👉৩২ নং বঙাইগাঁও বিধান সভা সমষ্টিত মহিলাৰ দ্বাৰা পৰিচালিত হ'ব ২৪ টা ভোটগ্ৰহণ কেন্দ্ৰ

👉বঙাইগাঁও জিলা  উপায়ুক্তৰ কাৰ্যালয়ত ভোটাৰ সজাগতাৰ ওপৰত সংবাদমেল

👉৩২ নং বঙাইগাঁও বিধান সভা সমষ্টিত মহিলাৰ দ্বাৰা পৰিচালিত হ'ব ২৪ টা ভোটগ্ৰহণ কেন্দ্ৰ 

বঙাইগাঁও ১১ মাৰ্চঃ 

📝সমাগত বিধান সভা নিৰ্বাচনৰ প্ৰতি লক্ষ্য ৰাখি বঙাইগাঁও জিলা প্ৰশাসনে ভোটাৰসকলৰ মাজত সজাগতা সৃষ্টি কৰাৰ উদ্দেশ্যে বিভিন্ন সজাগতামূলক কাৰ্যসূচী ৰূপায়ণ কৰিছে ৷ এই সন্দৰ্ভত আজি উপায়ুক্ত কাৰ্যালয়ৰ সভা কক্ষত অনুষ্ঠিত এখন সংবাদ মেলত জিলা উপায়ুক্ত ডাঃ এম.এছ. লক্ষ্মীপ্ৰিয়াই কয় যে বিধান সভা নিৰ্বাচনৰ বাবে ভোটাৰ সকলৰ মাজত সজাগতা সৃষ্টি কৰাৰ বাবে ইতিমধ্যে বিভিন্ন সজাগতামূলক কাৰ্যসূচী ৰূপায়ণ কৰা হৈছে । ২৫ জানুৱাৰীত 'ৰাষ্ট্ৰীয় ভোটাৰ দিৱস' উপলক্ষে বঙাইগাঁও কলেজত নতুন ভোটাৰৰ  মাজত সজাগতা বৃদ্ধিৰ বাবে সজাগতা শোভাযাত্রা, কিক্ বক্সিং প্ৰতিযোগিতা, চিগনেচাৰ কেম্পেইন, শ্লোগান বনোৱা, ছবি অকা, ফেশ্বন শ্ব' আদি প্ৰতিযোগিতা অনুষ্ঠিত কৰা হৈছিল । ইয়াৰ লগতে বঙাইগাঁও জিলা নিৰ্বাচনী বিভাগৰ তৰফৰ পৰা সোণালী বান্দৰক প্ৰতীক হিচাপে লৈ এটা শুভংকৰ মুকলি কৰা হয় ৷ 'গোল্ডী' নামৰ এই শুভংকৰ প্ৰতীকটো ভিডিঅ কনফাৰেঞ্চৰ জৰিয়তে অসমৰ মুখ্য নিৰ্বাচনী বিষয়া নিতীন খাড়েই মুকলি কৰিছিল। সেইদৰে স্থানীয় গান্ধী ময়দানত শীতকালীন মেলা অনুষ্ঠিত কৰা হৈছিল । য'ত স্থানীয় শিপিনীৰ দ্বাৰা বোৱা কাপোৰ আৰু আত্ম সহায়ক গোটৰ দ্বাৰা প্ৰস্তুত কৰা বিভিন্ন খাদ্য সামগ্ৰী প্ৰদৰ্শন আৰু বিক্ৰীৰ ব্যৱস্থা কৰা হৈছিল । লগতে ভোটাৰৰ মাজত সজাগতা সৃষ্টিৰ বাবে স্থানীয় শিল্পীৰ দ্বাৰা নৃত্য- গীত, ফেচন শ্ব' ,কবিতা আবৃত্তি ইত্যাদি সাংস্কৃতিক অনুষ্ঠানৰ আয়োজন কৰা হৈছিল ।  ইয়াৰোপৰি বঙাইগাঁও সমূহীয়া স্বাস্থ্য কেন্দ্ৰত গছ পুলি ৰোপণ কৰা হৈছিল । ইয়াৰ উপৰিও নিৰ্বাচনৰ লগত সংগতি ৰাখি উপায়ুক্ত কাৰ্যালয়ৰ প্ৰাংগণত এটা আদৰ্শ ভোটগ্ৰহণ কেন্দ্ৰ আৰু ফটো গেলেৰী মুকলি কৰা হয় ৷ এই আদৰ্শ ভোট কেন্দ্ৰ আৰু ফটো গেলেৰী উপায়ুক্ত ডাঃ এম.এছ.লক্ষ্মীপ্ৰিয়াই মুকলি কৰে । ইয়াৰ উপৰিও বিভিন্ন কাৰ্যসূচী গ্ৰহণ কৰা বুলিও উল্লেখ কৰে ৷

সংবাদ মেলত উপায়ুক্ত গৰাকীয়ে আৰু কয় এইবাৰ নিৰ্বাচন আয়োগে ৮০ বছৰ বয়সৰ উদ্ধৰ্তম ব্যক্তি, ভোটাৰ তালিকাত চিহ্নিত হৈ থকা শাৰীৰিক ভাবে অক্ষম ব্যক্তিসকলৰ লগতে ক'ভিড-১৯ত আক্ৰান্ত অথবা ক'ভিড-১৯ ৰোগত আক্ৰান্ত হোৱা বুলি সন্দেহ কৰা ব্যক্তি সকলক পোষ্টেল বেলটৰ জৰিয়তে ভোটদানৰ ব্যৱস্থা আগবঢ়াইছে ৷ ইয়াৰ বাবে ক্ষেত্র পৰ্যায়ৰ বিষয়াৰ জৰিয়তে ঘৰে ঘৰে গৈ তেওঁলোকক প্ৰ-পত্র 12-D যোগান ধৰা হৈ আছে ।উপায়ুক্ত গৰাকীয়ে আৰু কয় যে এইবাৰ নিৰ্বাচনত ৩২ নং বঙাইগাঁও বিধানসভা সমষ্টিত ২৫ টা বিশেষ ভোটগ্ৰহণ কেন্দ্ৰ স্থাপন কৰা হ'ব ৷ ইয়াৰ ভিতৰত  ২৪ টা ভোট গ্ৰহণ কেন্দ্ৰ মহিলাৰ দ্বাৰা পৰিচালিত হ'ব আৰু এটা আদৰ্শ ভোট গ্ৰহণ কেন্দ্ৰ স্থাপন কৰা হ'ব । এই ২৫ টা ভোটগ্ৰহণ কেন্দ্ৰতে শিশু আৰু মাতৃৰ বাবে পখিলা নামৰ এটা আদৰ্শ কোঠালিৰ ব্যৱস্থাও কপা হ'ব । আনহাতে সমষ্টিটোৰ প্ৰত্যেক ভোটগ্ৰহণ কেন্দ্ৰত ভোটদান সাব্যস্ত কৰিবলৈ যোৱা প্ৰথম গৰাকী ভোটাৰে ফিটা কাটি ভোট গ্ৰহণ কেন্দ্ৰৰ দ্বাৰ মুকলি কৰিব আৰু তেওঁক এখন প্ৰশংসা পত্র প্ৰদান কৰা হ'ব। ইয়াৰ লগতে আদৰ্শ কেন্দ্ৰত ভোটদান কৰা প্ৰতিজন ভোটাৰকে একোটাকে গছ পুলি উপহাৰ দিয়া হ'ব। লগতে কয় যে ৩২ নং বঙাইগাঁও বিধান সভা সমষ্টিৰ ৫০ শতাংশতকৈও অধিক মহিলা ভোটাৰ ৷ উপায়ুক্তগৰাকীয়ে এইবাৰৰ নিৰ্বাচন মুক্ত , নিকা আৰু নিৰাপদ নিৰ্বাচন হিচাপে অনুষ্ঠিত কৰাৰ বাবে ভোটাৰ ৰাইজক প্ৰশাসনক সহযোগিতা কৰিবলৈ আহ্বান জনায় ৷  লগতে প্ৰতিগৰাকী ভোটাৰক নিৰ্দিষ্ট সময়ত ভোটগ্ৰহণ কেন্দ্ৰত উপস্থিত হৈ নিৰ্দ্ধাৰিত সময়ৰ ভিতৰত ভোটদান কৰাৰ বাবেও সকলো ভোটাৰকে অনুৰোধ জনায়🔯