👉বঙাইগাঁৱতো এদিন বাদে এদিন সোঁফাল - বাওঁফালৰ ব্যৱসায়িক প্ৰতিষ্ঠান খোলা ৰখাৰ ব্যৱস্থা কাৰ্যকৰীকৰণৰ প্ৰস্তুতি

 👉বঙাইগাঁও জিলাত কৰ'নাই লৈছে ভয়াৱহ ৰূপ 

👉আক্ৰান্তৰ সংখ্যা আঠ শতাধিক অতিক্ৰম

👉বঙাইগাঁৱতো  এদিন বাদে এদিন সোঁফাল - বাওঁফালৰ ব্যৱসায়িক প্ৰতিষ্ঠান খোলা ৰখাৰ ব্যৱস্থা কাৰ্যকৰীকৰণৰ প্ৰস্তুতি  

         বঙাইগাঁওঃ ৭ আগষ্টঃ

📝বঙাইগাঁও জিলাত কোভিডত আক্ৰান্ত ব্যক্তিৰ সংখ্যা আঠ শতাধিক হৈছে ৷ জিলাখনত এতিয়া কৰ'না ভাইৰাছৰ গণ সংক্ৰমণে লৈছে ভয়াৱহ ৰূপ ৷ দৈনিক ধৰা পৰিছে বিভিন্নজন ব্যক্তিৰ দেহত কোভিড - ১৯ পজিটিভ ৷ কিন্তু তৎস্বত্বেও জিলা প্ৰশাসনে ৰাজহুৱা নকৰে আক্ৰান্ত ব্যক্তিৰ পৰিচয় ৷ আন জিলাত কোভিডত আক্ৰান্ত ব্যক্তিৰ নাম ৰাজহুৱা কৰা হয় যদিও বঙাইগাঁও জিলাত উপায়ুক্ত ডাঃ এম এছ লক্ষ্মীপ্ৰিয়াই আক্ৰান্ত ব্যক্তিৰ পৰিচয় ৰাজহুৱা কৰিব নোৱাৰিব বুলি জাৰি কৰি থৈছে এক নিৰ্দেশনা ৷ যাৰ ফলত জিলা প্ৰশাসনে কোভিডত আক্ৰান্ত ব্যক্তিৰ পৰিচয় ৰাজহুৱা নকৰাত জিলাখনত কোভিডত আক্ৰান্ত ব্যক্তিৰ সংখ্যা বৃদ্ধি পোৱাৰ ক্ষেত্ৰত ইয়ো এক অন্যতম কাৰক বুলি সচেতন মহলে মন্তব্য কৰিছে ৷ লগতে আক্ৰান্ত ব্যক্তিৰ পৰিচয় ৰাজহুৱা নকৰাৰ ফলত আক্ৰান্তক যিহেতু চিনিয়ে নাপায়, সেয়ে অধিকাংশ লোকে এতিয়া কৰ'নাকলৈ বেপোৰোৱা ভাৱ পোষণ কৰিছে ৷ ইপিনে বৃহস্পতিবাৰে জিলা উপায়ুক্ত ডাঃ এম এছ লক্ষ্মীপ্ৰিয়াই জিলাখনৰ কোভিড- ১৯ ৰ শেহতীয়া পৰিস্থিতি সন্দৰ্ভত সংবাদ মাধ্যমক অৱগত কৰাৰ উদ্দেশ্যে এখন সংবাদ মেলৰ আয়োজন কৰে ৷ জিলা উপায়ুক্ত কাৰ্যালয় চৌহদত অনুষ্ঠিত সংবাদ মেলত উপায়ুক্তগৰাকীয়ে সদৰি কৰা মতে বৃহস্পতিবাৰলৈকে জিলাখনৰ মুঠ ৮৪৯ জন ব্যক্তি কোভিড- ১৯ ত আক্ৰান্ত হৈছে আৰু ইয়াৰে ভিতৰত ৫১৬ জন ব্যক্তি সুস্থ হৈ নিজ ঘৰলৈ উভতি গৈছে ৷ আনহাতে ২১৫ জন ব্যক্তি জিলাখনৰ বিভিন্ন চিকিৎসালয়ত চিকিৎসাধীন হৈ থকা বিপৰীতে জিলাৰ বাহিৰত ১১৮ জন ব্যক্তি চিকিৎসাধীন হৈ আছে ৷ উপায়ক্তগৰাকীয়ে সংবাদ মেলত সদৰি কৰা মতে জিলাখনত ৩০ জুলাইৰ পৰা আৰ এ টি ( ৰেপিড এণ্টিজেন টেষ্ট ) আৰম্ভ কৰা হৈছে ৷ যিটোৰ দ্বাৰা আধা ঘণ্টাৰ ভিতৰতে এজন ব্যক্তিয়ে কোভিড পৰীক্ষাৰ ফলাফল লাভ কৰিব পাৰে ৷ জিলাখনত বৰ্তমান ৰেপিড এণ্টিজেন টেষ্ট আৰু আৰ টি- পি চি আৰ এই দুই ধৰণৰ ব্যৱস্থাৰ দ্বাৰা কোভিড-১৯ পৰীক্ষা চলি আছে বুলি কৈ উপায়ুক্তগৰাকীয়ে বুধবাৰৰ দিনটোত ৰেপিড এণ্টিজেন টেষ্টৰ বাবে মুঠ ১,৪৩২ জন ব্যক্তিৰ নমুনা সংগ্ৰহ কৰা হৈছিল আৰু ইয়াৰ ভিতৰত ১৭ জন ব্যক্তিৰ দেহত কোভিড- ১৯ পজিটিভ ধৰা পৰে বুলি কয় ৷ সেইদৰে আৰ টি পি চি আৰ টেষ্টৰ বাবে ১,৩৬৮ জন ব্যক্তিৰ নমুনা সংগ্ৰহ কৰা হৈছিল বুলি সদৰি কৰে ৷ তেওঁ লগতে সদৰি কৰা মতে জিলাখনত এ টি এচ পি আঁচনিৰ অধীনত ৩০ জুলাইৰ পৰা ৫ আগষ্টলৈকে জিলাখনত ৰেপিড এণ্টিজেন টেষ্টৰ বাবে ৮,৩৮১ জন ব্যক্তিৰ আৰু আৰ টি- পি চি আৰ টেষ্টৰ বাবে ৮,০১৭ জনকে ধৰি মুঠ ১৬,৩৯৮ জন ব্যক্তিৰ নমুনা সংগ্ৰহ কৰা হয় ৷ ইয়াৰ ভিতৰত ৰেপিড এণ্টিজেন টেষ্টৰ বাবে সংগ্ৰহ কৰা নমুনাৰ ১৭৯ জন ব্যক্তিৰ দেহত কোভিড- ১৯ পজিটিভ ধৰা পৰে ৷ জিলা উপায়ুক্তগৰাকীয়ে সদৰি কৰা মতে ইতিমধ্যে জিলাখনৰ ৩৩২ গৰাকী অংগনবাড়ী কৰ্মী আৰু ১,৯৯৩ গৰাকী শিক্ষকৰ স্বাৱ পৰীক্ষাৰ বাবে সংগ্ৰহ কৰা হৈছে আৰু সকলো শিক্ষকৰে নমুনা পৰীক্ষা কৰা হ'ব আৰু চলি আছে বুলিও কয় ৷ আনহাতে ৩১ জুলাইৰ পৰা ৫ আগষ্টলৈকে জিলাখনত মুঠ ১৮৪ জন ব্যক্তিৰ দেহত কোভিড- ১৯ পজিটিভ ধৰা পৰিছে ৷ ইয়াৰ ভিতৰত ৬৭ জন ব্যক্তি কোভিড পজিটিভ ৰোগীৰ সংস্পৰ্শলৈ অহাৰ বাবে আক্ৰান্ত হোৱাৰ বিপৰীতে আন্তঃ ৰাজ্যক আৰু আন্তঃ জিলা ভ্ৰমণ কৰা ব্যক্তিৰ দেহটো কোভিড- ১৯ পজিটিভ ধৰা পৰি আছে বুলি কয় ৷ এই সময়ছোৱাত ২০ জন আন্তঃ ৰাজ্য ভ্ৰমণ কৰা ,১৬ জন আন্তঃ জিলা ভ্ৰমণ কৰা , ৰে'লৱে কাৰখানা আৰু ৰে'ল বিভাগৰ ১৭ জন ,১৪ জন শিক্ষক ,অন্যান্য ২৬ জন তথা ব্যক্তিগত হাস্পতালৰ কৰ্মী , অটো চালক ,মায়াপুৰী তিনি আলীৰ ব্যৱসায়িক প্ৰতিষ্ঠানৰ কৰ্মী, বেংকৰ কৰ্মচাৰী , বজাৰ , অংগনৱাড়ী কৰ্মী ,বাহন বিক্ৰী প্ৰতিষ্ঠানৰ কৰ্মচাৰী , মেডিকেল ৰিপ্ৰেজেণ্টেটিভ আদি আছে ৷ কোভিড পজিটিভত ধৰা পৰাৰ পিচতে বিভিন্ন বজাৰ , বেংক ,জিলা উপায়ুক্ত কাৰ্যালয় , ব্যৱসায়িক প্ৰতিষ্ঠান , ডাকঘৰ , ৰে'লৱে কাৰখানা , ব্যক্তিগত খণ্ডৰ হাস্পতাল , মেডিকেল ৰিপ্ৰেজেণ্টেটিভৰ সেৱা , মেঘনা হুণ্ডাই ,বিশাল মেগামাৰ্ট , কুৰিয়াৰ সেৱা আদি বন্ধ ৰখা হৈছিল ৷ সেইদৰে এতিয়াও বাটা শ্ব'ৰুমকে ধৰি বিভিন্ন প্ৰতিষ্ঠান বন্ধ কৰি দিয়া হৈছে ৷ উপায়ুক্তগৰাকীয়ে সংবাদ মেলত সদৰি কৰা মতে জিলা প্ৰশাসনে বঙাইগাঁৱতো এদিন বাওঁ ফালৰ দোকান - পোহাৰ  আৰু এদিন সোঁফালৰ দোকান- পোহাৰ আদি খোলাৰ ৰখাৰ ব্যৱস্থা কাৰ্যকৰী কৰাৰ বাবে পৰ্যালোচনা কৰি আছে 🔯৷