👉আমাৰ আগত কোনেও প্ৰত্যাহ্বান দাঙি ধৰিব নোৱাৰে , আমাৰ বিজয়ৰ পথ মুকলি আছে

👉বঙাইগাঁৱত নিজৰ ভোটাধিকাৰ সাব্যস্ত কৰি ফণীভূষণ চৌধুৰীৰ দাবী 

👉আমাৰ আগত কোনেও প্ৰত্যাহ্বান দাঙি ধৰিব নোৱাৰে , আমাৰ বিজয়ৰ পথ মুকলি  আছে 

বঙাইগাঁওঃ ৬ এপ্ৰিলঃ

📝মই যোৱা সাতটা কাৰ্যকালৰ বাবে ৰাইজক যি সেৱা আগবঢ়ালো সেই সেৱাৰ মূল্যাংকণ আজি হ'ব আৰু মই ভাবো ৰাইজে সঠিকভাবে দিব ৷ লগতে মই ভাবো যে পুনৰ অহা পাঁচ বছৰলৈ বঙাইগাঁওবাসীয়ে মোক সেৱা আগবঢ়াবলৈ সুবিধা দিব ৷ এই মন্তব্য বঙাইগাঁও বিধান সভা সমষ্টিৰ অগপ বিধায়ক ফণীভূষণ চৌধুৰীৰ ৷ আজি অনুষ্ঠিত অসম বিধান সভাৰ তৃতীয় পৰ্যায়ৰ নিৰ্বাচনৰ ভোটদান কৰি একেৰাহে ৩৫ বছৰ ধৰি বঙাইগাঁও সমষ্টিটো দখল কৰি অহা অগপৰ জ্যেষ্ঠ নেতাগৰাকীয়ে সংবাদ মাধ্যমৰ আগত এই মন্তব্য কৰে ৷ বঙাইগাঁও বিধান সভা সমষ্টিটোৰ পৰা একেৰাহে অষ্টমবাৰৰ বাবে প্ৰতিদ্বন্দ্বিতা কৰা ফণীভূষণ চৌধুৰীয়ে পুৱা আঠমান বজাত ৭২২ গৰাকী ভোটাৰবিশিষ্ট ২১৩ নং বীৰঝৰা ছোৱালী হাইস্কুল ( ব্লক- এ ) ভোটগ্ৰহণ কেন্দ্ৰত উপস্থিত হৈ নিজৰ ভোটাধিকাৰ সাব্যস্ত কৰাৰ পিচত সংবাদ মাধ্যমৰ আগত কয় যে সাতটা কাৰ্যকাল উকলি যোৱাৰ পিচত নিশ্চয়কৈ নিৰ্বাচিত হোৱাৰ পিচত এইবাৰ ৰাইজৰ লগত বহিম আৰু ৰাইজে কি বিচাৰিছে , কেনেধৰণে আগবঢ়াতো বিচাৰিছে এই বিষয়ত আলোচনা - বিলোচনা কৰাৰ অন্তত ৰাইজে যি পৰামৰ্শ দিয়ে সেই মতে আমি আগবাঢ়ি যাম ৷ আনহাতে কংগ্ৰেছৰ শংকৰ প্ৰসাদ ৰায়ে হওক বা অজাপৰ দীপু চৌধুৰীয়ে হওক কোনেও আমাৰ আগত প্ৰত্যাহ্বান দাঙি ধৰিব নোৱাৰে বুলি কৈ আমাৰ বিজয়ৰ পথ মুকলি আছে বুলিও কয় ৷ অগপৰ জ্যেষ্ঠ নেতাগৰাকীয়ে মিত্ৰদলে এইবাৰ কেইখন আসন পাব সেয়া পোনপতিয়াকৈ নকৈ কয় যে এইবাৰো নিশ্চিতভাৱে মিত্ৰজোঁটৰ চৰকাৰখনেই হ'ব ৷ 

অৱশ্যে অগপ নেতাগৰাকীয়ে কয় যে নামনি অসমৰ  যিটো জনগাঁথনি সেই অনুসৰি মহাজোঁটে কিছু আসন পাব ৷ কিন্তু উত্তৰ অভয়াপুৰী , দক্ষিণ অভয়াপুৰী ,বৰপেটা ,চেঙা ,ভৱানীপুৰ , পূব গোৱালপাৰা সমষ্টিবিলাকত আমি অসম গণ পৰিষদ দলে প্ৰাৰ্থিত্ব প্ৰদান কৰিছো ৷ এই সমষ্টিবিলাক যদিও সংখ্যালঘু অধ্যুষিত সমষ্টি তথাপিতো লক্ষ্য কৰিছো যে এইবাৰ সংখ্যালঘু লোকসকলে আমাক নীতিগতভাৱে সমৰ্থন কৰাৰ বাবে আগবাঢ়িছে আৰু আমি এই সমষ্টিকেইটাত ভাল ফল দেখুৱাবলৈ সক্ষম হ'ম ৷ আনহাতে  নিজৰ বিজয়কলৈ কিমান আশাবাদী বুলি সাংবাদিকে সোধাত তেওঁ কয় যে যিদিনা নিৰ্বাচনৰ মনোনয়ন পত্ৰ দাখিল কৰিছিলো সিদিনাই মই সম্পূৰ্ণ আশাবাদী আছিলো ৷ যোৱা সাতটা কাৰ্যকালত যেনেধৰণে ৰাইজৰ সহযোগিতা লাভ কৰিবলৈ সক্ষম হৈছিলো , এইবাৰ তাতোকৈ বেছিহে ৰাইজৰ সহাৰি লাভ কৰিছো ৷ সেয়ে মই ভাবিছো যে বঙইগাঁও সমষ্টিত এইবাৰৰ নিৰ্বাচনতো একপক্ষীয় নিৰ্বাচন ৷ ইপিনে তৃতীয় পৰ্যায়ত মিত্ৰদলে পূৰ্বে দখল কৰি থকা দুই এখন আসন হেৰুৱালগীয়া হ'ব পাৰে যদিও তাৰ বিপৰীতে কেইবাখনো নতুন আসন লাভ কৰিবলৈ সক্ষম হ'ব বুলি কৈ অগপ দলে এইবাৰ পূৰ্বৰ ১৪ খনতকৈ এখন হলেও বেছি আসন লাভ কৰিব বুলি দাবী কৰে ৷🔯