👉বঙাইগাঁও পলিটেকনিকে থলুৱা পদ্ধতিৰে নিৰ্মাণ কৰি উলিয়ালে প্ৰথমখন দূৰ- নিয়ন্ত্ৰিত ক'ভিড ৰ'ভাৰ

👉বঙাইগাঁও পলিটেকনিকে থলুৱা পদ্ধতিৰে নিৰ্মাণ কৰি উলিয়ালে প্ৰথমখন দূৰ- নিয়ন্ত্ৰিত ক'ভিড ৰ'ভাৰ

👉মাণিকপুৰ আদৰ্শ চিকিৎসালয়ত আনুষ্ঠানিকভাৱে সেৱা আগবঢ়াবলৈ সাজু ৰ'ভাৰখন

               বঙাইগাঁওঃ ১ ছেপ্টেম্বৰঃ

📝বৰ্তমান সমগ্ৰ ৰাজ্যৰ লগতে বঙাইগাঁৱতো কৰ'নাৰ আতংকময় পৰিৱেশ বাহাল থকাৰ মাজতে বঙাইগাঁও জিলাৰ বঙাইগাঁও পলিটেকনিকৰ অধ্যক্ষ ড° চক্ৰধৰ দাস আৰু তেওঁৰ পাঁচজনীয়া এক দক্ষ সহযোগী দলে কঢ়িয়াই আনিছে এক সু-খবৰ। ড° চক্ৰধৰ দাসৰ নেতৃত্বত দলটোৱে থলুৱা পদ্ধতি তথা প্ৰযুক্তিৰে সাজি উলিয়াইছে এখন দূৰ নিয়ন্ত্ৰিত ক'ভিড ৰ'ভাৰ। ক'ভিড ৰোগী সকললৈ সেৱা আগবঢ়োৱাৰ ক্ষেত্ৰত কিছু সুচলতা অনাৰ উদ্দেশ্যেই সাজি উলিওৱা হৈছে এই ৰ'ভাৰ খন। মঙলবাৰে এক আনুষ্ঠানিক পৰিৱেশত বঙাইগাঁও পলিটেকনিকৰ তৰফৰ পৰা অধ্যক্ষ ড° চক্ৰধৰ দাসে মাণিকপুৰ ৰাজহ চক্ৰৰ চক্ৰ বিষয়া ৰীতিমণি দাস আৰু মাণিকপুৰ আদৰ্শ চিকিৎসালয়ৰ উপ-অধীক্ষক ডাঃ চিত্ৰৰঞ্জন দাস সম্বন্ধিতে আন আন চিকিৎসক আৰু স্বাস্থ্য কৰ্মীৰ উপস্থিতিত  দূৰ-নিয়ন্ত্ৰিত ক'ভিড ৰ'ভাৰ খন মানিকপুৰ আদৰ্শ চিকিৎসালয়ত চিকিৎসাধীন ক'ভিড ৰোগী সকলৰ সেৱাৰ বাবে আনুষ্ঠানিক ভাৱে প্ৰদান কৰে। প্ৰায় দুমাহ পূৰ্বে  অসম চৰকাৰৰ খাদ্য আৰু অসামৰিক যোগান বিভাগৰ মন্ত্ৰী ফণীভূষণ চৌধুৰী আৰু জিলা উপায়ুক্ত ডাঃ এম. এছ. লক্ষ্মীপ্ৰিয়াই জনোৱা আহ্বানৰ প্ৰতি সঁহাৰি জনাই কৰ'না ভাইৰাছত আক্ৰান্ত ৰোগী সকলৰ চিকিৎসাত সহায়ক হোৱাকৈ এই দূৰ নিয়ন্ত্ৰিত ৰ'ভাৰখন কেইজনমান দক্ষ সহযোগীৰ সৈতে সাজি উলিয়ায় বুলি অধ্যক্ষ ড° চক্ৰধৰ দাসে জানিবলৈ দিয়ে। তেওঁৰ সৈতে সহযোগী হিচাপে দিগন্ত সিং, দ্বিজেন্দ্ৰ সিং,শ্ৰীমল চন্দ্ৰ ৰয়, ধ্যানচন্দ্ৰ মেধী, বিপ্লৱ কুমাৰ সাহা আদি আছিল৷ 

ল'কডাউনৰ সময়ছোৱাত এই ৰ'ভাৰখন সাজোতে ব্যৱহৃত হোৱা কিছু ইলেকট্ৰিকেল আৰু মেকানিকেল সামগ্ৰী অনলাইন যোগে ক্ৰয় কৰা হৈছিল যদিও বেছিভাগ যন্ত্ৰ পাতি থলুৱা ভাৱে নানা প্ৰকাৰে যুগুত কৰি  ব্যৱহাৰ কৰা হৈছে।ৰ'ভাৰ খনৰ মূল অৱয়বটো প্লাইউড আৰু কাঠ-প্লাষ্টিক আদিৰে বনোৱা হৈছে।ইয়াত ব্যৱহাৰ হোৱা ইলেকট্ৰনিক চাৰ্কিত সমূহ দলটোৱে নিজ হাতে বনাই উলিয়াইছে আৰু কোনো ৰেডিমেড ম'ডিউল ব্যৱহাৰ কৰা হোৱা নাই। কাৰিকৰীভাৱে এইখন এখন দূৰ নিয়ন্ত্ৰিত অৰ্থাৎ ৰিম'ট কনট্ৰলৰ দ্বাৰা পৰিচালিত ট্ৰলি, যাৰ দুটা অংশ আছে ৷ এটা অংশ হ'ল ৰিম'ট কনট্ৰল, যিটো ব্যৱহাৰকাৰীৰ হাতত থাকিব আৰু আন অংশটো হ'ল যানখন অৰ্থাৎ ট্ৰলি অংশটো।ৰিম'টৰ পৰা অহা সংকেতৰ দ্বাৰা ইলেকট্ৰিক মটৰ দুটা অ'ন-অ'ফ কৰি ট্ৰলি খন চলোৱা কামটো কৰা হয়।এই ৰ'ভাৰ খনৰ শক্তিৰ উৎস হ'ল ৬ ভল্টৰ বেটাৰী আৰু বহন ক্ষমতা ১৫ কেজি।বেটাৰী চাৰি ঘণ্টা ছার্জ দিলে দিনটোলৈ এই ৰ'ভাৰ খন কাৰ্যক্ষম হৈ থাকিব। এই ৰ'ভাৰ খন বৰ্তমান সেৱা আগবঢ়াবৰ বাবে সাজু কৰি তোলা হৈছে।এই ৰ'ভাৰ খনৰ সহায়ত পি.পি.ই কীট ( PPE Kit) পিন্ধা এজন লোক ন্যস্ত নকৰাকৈয়ে ৰোগী সকলৰ মাজত খাদ্য আৰু ঔষধ যোগান ধৰিব পৰা যাৱ আৰু এইদৰে খাদ্য সামগ্ৰী যোগানকাৰীৰ মাজত ক'ভিডৰ সংক্ৰমণ ৰোধ কৰাত সহায়ক প্ৰমাণিত হোৱাৰ লগতে বহু পি ৰি ই কীট ৰাহি কৰিব বুলি আশা কৰা হৈছে🔯