👉বঙাইগাঁও জিলাত ১৪৪ ধাৰা জাৰি

👉বঙাইগাঁও জিলাত ১৪৪ ধাৰা জাৰি 

বঙাইগাঁওঃ ৩ এপ্ৰিলঃ 

📝অহা ৬ এপ্ৰিলত অনুষ্ঠিত হ'ব লগীয়া তৃতীয় পৰ্যায়ৰ বিধানসভা নিৰ্বাচনৰ প্ৰতি লক্ষ্য ৰাখি বঙাইগাঁও জিলাত শান্তি আৰু আইন-শৃংখলা বজাই ৰখাৰ পৰিপ্ৰেক্ষিতত বঙাইগাঁও জিলাৰ অতিৰিক্ত জিলা দণ্ডাধীশ ডঃ চৈয়দ তহিদুৰ ৰহমানে ভাৰতীয় ফৌজদাৰী কাৰ্যবিধি আইনৰ ১৪৪ ধাৰাৰ অধীনত জিলাখনৰ অন্তৰ্গত ৩২ নং বঙাইগাঁও বিধানসভা সমষ্টি, ৩৪ নং উত্তৰ অভয়াপুৰী আৰু ৩৫ নং দক্ষিণ অভয়াপুৰী বিধানসভা সমষ্টিত কেতবোৰ নিষেধাজ্ঞা জাৰি কৰিছে। সেই অনুসৰি অহা ৪ এপ্ৰিলৰ সন্ধিয়া ৬ বজাৰ পিছৰ পৰা প্ৰশাসনৰ আগতীয়া অনুমতি অবিহনে  কোনো ধৰণৰ সভা-সমিতি অনুষ্ঠিত কৰিব নোৱাৰিব৷ সেইদৰে অনুমতিহীন ভাৱে পাঁচ বা তাতোধিক লোকৰ ৰাজহুৱা স্থানত সমাগম নিষিদ্ধ কৰা হৈছে। একেদৰে কোনো লোকে বিপদ সৃষ্টি কৰাৰ আশংকা থকা অস্ত্ৰ-শস্ত্ৰ বা সামগ্ৰী লৈ ফুৰিব নোৱাৰিব। তাৰোপৰি প্ৰশাসনৰ অনুমতি অবিহনে উচ্চস্বৰীয় যন্ত্ৰ বা তেনে ধৰণৰ আহিলা পাতি ব্যৱহাৰতো নিষেধাজ্ঞা আৰোপ কৰা হৈছে। এই নিষেধাজ্ঞা ঘৰে ঘৰে কৰা প্ৰচাৰ অভিযানৰ ক্ষেত্রত প্ৰযোজ্য নহয়। খেলপথাৰ ,বাছ আস্থান , ৰে'লৱে ষ্টেচন, বিয়া, বজাৰ -হাটৰ ক্ষেত্ৰত জন সমাগমৰ  এই নিষেধাজ্ঞা  প্ৰযোজ্য নহ'ব৷ এই নিষেধাজ্ঞা ৪ এপ্ৰিলৰ সন্ধিয়া ৬ বজাৰ পৰা ৭  এপ্ৰিলৰ সন্ধিয়া ৬ বজালৈ  আৰু ভোট গণনা সম্পন্ন হোৱালৈ সমগ্ৰ বঙাইগাঁও জিলাতে বাহাল থাকিব ।🔯