👉বঙাইগাঁৱত 'কা' বাতিলকে ধৰি তিনি দফীয়া দাবীত জিলা সমন্বয়ৰক্ষী সমিতিৰ উদ্যোগত প্ৰতিবাদী কাৰ্যসূচী ৰূপায়ণ

👉বঙাইগাঁৱত 'কা' বাতিলকে ধৰি তিনি দফীয়া দাবীত জিলা সমন্বয়ৰক্ষী সমিতিৰ উদ্যোগত প্ৰতিবাদী কাৰ্যসূচী ৰূপায়ণ 

👉ৰাষ্ট্ৰপতিলৈ স্মাৰক পত্ৰ প্ৰেৰণ 

            বঙাইগাঁওঃ৮ ছেপ্টেম্বৰঃ
কৰ'না ভাইৰাছৰ সংক্ৰমণ অব্যাহত থকাৰ মাজতে মঙলবাৰে  'কা' বাতিলৰ দাবীত বঙাইগাঁৱত চি আই টি ইউ, আছু , কৃষক মুক্তি সংগ্ৰাম সমিতি, বঙাইগাঁও জিলা শিল্পী সমাজ , নাথ যোগী ছাত্ৰ সন্মিলনী ,চি পি আই ( এম) আদি বিভিন্ন সংগঠন, দল তথা সমাজকৰ্মীয়ে যৌথভাৱে প্ৰতিবাদ সাব্যস্ত কৰে ৷ সংগঠনসমূহে বঙাইগাঁও জিলা 'কা' বিৰোধী সমন্বয়ৰক্ষী সমিতিৰ উদ্যোগত জিলা উপায়ুক্ত কাৰ্যালয়ৰ সন্মুখত এই প্ৰতিবাদী কাৰ্যসূচী ৰূপায়ণ কৰে ৷ সমন্বয়ৰক্ষী সমিতিয়ে নাগৰিকত্ব আইন - ২০১৯ ( কা) বাতিল কৰাৰ লগতে কৃষক নেতা অখিল গগৈসহ সকলো 'কা' বিৰোধী প্ৰতিবাদকাৰীক নিঃ চৰ্তে মুক্তি দিয়া আৰু পাৰিপাৰ্শ্বিক প্ৰভাৱ নিৰূপণ অধিসূচনা - ২০২০ ( ই আই এ) বাতিলৰ দাবীত এই প্ৰতিবাদী কাৰ্যসূচী ৰূপায়ণ কৰে ৷ প্ৰতিবাদী কাৰ্যসূচী ৰূপায়ণ কৰাৰ পূৰ্বে প্ৰতিবাদকাৰীসকলে স্থানীয় গান্ধী ময়দানত একত্ৰিত হয় আৰু তাৰ পৰা সাম্প্ৰদায়িক তথা অসমৰ স্বাৰ্থ বিৰোধী 'কা ' বাতিল কৰক , অখিল গগৈসহ 'কা' বিৰোধী সকলক অনতি পলমে মুক্তি দিয়ক , 'কা' বাতিল কৰিব লাগিবই , অসাংবিধানিক সাম্প্ৰদায়িক 'কা' বাতিল কৰিব লাগিবই , সাম্প্ৰদায়িক ৰাজনীতি কৰা ব্জেপি হায় হায় , হিন্দু - মুছলমান ,অসমীয়া - বাঙালীৰ ৰাজীতি কৰা বিজেপি হায় হায় , ই আই এ অধিসূচনা বাতিল কৰক , অখিল গগৈক বিনাচৰ্তে মুক্তি দিয়ক আদি বিভিন্ন শ্লোগান দি সমদল কৰি জিলা উপায়ুক্ত কাৰ্যালয়ৰ সন্মুখত উপস্থিত হয় আৰু প্ৰতিবাদ সাব্যস্ত কৰে ৷ পিচত জিলা সমন্বয়ৰক্ষী সমিতিয়ে উপৰোক্ত তিনি দফীয়া দাবীত জিলা উপায়ুক্তৰ জৰিয়তে ভাৰতৰ ৰাষ্ট্ৰপতিলৈ এখন স্মাৰক পত্ৰ প্ৰেৰণ কৰে ৷ স্মাৰক পত্ৰখন জিলা উপায়ুক্তৰ হৈ সহকাৰী আয়ুক্ত কবিতা ডেকাই গ্ৰহণ কৰে ৷ 

ইপিনে প্ৰতিবাদী কাৰ্যসূচীত অংশ গ্ৰহণ কৰি বঙাইগাঁৱৰ চি পি আই ( এম) দলৰ নেতা তথা শ্ৰমিক নেতা হৰেশ্বৰ দাসে সংবাদ মাধ্যমৰ আগত কয় যে 'কা' বিৰোধী আন্দোলনৰ অন্যতম নেতা অখিল গগৈকে আদি কৰি কেইবাগৰাকীও নেতা - কৰ্মী কাৰাগাৰত আছে ৷ গতিকে এনে অৱস্থাত স্বাভাৱিকতে এই আন্দোলনৰ কাৰ্যসূচী আৰু অধিক শক্তিশালী  কৰাৰ প্ৰয়োজন হৈ পৰিছে বুলি আমি অনুভৱ কৰিছো ৷ প্ৰতিকূল বতৰ স্বত্বেও আমি বিভিন্ন সংগঠন আৰু সমাজ সংগঠকে একত্ৰিত হৈ প্ৰতিবাদী কাৰ্যসূচী ৰূপায়ণ কৰিছো ৷ আমাৰ দাবী হ'ল 'কা' আইনখন বাতিল হ'বই লাগিব ৷ কাৰণ অসমৰ জনসাধাৰণ তথা ভাৰতৰ ধৰ্ম নিৰপেক্ষতাক উলংঘনকাৰী এই আইনখন কেতিয়াও মানিব নোৱাৰি ৷ ঠিক সেইদৰে  ই আই এ - ২০২০ অধিসূচনাখন বাতিল কৰিব লাগিব ৷ কাৰণ এই অধিসূচনাখন আইনত পৰিণত হলে অসমৰ প্ৰাকৃতিক সম্পদৰ ওপৰত৷ৰাইজৰ কোনো অধিকাৰ নাথাকিব আৰু কৰ্পৰেট গোষ্ঠীয়ে অবাধে লুণ্ঠন চলাবলৈ সুবিধা পাব ৷ ইপিনে বঙাইগাঁও জিলা আছুৰ সভাপতি যিনোদ নাথে চৰকাৰক সকিয়াই দি কয় যে 'কা' অসমৰ ৰাইজে কেতিও মানি লোৱা নাই আৰু অনাগত দিনতো অসমৰ ৰাইজে মানি নলয় ৷ গতিকে 'কা বাতিল কৰিবই লাগিব ৷ আনগতে কৰ'নাৰ পৰিৱেশৰ মাজতে কেন্দ্ৰীয় চৰকাৰে অতি কৌশলগতভাৱে যি ই আই এ আইন আনিব বিচাৰিছে তাক আমি বিৰোধিতা কৰিছো আৰু বিজেপি চৰকাৰক ধিক্কাৰ দিছো ৷ ইয়াৰ জৰিয়তে অসমৰ জৈৱ বৈচিত্ৰৰ মাজত তথা অসমৰ বনাঞ্চল আৰু অসমবাসীৰ মাজত প্ৰভাৱ পেলাব ৷ সেয়ে আছুই আৰম্ভণিৰে পৰা ইয়াৰ প্ৰতিবাদ কৰি আহিছে আৰু আমি জিলা সমিতিয়েও বিৰোধিতা কৰো ৷ আমি চৰকাৰক সকিয়াই দিছো যে এই আইন আমি ওফোৰাই পেলাম ৷  অসমৰ ৰাইজে এনে আইন কেতিয়াও মানি নলয় ৷ সেইদৰে 'কা ' আন্দোলত জড়িত অখিল গগৈকে ধৰি যিকল নেতা - কৰ্মীক চৰকাৰে কৌশলগতভাৱে কাৰাবন্দী কৰি ৰাখিছে সেই নেতা- কপ্মীসকলক অতি শীঘ্ৰে মুকলি কৰি দিবলৈকো দাবী জনায় ৷ 

আনহাতে প্ৰতিবাদী কাৰ্যসূচীত অংশ গ্ৰহণ কৰি বঙাইগাঁও জিলা কৃষক মুক্তি সংগ্ৰাম সমিতিৰ সম্পাদক নন্দন দেৱনাথে কয় যে নাগৰিকত্ব সংশোধনী আইন আমি কেতিয়াও মানি লোৱা নাছিলো আৰু এতিয়াও নামানো আৰু ভৱিষ্যতেও মানি নলও ৷ এয়া আমাৰ স্পষ্ট কথা ৷ এই আইনখন যদি বিজেপি চৰকাৰে বাহুবল প্ৰদৰ্শন কৰি সংখ্যাৰ বলত যদি অসমীয়া ৰাইজৰ ওপৰত জাপি দি অসমীয়া ৰাইজক দমন কৰিব পাৰিম বুলি ভাবিছে ,তেতিয়াহলে তেওঁলোকে  মূৰ্খৰ স্বৰ্গত বসবাস কৰিছে ৷ আজি আমি অসমীয়া ৰাইজ ঐক্যবদ্ধ হৈছো আৰু ঐক্যবদ্ধ হৈ সমাগত ২১ ৰ নিৰ্বাচনত বিজেপি তথা যিবোৰ সাম্প্ৰদায়িক ৰাষ্ট্ৰীয় দল আছে তেওঁলোকক আমি দলিয়াই দিবলৈ সাজু আছো ৷ বিজেপি চৰকাৰখনে মনত ৰখা ভাল যে  'কা'খন যেনেকৈ তেওঁলোকে বাহুবল প্ৰদৰ্শন কৰি অসমীয়া ৰাইজৰ ওপৰত জাপি দিছে , ২১ ৰ নিৰ্বাচনৰ পিচত তেওঁলোকৰ হেঙেৰাবাৰীৰ যিটো ৰাজ্যিক কাৰ্যালয় সেইটো কোৱাৰেণ্টাইন চেণ্টাৰ বনাব লাগিব ৷ তাৰ বাহিৰে তেওঁলোকৰ বিকল্প নাই ৷ হিমন্ত - সৰ্বানন্দহত জেললৈ যাবলৈ সাঁজু থাকক ৷ কাৰণ এখন পিচত আন এখন জাতিধ্বংসী আইন তেওঁলোকে অসমৰ ওপৰত জাপি দি আছে ৷ গতিকে হিমন্ত বিশ্ব , সৰ্বানন্দ সোনোৱালৰ দিন এতিয়া উকলি গ'ল ৷ আজি তেওঁলোকক গৰিহণা দিছো ৷ অখিল গগৈক অন্যায় আৰু অবিচাৰভাৱে বন্দী কৰি থৈছে ৷ অতি সোনকালে তেওঁক মুকলি কৰি দিব লাগে ৷ প্ৰতিবাদী কাৰ্যসূচীত সমাজকৰ্মী প্ৰভাৱ বৈষ্ণৱে অংশগ্ৰহণ কৰি কয় যে 'কা' খন যদি অসম তথা উত্তৰ পূৰ্বাঞ্চলত কাৰ্যকৰী হয় , তেতিয়াহলে দীৰ্ঘদিনীয়াহলে অসম আন্দোলন তথা অসমীয়াৰ অস্তিত্ব ৰক্ষাৰ যি আন্দোলন , চুক্তি সকলো অপ্ৰাসংগিক হৈ পৰিব ৷ গতিকে 'কা' ৰ বিৰুদ্ধে আন্দোলন অব্যাহত আছে আৰু আগলৈকো চলি থাকিব ৷ সেইদৰে কেন্দ্ৰীয় চৰকাৰে শেহতীয়াভাৱে যিখন ই আই এ অধিসূচনা জাৰি কৰিছে সেইখন যদিহে আইনত পৰিণত হয় তেতিয়াহলে অসমৰ পাৰিপাৰ্শ্বিকতা সম্পূৰ্ণৰূপে ধ্বংস কৰিব ৷ কোনোবা কৰ্পৰেট গোষ্ঠীক বিভিন্ন অঞ্চলত উদ্যোগ স্থাপন কৰিবলৈ দি আমাৰ প্ৰাকৃতিক পৰিৱেশ বিনষ্ট কৰিব ৷ সেয়ে আমি ইয়াৰ তীব্ৰ বিৰোধিতা কৰিছো ৷ একেদৰে কাৰাবন্দী অখিল গগৈৰ মুক্তিৰ দাবী জনাই কয় যে অখিল গগৈক ৰাজনৈতিক উদ্দেশ্যপ্ৰণোদিতভাবে দীৰ্ঘদিন ধৰি কাৰাগাৰত বন্দী কৰি ৰখা হৈছে ৷ সেয়ে আমি অখিল গগৈসহ আন কাৰাৰুদ্ধ নেতা- কৰ্মীসকলক বিনাচৰ্তে মুক্তি দিবলৈ দাবী জনাইছো আৰু এই দাবীত ৰাষ্ট্ৰপতিলৈ স্মাৰক পত্ৰ প্ৰেৰণ কৰিছো ৷ উল্লেখ্য যে প্ৰতিবাদী কাৰ্যসূচীৰ অন্তত গান্ধী ময়দানত এখন চমু প্ৰতিবাদী সভাও অনুষ্ঠিত হয় ৷ সভাত শ্ৰমিক নেতা  হৰেশ্বৰ দাস ,সমাজকৰ্মী প্ৰভাত বৈষ্ণৱ , জিলা আছুৰ সভাপতি যিনোদ নাথ ,জিলা কৃষক মুক্তি সংগ্ৰাম সমিতিৰ সম্পাদক নন্দন দেৱনাথ ,বঙাইগাঁও জিলা শিল্পী সমাজৰ দীপক দাস , শ্ৰমিক নেতা সঞ্জীৱ দেৱ আদিয়ে বক্তব্য ৰাখে ৷ উল্লেখ্য যে আজি সমগ্ৰ ৰাজ্যতে 'কা ' বিৰোধী সমন্বয়ৰক্ষী সমিতিয়ে এই প্ৰতিবাদী কাৰ্যসূচীৰ আহ্বান জনাইছিল ৷ ইপিনে জিলাখনৰ মাণিকপুৰতো অৱস্থান কাৰ্যসূচী ৰূপায়িত হয় 🔯৷