰি অহা দেখা গ'ল ৷ এই মন্তব্য কোচ ৰাজবংশী জাতীয় মহাসভাৰ সাধাৰণ সম্পাদক তথা আক্ৰাছুৰ প্ৰাক্তন সভাপতি বিশ্বজিৎ ৰায়ৰ ৷ এক প্ৰেছ বিবৃতিত জাতীয় মহাসভাৰ সাধাৰণ সম্পাদক ৰায়ে অসম চৰকাৰৰ খিলঞ্জীয়া বিৰোধী কাৰ্যক তীব্ৰ সমালোচনা কৰি কয় যে যোৱা অসম বিধানসভা নিৰ্বাচনত খিলঞ্জীয়াৰ সুৰক্ষা কৱজ, অসমৰ ছয় জনগোষ্ঠীৰ জনজাতিকৰণকে ধৰি বিভিন্ন প্ৰতিশ্ৰুতি প্ৰদান কৰিছিল আৰু অসমৰ মানুহে দীৰ্ঘদিনীয়া সমস্যা সমাধানৰ স্বাৰ্থত কংগ্ৰেছ দলৰ চৰকাৰক ওফৰাই বিজেপি মিত্ৰ দলক ভোট দি শাসনত বহুৱাইছিল ৷ কিন্তু দুৰ্ভাগ্যজনক যে যোৱা চাৰি বছৰে কোচ ৰাজবংশীৰ লগতে অসমৰ পাঁচ জনগোষ্ঠীক জনজাতিকৰণ নকৰিলে আৰু জাতি, মাটি, ভেঁটি আৰু খিলঞ্জীয়াৰ কথা কোৱা চৰকাৰে যোৱা চাৰি বছৰে খিলঞ্জীয়াক প্ৰতাৰণা কৰাই নহয় চৰম ভাবে উপলুঙা কৰিলে ৷ এতিয়া অসম চৰকাৰে কৰ'না মহামাৰীৰ পৰিপেক্ষিতত চৰকাৰে ঘোষণা কৰা দীৰ্ঘদিনীয়া লোকডাউনৰ সুযোগ লৈ যোৱা ২৯ জুনত চৰকাৰে কেবিনেট সিদ্ধান্ত গ্ৰহণ কৰাৰ পিছতে অধ্যাদেশ জাৰি কৰি অসমৰ খিলঞ্জীয়া তথা ভূমিপুত্ৰৰ কৃষি ভূমি কাঢ়ি বহিৰাগত বনিক শ্ৰেণীক উদ্যোগ স্থাপনৰ নামত ৰঙা দলিছা পাৰি দিব বিছাৰিছে ৷ চৰকাৰৰ এই খিলঞ্জীয়া বিৰোধী কাৰ্যক কোচ ৰাজবংশী জাতীয় মহাসভাই কেতিয়াও সমৰ্থন নকৰে ৷ কোচ ৰাজবংশী জাতীয় মহাসভা উদ্যোগ স্থাপনৰ বিৰোধী নহয় ৷ উদ্যোগ স্থাপন হ'লে শিক্ষিত নিবনুৱাক সংস্থাপিত কৰাই নহয় অসমৰ অৰ্থনীতিত সহায়ক হ'ব ৷ কিন্তু শিক্ষিত নিবনুৱা আৰু আৰ্থিক লাভালাভৰ বাবে খিলঞ্জীয়াৰ স্বাৰ্থ জলাঞ্জলি দিব নোৱাৰি ৷ কোচ ৰাজবংশী জাতীয় মহাসভাৰ সাধাৰণ সম্পাদক বিশ্বজিৎ ৰাযে লগতে অনুকিয়াই কয় যে চৰকাৰৰ এই খিলঞ্জীয়া বিৰোধী নীতিৰ বাবে বঙাইগাঁও জিলাৰ চাপাৰাকাটা  ৰাজহ গাওঁৰ ৩ নং খণ্ডত বহিৰাগত বনিক পিয়ুষ মাৰ্কাৰ মালিকাধীন নৰ্থ ইষ্ট কেলচেনিয়া প্ৰাঃ লিঃ নামৰ কোপ্পানীটোৱে জিলা প্ৰশাসন আাৰু স্থানীয় পঞ্চায়ত সচিবক মিছা তথ্য দি  বিষাক্ত আৰু প্ৰদূষণ যুক্ত কাৰ্বন উদ্যোগ প্ৰতিষ্ঠা কৰিব উলাইছে ৷ এই ক্ষেত্ৰত কোচ ৰাজবংশী জাতীয় মহাসভাই আন আন সংগঠন আৰু স্থানীয় ৰাইজৰ সহযোগত ধৰ্ণা কাৰ্যসূচী গ্ৰহণ কৰি অসম প্ৰদূষণ নিয়ন্ত্ৰণ বোৰ্ড আৰু জিলা উপায়ুক্তক লিখিতভাবে স্মাৰক পত্ৰ দাখিল কৰে ৷ আনকি যোৱা ৭ জানুৱাৰীত অসম চৰকাৰৰ উদ্যোগ মন্ত্ৰীক মহাসভাই উদ্যোগটোৰ নিৰ্মাণ কাৰ্য বন্ধ কৰিবলৈ দাবী জনাই স্মাৰকপত্ৰ প্ৰদান কৰিছিল ৷ মহাসভাৰ জংগী পদক্ষেপ আৰু  দাবীৰ পৰিপ্ৰেক্ষিতত প্ৰদূষণ নিয়ন্ত্ৰণ বোৰ্ডে চৰজমিন তদন্ত কৰি উক্ত মাটি কৃষি ভূমি বুলি চিনাক্ত কৰে আৰু  উদ্যোগ প্ৰতিষ্ঠান কৰ্তৃপক্ষক উদ্যোগ নিৰ্মাণৰ কাম কাজ স্থগিত ৰাখিবলৈ লিখিত নিৰ্দেশনা দিয়ে আৰু বাধ্যত পৰি উদ্যোগৰ নিৰ্মাণ কাৰ্য বন্ধ কৰে ৷ প্ৰদূষণ বোৰ্ডৰ নিৰ্দেশনা পাই উদ্যোগ প্ৰতিষ্ঠানৰ মালিকে স্থানীয় নেতা-পালি-নেতাক টকা পইছাৰে মেনেজ কৰাৰ লগতে ৰাস্তা নিৰ্মাণ, নামঘৰ নিৰ্মাণ, চাকৰি প্ৰদান আদি প্ৰলোভন দি অতি গোপনে নিশাৰ ভাগত উদ্যোগটোৰ নিৰ্মাণ কাৰ্য সম্পূূূূৰ্ণ কৰে ৷ কাৰ্বন উদ্যোগ গঢ়িব খোজা ঠাই ডোখৰ সম্পূৰ্ণ কৃষিভূমি তথা ব্যক্তিগত মালিকাধীন পট্টা ভূক্ত আৰু চাৰিও ফালে জাতি-জনজাতিৰ বসতি প্ৰধান আৰু নিচেই কাষতে দুস্প্ৰাপ্য সোণালী বান্দৰ আৰু বিভিন্ন বিৰল প্ৰজাতিৰ জীৱ-জন্তুৰ বিচৰণ ভূমি কাকৈজনা সংৰক্ষিত বনাঞ্চল অৱস্থিত ৷ কাৰ্বন উদ্যোগটো তাত গঢ়ি উঠিলে সাংঘাটিক প্ৰদূষণ হোৱাৰ লগতে কৃষিভূমি আৰু জীৱকূলৰ ওপৰত বিৰূপ প্ৰভাৱ পৰিব ৷ গতিকে চৰকাৰ, স্থানীয় বিধায়ক তথা মন্ত্ৰী ফণীভূষণ চৌধুৰী আৰু বঙাইগাঁও জিলা প্ৰশানক অতিশীঘ্ৰে প্ৰস্তাৱিত কমতাপুৰ স্বায়ত্ত্বশাসিত পৰিষদত(কেএচি) উক্ত উদ্যোগ স্থাপনৰ বাবে দিয়া অনুমোতি বাতিল কৰিব দাবী জনায় ৷ অন্যাথা কোচ ৰাজবংশী জাতীয় মহাসভাই আইনৰ কাষ চপাৰ লগতে আন্দোনল কৰিবলৈ বাধ্য হ'ব বুলিও বিবৃতিটোত উল্লেখ কৰিছে ৷ কোচ ৰাজবংশী জাতীয় মহাসভাই কমতাপুৰ ৰাজ্য পুনৰ গঠন আৰু জনজাতিকৰণৰ দাবীত অচিৰেই জনজাগৰণৰ কাৰ্যসূচী গ্ৰহণ কৰিব বুলিও কয় ৷🔯