👉চিৰাঙৰ বিজনীৰ ১ নং বিষ্ণুপুৰ বজাৰত বন্যহস্তীৰ আক্ৰমণত নিহত চাহ দোকানী

👉চিৰাঙৰ বিজনীৰ ১ নং বিষ্ণুপুৰ বজাৰত বন্যহস্তীৰ আক্ৰমণত নিহত চাহ দোকানী 

👉পথৰ ওপৰত মৃতদেহ লৈ প্ৰতিবাদ ক্ষুব্ধ ৰাইজৰ  

👉বিদ্যুতৰ তাঁৰত লাগি হাতীৰ মৃত্যু 

      বঙাইগাঁওঃ ১৯ আগষ্টঃ

📝চিৰা জিলাৰ বিজনীৰ ১ নং বিষ্ণুপুৰ বজাৰত বুধবাৰে বন্যহস্তীৰ আক্ৰমণত এজন চাহ দোকানী থিতাতে নিহত হয় । নিহত দোকানী জন অধৰ মেধী (৬১)। জানিব পৰা মতে পুৱা ১ নং বিষ্ণুপুৰ বজাৰস্থিত নিজৰ চাহ দোকানলৈ বুলি আহোতে বন্যহস্তীৰ আক্ৰমণত মৃত্যু হয় দোকানী জনৰ। যাৰ বাবে অঞ্চলটোত এক উত্তেজনাৰ সৃষ্টি হয়। বিটিচি বাঙালী যুৱ ছাত্ৰ ফেডাৰেচনৰ বিষ্ণুপুৰ আঞ্চলিক কমিটিৰ উদ্যোগত একাংশ ক্ষোভিত ৰাইজে ১ নং বিষ্ণুপুৰ বজাৰত মৃত অধৰ মেধীৰ মৃতদেহ লৈ প্ৰতিবাদ সাব্যস্ত কৰে। প্ৰতিবাদকাৰী সকলে বন বিভাগ হায় হায়, বন মন্ত্ৰী হায় হায় আদি শ্ল'গান দি প্ৰতিবাদস্থলী উত্তাল কৰি তোলে। ইফালে ঘটনাস্থলীত বন বিভাগৰ লোক উপস্থিত হয় যদিও চিৰাঙৰ উপায়ুক্ত আৰু বন বিষয়া ঘটনাস্থলীত উপস্থিত নোহোৱালৈকে প্ৰতিবাদ চলি থাকিব বুলি প্ৰতিবাদকাৰী সকলে হুংকাৰ দিয়ে। মৃতকৰ পৰিয়ালক ১০ লাখ টকা ক্ষতিপূৰণ দিয়াৰ দাবী কৰে সদৌ বিটিচি বাঙালী যুৱ ছাত্র ফেডাৰেচনে। উল্লেখ্য বিজনীৰ ১ নং  চিকাঝোৰাত বন্যহস্তীৰ আক্ৰমণত সোমবাৰে হৰেৰাম বৰ্মন নামৰ আন এজন কৃষক গুৰুতৰভাৱে আহত হয়।পাছত ঘটনাস্থলিত চিৰাং জিলা বন বিষয়া ব্ৰহ্মানন্দ পাটিৰী, বিজনীৰ চক্ৰ বিষয়া উপস্থিত হৈ চলিত বৰ্ষৰ ছেপ্টেম্বৰ মাহৰ ভিতৰত বৈদ্যুতিক শ্বৰ্ট লাইন(ফেন্সিং) দিয়া হ'ব বুলি ৰাইজক প্ৰতিশ্ৰুতি প্ৰদান কৰাত ৰাইজে প্ৰতিবাদ ভংগ কৰি আৰক্ষীক মৃতদেহ চমজাই দিয়ে।  

ইফালে একেদিনাই চিৰাং জিলাৰ বিজনীৰ ভাৰত-ভূটান সীমান্তৰ ৫ নং নতুন মাটিত বৈদ্যুতিক তাঁৰত লাগি মৃত্যু হোৱা এটা বন্যহস্তী উদ্ধাৰ হয় । জানিব পৰা মতে মৃত হাতীটোৰ বয়স ৩০ বছৰৰ অধিক হ'ব ৷ নিশা খাদ্যৰ সন্ধানত ওলাই অহা হাতীটো মৃত্যু মুখত পৰে বুলি সন্দেহ কৰা হৈছে । পাচত ঘটনাস্থলীত বন বিষয়া আৰু পশু চিকিৎসকৰ দল উপস্থিত হয় আৰু মৃত হাতীটোৰ মৰণোত্তৰ পৰীক্ষা সম্পন্ন  কৰি গাঁত খান্দি মাটিত পুতি থয় ৷হাতীটোৰ বিদ্যুৎপৃষ্ট হৈ মৃত্যু হোৱা বুলি বন বিভাগৰ বিষয়া আৰু চিকিৎসকে সংবাদ মাধ্যমৰ আগত প্ৰকাশ কৰে🔯 ৷