👉বঙাইগাঁৱত আক্ৰাছুৰ নেতৃত্বত কেইবাটাও সংগঠনৰ বৈঠক

 👉বঙাইগাঁৱত আক্ৰাছুৰ নেতৃত্বত কেইবাটাও সংগঠনৰ বৈঠক 

👉অসম বিধান সভাৰ বাজেট অধিৱেশনত জনজাতিকৰণ, কমতাপুৰ, স্বায়ত্ব শাসিত পৰিষদ আৰু উন্নয়ন পৰিষদ গঠনৰ দাবীত দিছপুৰ লাষ্ট গেটত ৩১ আগষ্টৰ পৰা ৭২ ঘণ্টীয়া অনশন কাৰ্যসূচী ঘোষণা 

👉সমস্যা সমাধানৰ পদক্ষেপ গ্ৰহণ নকৰিলে আন্দোলনৰ হুংকাৰ

           বঙাইগাওঁঃ ১৬ আগষ্টঃ

📝আগন্তুক অসম বিধান সভাৰ বাজেট অধিৱেশনত কোচ ৰাজবংশীসকলক অনুসূচীত জনজাতিকৰণ কৰা , ঐতিহাসিক কমতাপুৰ ৰাজ্য পুনৰ গঠনৰ বিষয়টো ৰাজনৈতিকভাৱে সমাধান কৰাৰ লগতে প্ৰস্তাৱিত কমতাপুৰ স্বায়ত্ব শাসিত পৰিষদ গঠন আৰু কোচ ৰাজবংশী উন্নয়ন পৰিষদ গঠনৰ দাবীত দিছপুৰ লাষ্ট গেটত আক্ৰাছুৰ নেতৃত্বত জনগোষ্ঠীটোৰ বিভিন্ন দল- সংগঠনে ঐক্যৱদ্ধভাৱে অনশন কাৰ্যসূচী ৰূপায়ণ কৰিব ৷ আজি বঙাইগাঁও চহৰৰ বৰপাৰাস্থিত আক্ৰাছুৰ মুখ্য কাৰ্যালয়ত আয়োজিত এখন সংবাদ মেলত সংগঠনটোৰ নেতৃত্বৰ লগতে বিভিন্ন সংগঠনৰ নেতৃত্বই এই কথা সদৰি কৰে ৷ উল্লেখ্য যে বিজেপি চৰকাৰে জনগোষ্ঠীটোৰ সমস্যাসমূহ সমাধান কৰাৰ ক্ষেত্ৰত বাৰে বাৰে কৰি অহা প্ৰতাৰণাৰ বিষয়টোৰ লগতে জনগোষ্ঠীটোৰ আন সমস্যা সন্দৰ্ভত আক্ৰাছুৰ নেতৃত্বত বিভিন্ন সংগঠনৰ প্ৰতিনিধিৰ উপস্থিতিত এখন যৌথ বৈঠক অনুষ্ঠিত হয় ৷ এই বৈঠকত আক্ৰাছুৰ নেতৃত্ব, সহযোগী সংগঠন কোচ ৰাজবংশী মহিলা সমিতি , চিলাৰায় সেনাৰ লগতে সদৌ অসম কোচ ৰাজবংশী সন্মিলনী , সদৌ অসম কোচ ৰাজবংশী যুৱ- ছাত্ৰ সন্মিলনী , কোচ ৰাজবংশী জাতীয় মঞ্চ , কোচ ৰাজবংশী কৃষ্টি বিকাশ পৰিষদ , কোচ ৰাজবংশী উন্নয়ন মঞ্চ আদি সংগঠনৰ প্ৰতিনিধি উপস্থিত থাকে ৷ এই বৈঠকৰ পিচতে আয়োজিত সংবাদ মেলত সংগঠনসমূহৰ নেতৃত্বই আক্ৰাছুই গ্ৰহণ কৰা আন্দোলনৰ কাৰ্যসূচীলৈ পূৰ্ণ সমৰ্থন আগবঢ়োৱাৰ কথা ঘোষণা কৰি চৰকাৰে দাবীসমূহ সমাধানৰ বাবে কোনো পদক্ষেপ গ্ৰহণ নকৰিলে বৃহৎ আন্দোলন গঢ়ি তোলাৰো হুংকাৰ দিয়ে ৷ সংবাদ মেলত আক্ৰাছুৰ মুখ্য উপদেষ্টা প্ৰদীপ কুমাৰ ৰায়ে কয় যে - আমি দীৰ্ঘদিনৰ পৰা কোচ ৰাজবংশীসকলক জনজাতিকৰণ কৰাৰ লগতে পৃথক কমতাপুৰ ৰাজ্য পুনৰ গঠন কৰাৰ বাবে আন্দোলন অব্যাহত ৰাখিছো ৷ এই বিজেপি চৰকাৰ শাসনলৈ অহাৰ পূৰ্বে কংগ্ৰেছ চৰকাৰেও আমাক বাৰে বাৰে জনগোষ্ঠীটোৰ দীৰ্ঘদিনীয়া সমস্যা সমাধানৰ প্ৰতিশ্ৰুতি দিছিল আৰু চৰকাৰৰ সৈতে আমি বহুবাৰ আলোচনা- বিলোচনাও কৰিছিলো ৷ কিন্তু আমাক বাৰে বাৰে প্ৰতাৰণা কৰিছিল ৷ যাৰ ফলত আমি কংগ্ৰেছ চৰকাৰৰ প্ৰতি ক্ষুদ্ধ হৈ পৰিছিলো আৰু বিজেপিক সমৰ্থন জনাইছিলো ৷ আমি বিজেপিৰ লগত আলোচনা কৰিছিলো যে যদিহে বিজেপি চৰকাৰে দিছপুৰ আৰু দিল্লীত চৰকাৰ গঠন কৰে তেতিয়াহলে নিশ্চিতভাৱে কোচ ৰাজবংশীসকলৰ সমস্যা সমাধান কৰিব ৷ বিজেপিয়েও শাসনলৈ অহাৰ  ছয় মাহৰ ভিতৰত জনজাতিকৰণ কৰিব আৰু কমতাপুৰৰ দাবীটো ৰাজনৈতিকভাৱে সমাধান কৰিব বুলি আমাক প্ৰতিশ্ৰুতি দিছিল ৷ সেই মতে আমি বিজেপিক ভোটদান কৰিলো আৰু দিল্লী আৰু দিছপুৰত শাসনত বহুৱালো ৷ কিন্তু আজি দিল্লীত নৰেন্দ্ৰ মোডী নেতৃত্বত শাসনৰ গাদীত বহা বিজেপি চৰকাৰৰ এটা কাৰ্যকাল শেষ গৈ গ'ল আৰু পুনৰ তেওঁৰ নেতৃত্বতে আন এটা কাৰ্যকাল চলি আছে ৷ সেইদৰে অসমতো সৰ্বানন্দ সোনোৱালৰ নেতৃত্বত বিজেপি চৰকাৰৰ শাসন চলি আছে আৰু বিধান সভা নিৰ্বাচন সমাগত ৷ কিন্তু ছয় মাহৰ ভিতৰত কোচ ৰাজবংশীসকলক জনজাতিকৰণ কৰাৰ যি প্ৰতিশ্ৰুতি দিছিল সেয়া কিন্তু কাৰ্যকৰী নকৰিলে ৷ ইপিনে ১৫ আগষ্টৰ দিনা অসমৰ মুখ্যমন্ত্ৰী সৰ্বানন্দ সোনোৱালে ঘোষণা কৰিছে যে এইবাৰ কোচ ৰাজবংশীসকলক জনজাতিকৰণ কৰা হ'ব ৷ লগতে ইতিমধ্যে ঘোষণা কৰা কমতাপুৰ স্বায়ত্ব শাসিত পৰিষদ গঠনৰ বিষয়টো বাজেট অধিৱেশনত গৃহীত কৰিব ৷ কিন্তু আমাক বিজেপি চৰকাৰে বাৰে বাৰে যি চলনা কৰি আহিছে তাৰ বাবে এইবাৰো আমি তেওঁলোকক বিশ্বাস কৰিব পৰা নাই ৷ যাৰ বাবে আমি ৩১ আগষ্টৰ পৰা অসম বিধান সভাৰ যি বাজেট অধিবেশন আৰম্ভ হ'ব ,সেই বাজেট অধিৱেশনতে  কোচ ৰাজবংশীসকলক জনজাতিকৰণ , পৃথক কমতাপুৰ ৰাজ্য পুনৰ গঠনৰ দাবীটোৰ ৰাজনৈতিক সমাধান আৰু ঘোষিত কমতাপুৰ স্বায়ত্ব শাসিত পৰিষদখন পুৰ্ণাংগ ৰূপত গঠন কৰিব লাগে বুলি দাবী জনাইছো ৷ লগতে যিখন কোচ ৰাজবংশী উন্নয়ন পৰিষদ আছিল আৰু বৰ্মতমান ভংগ কৰা হৈছে ,সেই উন্নয়ন পৰিষদখনো এই বাজেট অধিৱেশনত গঠন কৰাৰ দাবীত আমি আক্ৰাছুৰ নেতৃত্বত তথা বিভিন্ন দল- সংগঠনৰ সহযোগত অধিৱেশনৰ সময়তে দিছপুৰ লাষ্ট গেটত ৭২ ঘণ্টীয়া অনশন কাৰ্যসূচী ৰূপায়ণ কৰাৰ সিদ্ধান্ত গ্ৰহণ কৰা বুলি ঘোষণা কৰে ৷ এই অনশন কাৰ্যসূচীৰ জৰিয়তে আমি চৰকাৰক যিহেতু বিধান সভা নিৰ্বাচন আহি আছে ,সেয়ে এই বিধান সভা নিৰ্বাচনৰ আগে আগে এই যি বাজেট অধিৱেশন অনুষ্ঠিত হ'ব এই বাজেট অধিৱেশনতে কোচ ৰাজবংশীসকলৰ সমস্যাসমূহ সমাধান কৰিব লাগে বুলি দাবী জনাইছো  ৷ অন্যথা ইয়াৰ পৰৱৰ্তী পৰ্যায়ত বিজেপি চৰকাৰৰ বিৰিদ্ধে  তীব্ৰ আন্দোলন গঢ়ি তুলিম ৷ হয়তো আমি আমৰণ অনশনো ৰূপায়ণ কৰিম ৷ লগতে কংগ্ৰেছ চৰকাৰক যিদৰে অসমৰ পৰা উৎখাত কৰা হৈছিল ,সেই দৰে বিজেপি চৰকাৰৰো বিৰোধিতা কৰি ভোটদানৰ জৰিয়তে উৎখাত কৰা হ'ব বুলি সকিয়াই দিয়ে ৷

 ইপিনে সংবাদ মেলত উপস্থিত থকা সদৌ অসম কোচ ৰাজবংশী সন্মিলনীৰ সাধাৰণ সম্পাদক ৰঞ্জিত কুমাৰ ৰায়ে কয় যে -আমাক বিজেপি চৰকাৰেও কেৱল প্ৰতাৰণাই কৰিলে ৷ আমাৰ জনগোষ্ঠীটোৰ সমস্যাসমূহ সমাধান কৰিব বুলি কেৱল আশ্বাস দি আছে যদিও বাস্তৱত কিন্তু আমাক জনজািকৰণ নকৰে ৷ সেই কাৰণে  আমি চৰকাৰক সকিয়াই দিব বিচাৰিছো যে - চৰকাৰে যদি কোচ ৰাজবংশী জনগোষ্ঠীৰ ধৈৰ্যৰ পৰীক্ষা লৈ আছে, তেতিয়াহলে ভুল কৰিছে ৷ কাৰণ আমাৰ ধৈৰ্য ধৰাৰ সময় পাৰ হৈ গৈছে আৰু ধৈৰ্যৰ বান্ধ চিঙি গৈছে ৷ গতিকে আক্ৰাছুৱে যি আন্দোলনৰ কাৰ্যসূচী গ্ৰহণ কৰিছে তাৰ প্ৰতি আমি পূৰ্ণ সমৰ্থন জনাইছো ৷ আনহাতে সদৌ অসম কোচ ৰাজবংশী যুৱ- ছাত্ৰ সন্মিলনীৰ সভাপতি বৈষ্ণৱ কোচে কয় যে - বিগত প্ৰায় দুটা দশক ধৰি কোচ ৰাজবংশীসকলে জনজাতিকৰণৰ কাৰণে এক আন্দোলন কৰি আহিছে ৷ কিন্তু কংগ্ৰেছ চৰকাৰেই হওক বা এজিপি চৰকাৰেই হওক বা বিজেপি চৰকাৰেই হওক কোনো এখন চৰকাৰেই কোচ ৰাজবংশীসকলক জনজাতিকৰণ নকৰিলে ৷ ১৯৯৬ চনত কোচ ৰাজবংশীসকলক জনজাতিকৰণ কৰিছিল যদিও গোটেই ভাৰত বুৰঞ্জীত বা পৃথিৱীৰ বুৰঞ্জীত কোচ ৰাজবংশী জাতিটো হ'ল এনেকুৱা এটা জাতি যিটো জাতি এবাৰ জনজাতিকৰণ হোৱাৰ পিচত পুনৰ অজনজাতি হৈ গ'ল ৷ ইয়াৰ উত্তৰ আমাক চৰকাৰে দিব লাগিব ৷ কিয় এটা জাতি জনজাতি হোৱাৰ পিচত আকৌ জনজাতিকৰণৰ মৰ্যদা উঠাই ললে ৷ সেইদৰে ২০১৪ চনত নৰেন্দ্ৰ মোডী নেতৃত্বাধীন কেন্দ্ৰত যি চৰকাৰ আছিল তেওঁলোকে নিৰ্বাচনী ইস্তাহাৰত এটা প্ৰস্তাৱ লৈছিল যে বিজেপি দল শাসনলৈ আহিলেই ছয় মাহৰ ভিতৰত কোচ ৰাজবংশীকে ধৰি ছয় জনগোষ্ঠীক জনজাতিকৰণ কৰা হ'ব ৷ কিন্তু এই প্ৰস্তাৱ প্ৰস্তাৱ আকাৰেই থাকি গ'ল ৷ তেওঁলোকে আন বহু প্ৰস্তাৱ লৈছিল আৰু সেইবোৰ কাৰ্যকৰীও কৰিলে ৷ কিন্তু কোচ ৰাজবংশীসকলক প্ৰতাৰণা কৰি এই প্ৰস্তাৱটো তেওঁলোকে কৰ্যকৰী নকৰিলে ৷ কিয় নকৰিলে ? আমি কি সদায় প্ৰতাৰণাৰ বলী হৈ থাকিম নেকি ? পুনৰ ২৪ ডিচেম্বৰত ৰাজ্যিক কেবিনেটে সিদ্ধান্ত ললে যে কোচ ৰাজবংশীসকলক কমতাপুৰ স্বায়ত্ব শাসিত পৰিষদ গঠন কৰি দিব ৷কিন্তু আঠ মাহ হৈ গ'ল তেওঁলোকে কোনো আলোচনাও কৰা নাই আৰু কাৰ্যকৰীও কৰা নাই ৷ গতিকে এই সকলোবোৰ বিষয় সামৰি আমি আক্ৰাছুৰ নেতৃত্বত বিভিন্ন সংগঠনে যৌথ মঞ্চত মিলিত হৈছো আৰু বিষয়বোৰ আলোচনা কৰিছো ৷ সেয়ে যদিহে আগন্তুক দিনত কমতাপুৰ স্বায়ত্ব শাসিত পৰিষদখন গঠন নকৰে আৰু কোচ ৰাজবংশী উন্নয়ন পৰিষদখন গঠন কৰি নিদিয়ে ,তেতিয়াহলে কিন্তু আমি যি কোনো জংগী আন্দোলন কৰিবলৈ বা আমৰণ অনশন কৰিবলৈ বাধ্য হ'ম ৷ লগতে ইয়াকো কয় যে কোচ ৰাজবংশী উন্নয়ন পৰিষদখন গঠন কৰাত চৰকাৰে সহযোগ কৰিব লাগে ৷ কাৰণ উচ্চতম ন্যায়ালয়ে এক ৰায়দান কৰিছে আৰু পৰিষদখনৰ ইতিমধ্যে কাৰ্যকালো শেষ হৈছে ৷ গতিকে চৰকাৰৰ যদি সঁচাকৈ সদিচ্ছা আছে ,তেতিয়াহলে অতি শীঘ্ৰে উন্নয়ন পৰিষদখন গঠন কৰি কোচ ৰাজবংশীসকলৰ বিভিন্ন সমস্যা আৰু অৰ্থনৈতিক সমাধান যাতে হ'ব পাৰে তাৰ বাবে পদক্ষেপ গ্ৰহণ কৰাৰ বাবে আশা প্ৰকাশ কৰে ৷ সংবাদ মেলত উপস্থিত থকা কোচ ৰাজবংশী জাতীয় মঞ্চৰ সাধাৰণ সম্পাদক ভূপেন ৰায়ে কয় যে -- বিজেপিৰ নৰেন্দ্ৰ মোডীৰ নেতৃত্বত যেতিয়া কেন্দ্ৰত প্ৰথমখন চৰকাৰ গঠন হয়, তাৰ পূৰ্বে বঙাইগাঁও জিলাৰ বৰটিলাত অনুষ্ঠিত বিজেপিৰ নিৰ্বাচনী সভাত খোদ নৰেন্দ্ৰ মোডীয়ে আহি চৰকাৰ গঠন হ'লে কোচ ৰাজবংশী জনগোষ্ঠীক ছয় মাহৰ ভিতৰত  জনজাতিকৰণ কৰা হ'ব বুলি ঘোষণা কৰি গৈছিল ৷ সেই চৰকাৰখনৰ পাঁচ বছৰ কাল উকলি যোৱাৰ পিচত পুনৰ দ্বিতীয়বাৰৰ বাবে চৰকাৰ গঠন কৰিলে যদিও কিন্তু আজিলৈকে কোচ ৰাজবংশীসকলক জনজাতিকৰণ কৰা নহ'ল ৷ তাৰ পিচত ৰাজ্যতো বিজেপিৰ চৰকাৰ হ'ল আৰু কমতাপুৰ স্বায়ত্ব শাসিত পৰিষদ গঠন কৰিব বুলি ঘোষণা কৰিলে ৷ কিন্তু ঘোষণাতেই সীমাৱদ্ধ থাকিল স্বায়ত্ব শাসিত পৰিষদ গঠনৰ বিষয়টো ৷ নহ'ল কাৰ্যকৰী ৷ সেয়ে আমি দাবী জনাইছো যে- আগন্তুক বাজেট অধিৱেশনতে কমতাপুৰ স্বায়ত্ব শাসিত পৰিষদখন গঠন কৰাৰ লগতে কোচ ৰাজবংশী জনগোষ্ঠীক জনজাতিকৰণ কৰা হওক বুলি সিদ্ধান্ত গ্ৰহণ কৰক ৷ সেইদৰে কোচ ৰাজবংশী কৃষ্টি বিকাশ পৰিষদৰ সভাপতি ধৰ্মেশ্বৰ ৰায়ে কয় যে ভাৰত চৰকাৰেই হওক বা অসম চৰকাৰেই হওক আমাক প্ৰতাৰণা কৰি কৰি শেষ মুহূৰ্তত লৈ আহিছে ৷ এতিয়া আমাৰ এনে এটা অৱস্থা হৈছে যে আমি নিজেই সন্দিহান হৈ পৰিছো যে আমি আচলতে অবিচি , এছটি না আন কিবা ? কংগ্ৰেছ চৰকাৰৰ পৰা বৰ্তমানলৈকে সকলোৱে নিৰ্বাচনী ইস্তাহাৰত জনজাতিকৰণৰ বিষয়টো সন্নিবিষ্ট কৰে যদিও বাস্তৱত একো নকৰে ৷ বজেপিয়েও প্ৰতাৰণা কৰিলে ৷ আমাক এতিয়া ভাগ ভাগ কৰি দিছে ৷ সেয়ে আমি যৌথভাৱে আগবাঢ়িছো ৷ চৰকাৰে যদি বাজেট অধিৱেশনত সিদ্ধান্ত গ্ৰহণ নকৰে ,তেতিয়াহলে বৃহৎ আন্দোলন গঢ়ি তোলাৰ বাহিৰে আন গত্যন্তৰ নাথাকিব ৷ ইপিনে সদৌ কোচ ৰাজবংশী মহিলা সমিতিৰ সভানেত্ৰী পূৰবী সৰকাৰে কয় যে আক্ৰাছু ,মহিলা সমিতি আৰু চিলাৰায় সেনাই কোচ ৰাজবংশী জনগোষ্ঠীৰ হকে আন্দোলন কৰি আছো ৷ আমি বহু দিন পিচত পুনৰ আন্দোলন কৰিবলগীয়া হৈছে ৷ কাৰণ বিজেপি চৰকাৰে আমাক বাৰম্বাৰ প্ৰতাৰণা কৰি আহিছে ৷ তেওঁলোকে আমাৰ দাবীক কোনো গুৰুত্ব নিদিয়ে ৷ যাৰ বাবে পুনৰ আমি নতুনকৈ আন্দোলনৰ কাৰ্যসূচী গ্ৰহণ কৰিবলগীয়া হৈছে ৷ আমি বিভিন্ন সংগঠনে একত্ৰিতভাৱে আন্দোলন কৰি যোৱাৰ বাবে আলোচনা কৰিছো আৰু আগন্তুক অধিৱেশনৰ পূৰ্বে যদি আমাৰ সমস্যাখিনি সমাধান কৰাৰ কোনো পদক্ষেপ গ্ৰহণ নকৰে ,তেতিয়াহলে আমি বৃহৎ আন্দোলন কৰিব লাগিব ৷ সংবাদ মেলত আক্ৰাছুৰ সভাপতি অৰুণ কুমাৰ ৰায়ে কয় যে - আমাক চৰকাৰে পুনৰ আন্দোলন কৰাৰ বাবে বাধ্য কৰিছে ৷ আক্ৰাছুৰ লগতে মহিলা সমিতি আৰু চিলাৰায় সেনাৰ লগতে জনগোষ্ঠীটোৰ যিসমূহ সংগঠন আছে সকলোৱে জাতিটোৰ অস্তিত্ব ৰক্ষাৰ বাবে বহু দিনৰ পৰা আন্দোলন কৰি আছে ৷ কিন্তু দেখা গ'ল যে চৰকাৰে কেৱল প্ৰতিবাৰ নিৰ্বাচন আহিলেহে জনগোষ্ঠীটোৰ সমস্যাৰাজিকলৈ দৌৰা- ঢোপৰা লগায় ৷ বাকী সময়ত কোনো গুৰুত্বই নিদিয়ে ৷ নিৰ্বাচনী ইস্তাহাৰতো প্ৰতিশ্ৰুতি দিয়ে যে চৰকাৰ গঠন কৰিলে ছয়মাহৰ ভিতৰত বা এবছৰৰ ভিতৰত জনজাতিকৰণ কৰা হ'বল৷ কিন্তু বাস্তৱত সকলো ফুটুকাৰ ফেনত পৰিণত হয় ৷ ছমাহৰ ভিতৰত জনজাতিকৰণ কৰাৰ প্ৰতিশ্ৰুতি দিয়া নৰেন্দ্ৰ মোডী নেতৃত্বাধীন বিজেপি চৰকীৰে ইতিমধ্যে পাঁছ বছৰীয়া কাৰ্যকাল সমাপ্ত কৰি দ্বিতীয় বাৰৰ বাবে শাসনভাৰ চলাই আছে ৷ কিন্তু জনজাতিকৰণৰ প্ৰক্ৰিয়াটো লেহেমিয়া হোৱাহে দেখিবলৈ পাইছো ৷ মন্ত্ৰী ড°হিমন্ত বিশ্ব শৰ্মাৰ নেতৃত্বত যিখন মন্ত্ৰীগোটৰ সমিতি বনাই দিছে ,তেওঁলোকে প্ৰতিবেদনেই দাখিল কৰা নাই ৷ ইপিনে ২০২১ ত নিৰ্বাচন অনুষ্ঠিত হ'ব ৷ তেওঁ লোকৰ  যদি সদিচ্ছা আছে ,তেতিয়াহলে বিষয়টোক ৰাজনৈতিক ইছ্যু নবনাই অতিশীঘ্ৰে জনজাতিকৰণৰ প্ৰতিবেদনটো কেন্দ্ৰলৈ পঠিয়াব লাগে ৷ লগতে কমতাপুৰ স্বায়ত্ব শাসিত পৰিষদ গঠনৰ ক্ষেত্ৰতো চৰকাৰৰ লেহেমিয়া গতি দেখিবলৈ পাইছো৷ কৰ'না মহামাৰীৰ মাজতো চৰকাৰে বিভিন্ন কাম- কাজ কৰি আছে , কিন্তু আমাৰ সমস্যাসমূহ সমাধানৰ ক্ষেত্ৰত কোনো কাৰ্যকৰী ব্যৱস্থা গ্ৰহণ কৰা দেখা পোৱা নাই ৷ সেয়ে আগন্তুক বাজেট অধিৱেশনতে কমতাপুৰ স্বায়ত্ব শাসিত পৰিষদ গঠনৰ প্ৰক্ৰিয়াখিনি যাতে সম্পূৰ্ণ কৰে৷ অন্যথা আমি ইতিমধ্যে ৩১ আগষ্টৰ পৰা ৭২ ঘণ্টীয়া অনশন কাৰ্যসূচী ঘোষণা কৰিছোৱেই ৷ নহ' লে আমাক পুনৰ প্ৰতাৰণা কৰিব বুলি সন্দেহ হৈছে বুলি কয় ৷

আনহাতে আক্ৰাছুৰ সাধাৰণ সম্পাদক গোকুল বৰ্মনে কয় যে কংগ্ৰেছ নেতৃত্বাধীন চৰকাৰে বিগত সময়ছোৱাত চৰমভাৱে প্ৰতাৰণা আৰু প্ৰৱঞ্চ কৰাৰ কাৰণে শেহতীয়াভাৱে ৰাইজে বিজেপি নেতৃত্বাধীন চৰকাৰক শাসনত অধিষ্ঠিত কৰিছে ৷ কিন্তু শেহতীয়াভাৱে কোচ ৰাজবংশী জনগোষ্ঠীক বিজেপি নেতৃত্বাধীন চৰকাৰেও জনজাতিকৰণ আৰু কমতাপুৰৰ দাবীৰ ক্ষেত্ৰত কোনো ধৰণৰ গুৰুত্ব প্ৰদান কৰা নাই ৷ যাৰ পৰিণতিত আমি যোৱা ২৯ জুলাইত অসম চৰকাৰলৈ আহ্বান জনাইছৱো যে ১৫ আগষ্টৰ দিনাখনেই কোচ ৰাজবংশীসকলক জনজাতিকৰণ কৰাৰ ক্ষেত্ৰত স্থিতি স্পষ্ট কৰিব লাগে ৷ কিন্তু অসম চৰকাৰে যিহেতু জনজাতিকৰণ কৰাৰ ক্ষেত্ৰত কোনো ধৰণৰ স্থিতি স্পষ্ট কৰা নাই আৰু বৰ্তমান কৰ'না মহামাৰীৰ বাবে প্ৰতিবেদন পঠিওৱাৰ ক্ষেত্ৰত লেহেমিয়া হৈ আছে বুলি মুখ্যমন্ত্ৰীগৰাকীয়ে স্বাধীনতা দিৱসৰ দিনা নিজৰ বক্তব্যত প্ৰকাশ কৰিছে ,গতিকে আমি পুনৰ আন্দোলনৰ কাৰ্যসূচী গ্ৰহণ কৰিবলৈ বাধ্য হৈছো ৷ কাৰণ আমি মুখ্যমন্ত্ৰীক স্পষ্ট কৰি দিছিলো যে যদিহে ১৫ আগষ্টত আমি নিৰ্দিষ্ট সময়সীমা নাপাও ,তেতিয়াহলে আমি আমাৰ আন্দোলনৰ কাৰ্যসূচী ঘোষণা কৰিবলৈ বাধ্য হ'ম ৷ সেয়ে ঐতিহাসিক পৃথক কমতাপুৰ ৰাজ্য পুনৰ গঠন আৰু কোচ ৰাজবংশী জনগোষ্ঠীৰ জনজাতিকৰণৰ দাবীত ৩১ আগষ্টৰ পৰা যি বাজেট অধিৱেশন আৰম্ভ হ'ব সেই দিনটোৰ পৰাই দিছপুৰ লাষ্ট গেটত আক্ৰাছুৰ নেতৃত্বত জনগোষ্ঠীটোৰ বিভিন্ন দল- সংগঠনৰ সহযোগত ৭২ ঘণ্টীয়া অনশন কাৰ্যসূচী ৰূপায়ণ কৰাৰ বাবে আজি অনুষ্ঠিত বিভিন্ন সংগঠনৰ যৌথ বৈঠকত সিদ্ধান্ত গ্ৰহণ কৰা হয় বুলি কয় ৷ লগতে ১৯৪৯ চনৰ ২৮ আগষ্টত ভাৰত চৰকাৰৰ সৈতে কমতাপুৰ ৰাজ্যৰ শেষ ৰজা জগদ্বীপেন্দ্ৰ নাৰায়ণ ভূপ বাহাদুৰৰ মাজত হোৱা চুক্তি মৰ্মে কমতাপুৰক ছয়মাহৰ কাৰণে 'গ 'ৰাজ্যৰ মৰ্যদা দি পুনৰ ৰাজ্যৰ মৰ্যদাৰ পৰা বঞ্চিত কৰাৰ প্ৰতিবাদত ২৮ আগষ্টৰ দিনটো ক'লা দিৱস হিচাপে পালন কৰা হ'ব বুলি কয় ৷ সিদিনা আক্ৰাছুৰ প্ৰতিখন জিলা সমিতিয়ে ক'লা পতাকা উত্তোলন কৰি ক'লা দিন তথা প্ৰতাৰণা দিৱস হিচাপে পালন কৰিব বুলিও কয় ৷ আনহাতে অসম বিধান সভাৰ অধিৱেশনত যদি কমতাপুৰ , জনজাতিকৰণ, কমতাপুৰ স্বায়ত্ব শাসিত পৰিষদ গঠন আৰু কোচ ৰাজবংশী উন্নয়ন পৰিষদ গঠন সন্দৰ্ভত চৰকাৰে কোনো পদক্ষেপ গ্ৰহণ নকৰে ,তেতিয়ালে অধিৱেশনৰ পিচতে কৰ'না মহামাৰীৰ মাজতো জংগী ৰূপত আন্দোলনৰ কাৰ্যসূচী ৰূপায়ণ কৰাৰ লগতে ৰাজ পথত নামিবলৈ বাধ্য হ'ব বুলি চৰকাৰক সকিয়াই দিয়ে ৷ উন্নয়ন পৰিষদত পাঁচশ কৌটি টকাৰ পুঁজি আৱণ্টন দিবলৈকো দাবী জনায় ৷ সংবাদ মেলত সংগঠন কেইটাৰ ভালে সংখ্যক বিষয়ববীয়া উপস্থিত আছিল 🔯