🔯বঙাইগাঁও জিলাৰ খগৰপুৰত ব্ৰয়লাৰ মূৰ্গী নিবলৈ আহি থকা বাহনত লুটপাত দুৰ্বৃত্তৰ

🔯বঙাইগাঁও জিলাৰ খগৰপুৰত ব্ৰয়লাৰ মূৰ্গী নিবলৈ আহি থকা বাহনত লুটপাত দুৰ্বৃত্তৰ 

🔯দুৰ্বৃত্তই  কাঢ়ি নিলে নগদ ধন, ম'বাইল ফোন 

📝বঙাইগাঁওঃ ২০ জুলাইঃঃ বঙাইগাওঁ জিলাৰ বইটামাৰী অঞ্চলৰ খগৰপুৰ পাহাৰৰ মাজৰ ৰাষ্ট্ৰীয় ঘাইপথত আজি পুৱা ৫:৪৫ মান বজাত ব্ৰয়লাৰ মুৰ্গী কঢ়িওৱাত ব্যৱহৃত এখন বাহনত থকা তিনিজন আৰোহীক আক্ৰমণ কৰি দুৰ্বৃত্তই তেওঁলোকৰ পৰা নগদ ধন আৰু মবাইল ফোন লুটপাত কৰি নিয়ে । ঘটনা সন্দৰ্ভত জানিব পৰা মতে, এ এছ ১৯ এ চি  ৪২২৭ নম্বৰৰ ব্ৰয়লাৰ মূৰ্গী কঢ়িওৱাত ব্যৱহৃত বাহন এখনত তিনিজন যুৱকে অভয়াপুৰীৰ পৰা বইটামাৰীলৈ ব্ৰয়লাৰ ফাৰ্মৰ মূৰ্গী নিবলৈ আহি আছিল । ব্ৰয়লাৰ মূৰ্গী কঢ়িওৱা বাহনখনত থকা যুৱকে জনোৱা মতে, বাহনখনে খগৰপুৰ পাহাৰৰ কাষৰ ৰাষ্ট্ৰীয় ঘাইপথ পোৱাৰ সময়তে পিছফালৰ পৰা অনুসৰণ কৰি আহি থকা নম্বৰপ্লেট বিহীন বলেৰ' পিক আপ ভেন বাহনে  অতিক্ৰম কৰি বাট আগচি ধৰে আৰু উক্ত বাহনখনৰ পৰা সাতজনীয়া দুৰ্বৃত্তৰ দল নামি আহি ব্ৰয়লাৰ কঢ়িওৱা বাহনখনত থকা তিনিওজন যুৱকক ডেগাৰ-খুকুৰী আদি উলিয়াই ভাবুকি দিয়াৰ লগতে এজনক মুখত প্ৰহাৰ কৰে । তাৰ পিছত যুৱক তিনিজনক তেনেদৰে ভয়-ভাবুকি দি তেওঁলোকৰ পৰা নগদ পঁচিশ হাজাৰ ধন আৰু চাৰিটা ম'বাইল ফোন লুটপাত কৰি নিয়ে বুলি জানিবলৈ দিয়ে ভুক্তভোগী যুৱক কেইজনে ।  পিছত যুৱক তিনিজনে বাহনখন এৰি থৈ কোনোমতে প্ৰাণ বচাই পাহাৰৰ নামনিত ৰাষ্ট্ৰীয় ঘাইপথৰ কাষতে থকা ৰেলৱে নিৰ্মানকাৰী সংস্থাৰ এটা কেম্পত আশ্ৰয় লয় আৰু আৰক্ষীক যোগাযোগ কৰে । ইফালে দুৰ্বৃত্ত কেইজনে ব্ৰয়লাৰৰ বাহনখন পাহাৰৰ নামনিৰ বৰখাতাৰ ৰাষ্ট্ৰীয় ঘাইপথত আনি থৈ নিজৰ বাহনত উত্তৰ শালমাৰাৰ দিশে গুচি যায় বুলি ভুক্তভোগী যুৱক কেইজনে জানিবলৈ দিয়ে । কিছু সময় পিছতে বইটামাৰী আৰক্ষী ঘটনাস্থলীত উপস্থিত হৈ তদন্ত আৰম্ভ কৰে । পুৱাৰ ভাগতে এনেদৰে ৰাষ্ট্ৰীয় ঘাইপথত লুটপাত সংঘটিত হোৱা ঘটনাই চাঞ্চল্যৰ সৃষ্টি কৰিছে । উল্লেখ্য যে, পশ্চিম অসমত কিছুদিন ধৰি চুৰি-ডকাইটিৰ ঘটনা বৃদ্ধি পাই থকাত জনগণ চিন্তিত হৈ পৰিছে ।🔯