👉বঙাইগাঁৱত প্ৰশিক্ষণপ্ৰাপ্ত গৃহৰক্ষী সন্থাৰ সংবাদ মেল- প্ৰতিবাদী কাৰ্যসূচী

👉বঙাইগাঁৱত প্ৰশিক্ষণপ্ৰাপ্ত গৃহৰক্ষী সন্থাৰ সংবাদ মেল- প্ৰতিবাদী কাৰ্যসূচী 

👉দাবী মানি নললে বৰ্জন কৰিব নিৰ্বাচন

👉২০ মাৰ্চৰ পৰা অনিৰ্দিষ্টকালীন কৰ্মবিৰতিৰ হুংকাৰ

👉টকা নিদিলে নাপায় নিযুক্তি 

বঙাইগাঁওঃ ২ মাৰ্চঃ

📝আমি প্ৰথমে দুদিনীয়া কৰ্মবিৰতি কাৰ্যসূচী পালন কৰিছো ৷ চৰকাৰে যদি আমাৰ এই কাৰ্যসূচীৰ পিচত কিবা আশাব্যঞ্জক সিদ্ধান্ত গ্ৰহণ কৰে ভাল কথা ৷ যদি কোনো সিদ্ধান্ত গ্ৰহণ নকৰে ,তেতিয়াহলে ২০ মাৰ্চৰ পৰা আমি ৰাজ্যজুৰি অনিৰ্দিষ্টকালীন কৰ্মবিৰতি কাৰ্যসূচী গ্ৰহণ কৰাৰ লগতে ভোট বৰ্জন কৰিম ৷ এই হুংকাৰ প্ৰশিক্ষণপ্ৰাপ্ত গৃহৰক্ষী সন্থাৰ ৷ উল্লেখ্য যে অসমৰ গৃহৰক্ষী জোৱানসকলৰ চাকৰি নিয়মীয়াকৰণৰ ব্যৱস্থা গ্ৰহণ কৰা , মহামান্য উচ্চতম ন্যায়ালয়ৰ নিৰ্দেশ মৰ্মে সমান কামৰ সমান দৰমহা আদায় দিয়া ,গৃহৰক্ষী জোৱানসকলৰ মকৰলৰ ক্ষেত্ৰত অনলাইন ডেপ্লয়পেণ্ট চিষ্টেম অতি সোনকালে বন্ধ কৰাৰ দাবীত ১ মাৰ্চৰ পুৱা ৬ বজাৰ পৰা ৩ মাৰ্চ পুৱা ৬ বজালৈ গ্ৰহণ কৰা অহযোগ আন্দোলন ( কৰ্মবিৰতি) ৰ মাজতে আজি বৃহত্তৰ বঙাইগাঁও প্ৰেছ ক্লাবত গৃহৰক্ষী সন্থাৰ বঙাইগাঁও জিলা সমিতিয়ে আয়োজন কৰা এখন সংবাদ মেলত সন্থাৰ কেন্দ্ৰীয় সমিতিৰ প্ৰচাৰ সম্পাদক জহিৰুল ইছলামে এই মন্তব্য কৰে ৷ সংবাদ মেলত কেন্দ্ৰীয় প্ৰচাৰ সম্পাদকজনে লগতে কয় যে কেৱল ভোট বৰ্জন কৰাই নহয় বৰং কোনেও নিৰ্বাচনত কৰ্তব্য পালন নকৰে আৰু যিসকলে বিভিন্ন ঠাইত কৰ্তব্য পালন কৰি আছে সেইসকল গৃহৰক্ষী জোৱানেও কোনো কৰ্তব্য পালন নকৰিব ৷ চৰকাৰে এক সপ্তাহৰ ভিতৰত যদি কিবা ভাল সিদ্ধান্ত ঘোষণা কৰে ভাল কথা , নহলে ২০ মাৰ্চৰ পৰা অনিৰ্দিষ্টকালীন কৰ্মবিৰতি কাৰ্যসূচী ঘোষণা কৰিবলৈ বাধ্য হ'ম ৷ 

প্ৰচাৰ সম্পাদকজনে  আৰু কয় যে এইখন বিজেপি চৰকাৰে আমাক বহু ধণৰ আশা দিছিল ৷ আমাৰ যিবোৰ অভাৱ- অভিযোগ আছে গোটেইবোৰ সমাধান কৰি দিম বুলিও প্ৰতিশ্ৰুতি দিছিল ৷ যোৱা ২০ ফেব্ৰুৱাৰীলৈকে আমি আমাৰ সমস্যাবোৰ চৰকাৰে সমাধান কৰিব বুলি অপেক্ষা কৰি আছিলো ৷ কিন্তু ২০ ফেব্ৰুৱাৰীৰ পিচত চৰকাৰৰ ওপৰত থকা আমাৰ আশা নিৰাশালৈ পৰিৱৰ্তন হ'ল ৷ সেই বাবে সদৌ অসম প্ৰশিক্ষণপ্ৰাপ্ত গৃহৰক্ষী সন্থাই ১ মাৰ্চৰ পৰা দুদিনীয়া কৰ্মবিৰতি কাৰ্যসূচী পালন কৰিছো ৷ আজিৰ দিনত আমি দৈনিক ৩০০ টকাকৈ দিন হাজিৰা কৰি আছো ৷ যদি আমাৰ ঘৰত কিবা কামৰ কাৰণে এজন হাজিৰা কৰা লোকক ল'বলগীয়া হয় ,তেতিয়াহলে সেই জন লোককে দিন হাজিৰা হিচাপে আমি ৫০০ টকা দিব লাগে ৷ আমি দুদিনৰ টকাৰেহে এদিনৰ বাবে ঘৰৰ কামৰ বাবে হাজিৰা কৰা মানুহকলৈ কাম কৰিব পাৰো ৷ এই তিনিশ টকাৰে আমি নিজৰ লগতে পৰিয়ালক চলাব লাগে ৷ সন্তানক পঢ়ুৱাব লাগে ,নিজে কৰ্মস্থলীলৈ অহা যোৱা কৰিব লাগে , বেমাৰ আজাৰ হলে চিকিৎসা কৰিব লাগে ৷ মুঠতে এয়াই হ'ল বৰ্তমানৰ গৃহৰক্ষী জোৱানসকলৰ অৱস্থা ৷ আনহাতে গৃহৰক্ষী জোৱানসকলৰ মকৰলৰ ক্ষেত্ৰত অনলাইন ডেপ্লয়পেণ্ট চিষ্টেম অতি সোনকালে বন্ধ কৰাৰ বাবে চৰকাৰক দাবী জনাই প্ৰচাৰ সম্পাদক ইছলামে কয় যে এইটো এটা অপ্ৰয়োজনীয় ব্যৱস্থা ৷ কাৰণ ৰাজ্যজুৰি ১৬ হাজাৰ গৃহৰক্ষী জোৱানে কৰ্তব্য পালন কৰি আছে যদিও মুঠ ২৭ হাজাৰজন গৃহৰক্ষী জোৱান আছে ৷ বাকীসকলে এনেই থাকিবলগীয়া হয় ৷ সেয়ে এই ২৭ হাজাৰজনৰ ভিতৰত ১৬ হাজাৰজনে মকৰল পাবলৈ হলে কিমান প্ৰতিযোগিতা হয় সেয়া ভাৱক ৷ প্ৰচাৰ সম্পাদকজনে আনকি টকাৰ ওপৰতে মকৰল হৈ আছে বুলি কয় ৷ টকা নিদিলে নিযুক্তি লাভ নকৰে বুলিও কয় ৷ যিয়ে টকা বেছি দিব তেঁৱে নিযুক্তি লাভ কৰিব আৰু যিয়ে দিব নোৱাৰিব তেওঁ নিযুক্তি লাভ নকৰিব ৷ প্ৰচাৰ সম্পাদকজনে টকা কোনে লয় সেই বিষয়ে কবলৈ গলে কোনো দিনে নিযুক্তি নাপাব বুলিও কয় ৷

ইপিনে জিলা সমিতিৰ উপদেষ্টা বাচিদুল্লা আহমেদে কয় যে অসম গৃহৰক্ষী বাহিনীটো ১৯৪৭ চনৰ ৬ ডিচেম্বৰত গঠন হৈছিল ৷ গঠন হোৱাৰে পৰা একেদৰেই চলি আছে ৷ কোনো এখন চৰকাৰে বাহিনীটোৰ সৈতে জড়িত জোৱানসকলৰ সা- সুবিধাৰ ক্ষেত্ৰত কোনো গুৰুত্ব প্ৰদান কৰা নাই ৷ আজি অসম আৰক্ষীত নিযুক্তিৰ ক্ষেত্ৰত গৃহৰক্ষী বাহিনীৰ কোটা আছে ৷ কিন্তু কোনেও সুবিধা নাপায় ৷ চৰকাৰে এই  বাহিনীটোৰ জৰিয়তে ব্যৱসায় কৰি খাই আছে ৷ আজি এজন পুলিচ বা চিপাহী - কৰ্মচাৰীৰ মাহেকীয়া দৰমহা যদি ত্ৰিছ হাজাৰ টকা হয় , তেতিয়াহলে সেই ত্ৰিছ হাজাৰ টকাৰে আমাৰ তিনিজনক কামত খটুৱাই আছে ৷ এনে অৱস্থাত চৰকাৰে যদি আমাৰ কথা নাভাৱে ,তেতিয়াহলে আমাৰ নিচিনা এই দৰিদ্ৰ পৰিয়াল কেইটাক গুলী কৰি মাৰি পেলাওক ৷ আজিৰ দিনত ৯ হাজাৰ টকাৰে পৰিয়াল চলোৱাতো কিমান অসুবিধা সেয়া আমি বুজি পাও ৷ ৰাজ্যখনৰ চুকে - কোনে আমাৰ গৃহৰক্ষী জোৱানসকলেই কৰ্তব্য পালন কৰি আহিছে ৷ অসম পুলিচৰ কেইজনে কৰ্তব্য পালন কৰে ? গৃহৰক্ষী জোৱানে যি কৰ্তব্য পালন কৰে অসম পুলিচৰ এজন কনিষ্টবলেও তেনেদৰে কৰ্তব্য পালন নকৰে ৷ ড্ৰাইভাৰ ,ৰান্ধনি আদিকে কৰি সকলোতে গৃহৰক্ষী বাহিনীৰ জোৱানে কৰ্তব্য পালন কৰি আহিছে ৷ তাৰ পিচতো কিন্তু এই অন্ধ চৰকাৰখনে আমাৰ এই কামবোৰ দেখা নাপায় ৷ আমি দৈনিক ৮ ঘণ্টাকৈ কৰ্তব্য পালন কৰিব লাগে যদিও ২৪ ঘণ্টাই কৰ্তব্য পালন কৰি আহিছো ৷ মন্ত্ৰী আহিলে , সভা হলে আমিয়েই কৰ্তব্য পালন কৰিব লাগে ৷ কিন্তু ইমানৰ পিচতো চৰকাৰে আমাৰ সমস্যাসমূহ সমাধান কৰাৰ বাবে কোনো গুৰুত্ব প্ৰদান কৰা নাই ৷ সেয়ে আমি চৰকাৰ তথা অসম আৰক্ষীৰ উৰ্ধতম মহলক আমাৰ দাবীসমূহ সমাধান কৰাৰ বাবে আহ্বান জনাইছো ৷ অন্যথা নিৰ্বাচন বৰ্জন কৰিম ৷ সংবাদ মেলত জিলা প্ৰশিক্ষণপ্ৰাপ্ত গৃহৰক্ষী সন্থাৰ সভাপতি ফজিৰুল হক , সম্পাদক লোহিত কলিতা আদিৰ লগতে বহুসংখ্যক গৃহৰক্ষী জোৱান উপস্থিত আছিল ৷ 

ইপিনে  সংবাদ মেলৰ অন্তত গৃহৰক্ষী জোৱানসকলে এক প্ৰতিবাদী কাৰ্যসূচীও ৰূপায়ণ কৰে ৷ প্ৰতিবাদী কাৰ্যসূচীত অংশগ্ৰহণ কৰা গৃহৰক্ষী জোৱানসকলে হাতে হাতে বেনাৰ আৰু বিভিন্ন প্লেকাৰ্ড লৈ আমাৰ চাকৰি নিয়মীয়া কৰক , আমাৰ দৰমহা বৃদ্ধি কৰক , উচ্চতম ন্যায়ালয়ৰ নিৰ্দেশ মানি লওক , মকৰলৰ ক্ষেত্ৰত অনলাইন ব্যৱস্থা বন্ধ কৰক আদি বিভিন্ন শ্লোগান দিয়ে ৷ উল্লেখ্য যে বঙাইগাঁও জিলাত ছয়শ জন প্ৰশিক্ষণপ্ৰাপ্ত গৃহৰক্ষী জোৱান আছে যদিও ইয়াৰ ভিতৰত আৰক্ষী অধীক্ষকৰ অধীনত ২২১ জন আৰু উদ্যোগ বিভাগৰ অধীনত ১২০ জন জোৱানহে নিযুক্ত হৈ আছে ৷ বাকী ২৫৯ জন জোৱানে মকৰল পোৱা নাই ৷ 🔯