🔯বাৰ্মিজ চুপাৰীৰ চিণ্ডিকেটৰ নায়ক গ্ৰেপ্তাৰ

🔯বাৰ্মিজ চুপাৰীৰ চিণ্ডিকেটৰ নায়ক গ্ৰেপ্তাৰ

🔯বঙাইগাঁও আৰক্ষীৰ জেৰা অব্যাহত

📝বঙাইগাঁওঃঃ ১৯ জুলাইঃ বাৰ্মিজ চুপাৰীৰ চিণ্ডিকেটৰ লগত জড়িত মূল নায়ক আব্দুল হান্নান ওৰফে বাবলুক বঙাইগাঁও আৰক্ষীয়ে গ্ৰেপ্তাৰ কৰিবলৈ সক্ষম হৈছে ৷ উল্লেখ্য যে ৰাজ্যৰ বিভিন্ন ঠাইৰ লগতে পশ্চিম অসমৰ বঙাইগাঁও আৰু চিৰাং জিলাতো দীৰ্ঘদিন ধৰি চলি থকা বাৰ্মিজ চুপাৰীৰ চিণ্ডিকেটৰ বিৰুদ্ধে সংশ্লিষ্ট জিলা দুখনত কিছুদিন পূৰ্বে আৰক্ষীয়ে অভিযান চলাই বৃহৎ পৰিমাণৰ বাৰ্মিজ চুপাৰী জব্দ কৰাৰ লগতে কেবাজনো লোকক আটক কৰিছিল ৷ লগতে আৰক্ষীয়ে এই চিণ্ডিকেটৰ লগত জড়িত মূল নায়কক গ্ৰেপ্তাৰ কৰাৰ বাবে অব্যাহত ৰাখিছিল অনুসন্ধান ৷ ইয়াৰ  মাজতে বঙাইগাঁও আৰক্ষীৰ জালত পৰিল বাৰ্মিজ চুপাৰী চিণ্ডিকেটৰ মাষ্টাৰ মাইণ্ড আব্দুল হান্নান ওৰফে বাবলু। দেওবাৰে নিশা গোলাঘাট জিলাৰ কঁহৰা আৰক্ষী চকীৰ সহযোগত বঙাইগাঁও আৰক্ষীয়ে গ্ৰেপ্তাৰ কৰে কুখ্যাত চুপাৰী মাফিয়া বাবুলক । উল্লেখ্য যে প্ৰায় দুমাহ পূৰ্বে বঙাইগাঁও আৰক্ষীয়ে এএচ ০১ এল চি ১২৭৬ নম্বৰৰ বাৰ্মিজ চুপাৰীভৰ্তি এখন ট্ৰাক জব্দ কৰি বঙাইগাঁও সদৰ আৰক্ষী থানাত ৪৬০/২১ নম্বৰৰ অধীনত ভাৰতীয় দণ্ডবিধি আইনৰ ১২০(বি)/ ৪১৩/৪২০/ ৪৬৮ আৰু ৪৭১ নং ধাৰাত এটি গোচৰ ৰুজু কৰে । উক্ত ট্ৰাকখন জব্দ কৰাৰ পিছতে বঙাইগাঁও আৰক্ষীয়ে জিলাখনৰ বিভিন্ন স্থানৰ পৰা বৃহৎ পৰিমাণৰ বাৰ্মিজ চুপাৰী জব্দ কৰি তদন্ত অব্যাহত ৰাখে।

 উক্ত তদন্তৰ মাজতে দেওবাৰে নিশা বঙাইগাঁও সদৰ থানাৰ সহ ভাৰপ্ৰাপ্ত আৰক্ষী বিষয়া কৃষাণু পাঠকৰ নেতৃত্বত নগৰ উপ পৰিদৰ্শক কুলেন্দ্ৰ হুজুৰীসহ যোৱা আৰক্ষীৰ দলে কঁহৰা আৰক্ষীৰ সহযোগত কুখ্যাত চুপাৰী মাফিয়া আব্দুল হান্নান ওৰফে বাবলুক গ্ৰেপ্তাৰ কৰে। বঙাইগাঁও আৰক্ষীৰ দলে নিশাই চুপাৰী মাফিয়া বাবুলুক গ্ৰেপ্তাৰ কৰি বঙাইগাঁলৈ ৰাওনা হয়। বঙাইগাঁওলৈ অনাৰ পিছত আজি চিকিৎসালয়ত স্বাস্থ্য পৰীক্ষা কৰি আদালতত হাজিৰ কৰি দুদিনৰ বাবে আৰক্ষীৰ জিম্মালৈ আনে ৷ আৰক্ষীয়ে বঙাইগাঁও চহৰৰ সদৰ থানাত ধৃত বাবলুৰ বিৰুদ্ধে ভাৰতীয় দণ্ডবিধি আইনৰ অধীনত  ইতিপূৰ্বে ৰুজু হৈ থকা গোচৰত সোধ- পোছ অব্যাহত ৰাখিছে । অৱশ্যে বঙাইগাঁও আৰক্ষীয়ে ঘটনা সন্দৰ্ভত কোনো তথ্যই সদৰি কৰা নাই। পৰৱৰ্তী সময়ত জিলাখনৰ কোন কোন ছিণ্ডিকেটৰ কাণ্ডাৰী আৰক্ষীৰ জালত পৰে সেয়া হ'ব লক্ষণীয়।🔯