👉আন্তৰ্জাতিক নাৰী দিৱসৰ প্ৰাক্‌ক্ষণত ৩ ব্যতিক্ৰমী যুৱতীক ‘সদিচ্ছা বঁটা, ২০২১’ প্ৰদান

👉গুৱাহাটী প্ৰেছ ক্লাবত বৰ্ণিল কাৰ্যসূচীৰ আয়োজন

👉আন্তৰ্জাতিক নাৰী দিৱসৰ প্ৰাক্‌ক্ষণত ৩ ব্যতিক্ৰমী যুৱতীক ‘সদিচ্ছা বঁটা, ২০২১’ প্ৰদান

গুৱাহাটী, ৭ মার্চ ঃ 

📝আন্তৰ্জাতিক নাৰী দিৱসৰ প্ৰাকক্ষণত স্বেচ্ছাসেৱী সংগঠন ‘সদিচ্ছা’ৰ উদ্যোগত জীৱনৰ বিভিন্ন প্ৰতিকূলতা নেওচি নিজ নিজ ক্ষেত্ৰত উজলি উঠি সমাজলৈ ইতিবাচক বাৰ্তা প্ৰেৰণ কৰা ৩গৰাকী ব্যতিক্ৰমী যুৱতীক ‘সদিচ্ছা বঁটা, ২০২১’ প্ৰদান কৰা হয়৷ দুৰ্ঘটনাৰ ফলত স্নাতকোত্তৰ মহলাত পঢ়ি থকা অৱস্থাতে দৃষ্টি শক্তি হেৰুৱায়ো সমাজৰ দৰিদ্ৰ সীমাৰেখাৰ তলৰ শিক্ষার্থীক শিক্ষা প্ৰদানৰ ক্ষেত্ৰত আগবঢ়োৱা অৱদানৰ বাবে ডিফুৰ কবি-লেখিকা নিবেদিতা ঘোষক প্ৰিয়াংকী হাজৰিকা সোঁৱৰণী ‘সদিচ্ছা সমাজসেৱা বঁটা, ২০২১’ প্ৰদান কৰা হয়৷ একেদৰে ভুল চিকিৎসাৰ ফলতে জীৱনলৈ হুইল চেয়াৰত আবদ্ধ হৈ পৰাৰ পিছতো অসমীয়া সাহিত্যৰ নিৰৱচ্ছিন্ন সাধনা অব্যাহত ৰখা কিশোৰী হিয়া দাসক প্ৰদান কৰা হয় অপৰ্ণা দাস সোঁৱৰণী ‘সদিচ্ছা সাহিত্য বঁটা, ২০২১’৷

আনহাতে মাষ্টাৰ এথলেট ৰূপে ক্ৰীড়া ক্ষেত্ৰত প্ৰদৰ্শন কৰা নৈপুণ্যৰ বাবে দৌৰবিদ দীপামণি ডেকাক একেটা অনুষ্ঠানত আগবঢ়োৱা হয় ৰাজাবালা সোঁৱৰণী ‘সদিচ্ছা ক্ৰীড়া বঁটা, ২০২১’৷ বঁটা হিচাপে অন্যান্য উপহাৰৰ লগতে ১০, ০০০ টকাৰ আৰ্থিক পুৰস্কাৰ আগবঢ়োৱা হয়৷ গুৱাহাটী প্ৰেছ ক্লাবত আয়োজিত এই অনুষ্ঠানত মুখ্য অতিথি ৰূপে অংশগ্ৰহণ কৰা ৰাজ্যৰ কাৰাগাৰ মহাপৰিদৰ্শক বৰ্ণালী শৰ্মাই বন্তি প্ৰজ্বলন কৰি এই গাম্ভীৰ্যপূৰ্ণ অনুষ্ঠানৰ শুভাৰম্ভ কৰে৷ 

অনুষ্ঠানত বিশিষ্ট চিকিৎসক ডাঃ হিতেশ বৰুৱা, জনপ্ৰিয় অভিনেত্ৰী প্ৰস্তুতি পৰাশৰ, জ্যেষ্ঠ সাংবাদিক প্ৰণয় বৰদলৈ, শিক্ষাবিদ ড০ পাৰুল বৰুৱা, উদ্যোগপতি পৱন আগৰৱালাই বিশিষ্ট অতিথি ৰূপে অংশগ্ৰহণ কৰি নাৰী দিৱসৰ বিভিন্ন দিশ বাখ্যা কৰে৷ নাৰী সবলীকৰণ কেৱল শ্ল’গান কৰি নাৰাখি তাক বাস্তৱায়িত কৰিবলৈও তেওঁলোকে আহ্বান জনায়৷ ময়ূৰী দত্তই আঁত ধৰা ‘সদিচ্ছা’ৰ সভাপতি মনালিছা বৰুৱাই উপস্থিত অতিথিসকলক আদৰণি জনায়৷🔯