👉ই ভি এমত বন্দী হ'ল বঙাইগাঁও সমষ্টিৰ ন গৰাকী প্ৰাৰ্থীৰ ভাগ্য

👉ই ভি এমত বন্দী হ'ল বঙাইগাঁও সমষ্টিৰ ন গৰাকী প্ৰাৰ্থীৰ ভাগ্য 

👉৮৬.৪২ শতাংশ ভোটদান 

বঙাইগাঁওঃ ৬ এপ্ৰিলঃ 

📝আজি অনুষ্ঠিত তৃতীয় পৰ্যায়ৰ নিৰ্বাচন ৩২ নং বঙাইগাঁও বিধান সভা সমষ্টিত দুই এটা ঘটনাক বাদ দি প্ৰায় শান্তিপূৰ্ণভাৱে সম্পন্ন হয় ৷ উল্লেখ্য যে পুৱা ৭ বজাৰ পৰা সমষ্টিটোৰ ২৬০ টা ভোটগ্ৰহণ কেন্দ্ৰত আৰম্ভ হোৱা ভোটদান প্ৰক্ৰিয়াত ভোটাৰ ৰাইজৰ বিপুল সহাৰি দেখিবলৈ পোৱা যায় ৷ সমষ্টিটোত বাতৰি লিখা পৰলৈ ৮৬.৪২ শতাংশ ভোটদান  হয় ৷ মুঠ ১,৭৬,৩০৬ গৰাকী ভোটাৰ থকা বঙাইগাঁও বিধান সভা সমষ্টিত এইবাৰ ন গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে ৷ অগপৰ ফণীভূষণ চৌধুৰী, কংগ্ৰেছৰ শংকৰ প্ৰসাদ ৰায় আৰু অজাপৰ দীপু চৌধুৰীৰ উপৰিও সমষ্টিটোৰ পৰা  এন পি পি দলৰ প্ৰভাত বৈষ্ণৱ , ভাৰতীয় গণ পৰিষদৰ সুজিত কুমাৰ ৰায় , পলিটিকেল জাষ্টিচ পাৰ্টিৰ শান্তনু মুখাৰ্জী, ভোটাৰচ পাৰ্টি ইন্টাৰনেচনেলৰ সবেন্দ্ৰ বসুমতাৰী আৰু নিৰ্দলীয় হিচাপে ক্ৰমে কৈলাশ দাস আৰু গৌতম দত্তই প্ৰতিদ্বন্দ্বিতা আগবঢ়াইছে ৷

কিন্তু ইয়াৰ ভিতৰত অগপ ,কংগ্ৰেছ আৰু অজাপৰ বাহিৰে আন দলৰ প্ৰাৰ্থীসকলে ভোটাৰ ৰাইজৰ মাজত কোনো প্ৰভাৱ বিস্তাৰ কৰিবই নোৱাৰিলে ৷ অগপ দলৰ জ্যেষ্ঠ নেতা তথা সমষ্টিটোৰ বিধায়ক ফণীভূষণ চৌধুৰী, কংগ্ৰেছৰ শংকৰ প্ৰসাদ ৰায় আৰু  অজাপৰ প্ৰাৰ্থী দীপু চৌধুৰীয়ে তীব্ৰ প্ৰত্যাহ্বান আগবঢ়াব পাৰিব বুলি ৰাইজৰ মাজত সৰৱ চৰ্চা চলিছিল যদিও শেষ মুহুৰ্তত সেয়া হৈ নুঠা বুলিহে ৰাজনৈতিক পৰ্যৱেক্ষকসকলে মতপোষণ কৰিছে ৷ কিন্তু তিনিওগৰাকী প্ৰাৰ্থীয়ে নিজৰ বিজয় সুনিশ্চিত বুলি দাবী কৰিছে ৷ অৱশ্যে ৰাজনৈতিক পৰ্যৱেক্ষকৰ সমীক্ষা সঠিক হয় নে নহয় সেয়া অহা দুই মেত ফলাফল ঘোষণা হোৱাৰ পিচতহে ওলাই পৰিব ৷ 

ইপিনে সমষ্টিটোত এইবাৰ ২৪ টা ভোটগ্ৰহণ কেন্দ্ৰ মহিলাৰ দ্বাৰা পৰিচালিত হয় ৷ তাৰে মাজত এটা আদৰ্শ ভোটগ্ৰহণ কেন্দ্ৰ হিচাপে গঢ়ি তোলা হয় ৷  এই আদৰ্শ ভোটগ্ৰহণ কেন্দ্ৰটো বঙাইগাঁও বীৰঝৰা উচ্চতৰ মাধ্যমিক বিদ্যালয়ত স্থাপন কৰা হয় ৷ ইয়াত ভোটাৰৰ বাবে সকলো সা- সুবিধাৰ লগতে শিশুৰ মনোৰঞ্জনৰ ব্যৱস্থা , চেল্ফী পইণ্ট আদিৰ ব্যৱস্থা কৰা হয় ৷ ভোটগ্ৰহণ প্ৰক্ৰিয়া সমাপ্ত হোৱাৰ পিচত বিভিন্ন ভোটগ্ৰহণ কেন্দ্ৰৰ ভোটগ্ৰহণকাৰী দলে ইভিএম সহ ইতিমধ্যে বঙাইগাঁও মহাবিদ্যালয়ত স্থাপন কৰা অস্থায়ী ষ্ট্ৰোং ৰূমলৈ কঢ়িয়াই লৈ গৈ আছে ৷ বঙাইগাঁও মহাবিদ্যালয়ৰ এই ষ্ট্ৰোং ৰূমতে অহা ২ মেলৈ ইভিএমসমূহ জমা ৰখা হ'ব ৷ এতিয়া বঙাইগাঁও বিধান সভা সমষ্টিৰ ন গৰাকী প্ৰাৰ্থীৰ ভাগ্য ইভিএম ত বন্দী হৈ ৰ'ল ৷🔯