🔯বঙাইগাঁৱত দেশভক্তি দিৱস উদযাপন

🔯বঙাইগাঁৱত দেশভক্তি দিৱস উদযাপন

🔯আজিৰ দিনটোত এনে মহৎ ব্যক্তিৰ কৰ্মময় জীৱনৰ পৰা কি কি শিকিব আৰু গ্ৰহণ কৰিব পাৰো সেই বিষয়েহে চৰ্চা কৰিব লাগে - ডাঃ এম এচ লক্ষ্মীপ্ৰিয়া

🔯তৰুণৰাম ফুকনৰ নামটো সকলোৰে পৰিচিত ,কিন্তু তেওঁৰ বৰঙণিৰ বিষয়ে বিশেষ আলোচনা চকুত নপৰে- ডঃ গগণ শৰ্মা

📝বঙাইগাঁওঃ ২৮ জুলাইঃ অসম চৰকাৰৰ কেবিনেটৰ সিদ্ধান্ত অনুসৰি আজি দেশভক্ত তৰুণৰাম ফুকনৰ ৮২ সংখ্যক মৃত্যু বাৰ্ষিকী বঙাইগাঁও জিলা প্ৰশাসনৰ সহযোগত আৰু জিলা তথ্য আৰু জনসংযোগ বিষয়াৰ কাৰ্যালয়ৰ উদ্যোগত দেশভক্তি দিৱস হিচাপে উদযাপন কৰা হয়। এই উপলক্ষে বঙাইগাঁও জিলা উপায়ুক্ত কাৰ্যালয়ৰ  সভাকক্ষত পুৱা ১১ বজাত অনুষ্ঠিত সভাত উপায়ুক্ত ডা: এম এচ লক্ষ্মী প্ৰিয়াই সন্মানীয় অতিথি হিচাপে উপস্থিত থাকি দেশভক্ত তৰুণৰাম ফুকনৰ প্ৰতিচ্ছবিত বন্তি প্ৰজ্বলন কৰি শ্ৰদ্ধাঞ্জলি জ্ঞাপনেৰে অনুষ্ঠানৰ শুভাৰম্ভ কৰে ৷ একেদৰে অনুষ্ঠানত উপস্থিত থকা বিষয়া-কৰ্মচাৰীয়েও দেশভক্ত তৰুণ ৰাম ফুকনৰ প্ৰতিচ্ছৱিত শ্ৰদ্ধাঞ্জলি যাঁচে। সভাত বঙাইগাঁও জিলাৰ স্বাধীনতা যুঁজাৰু প্ৰয়াত ৰোহিত দাসৰ পুত্ৰ কল্যাণ দাস আৰু প্ৰয়াত পঞ্চানন বৰুৱাৰ অবিবাহিত কন্যা ৰেনুকা বৰুৱাও নিমন্ত্ৰিত অতিথি হিচাপে উপস্থিত থাকে ৷ ইপিনে সন্মানীয় অতিথিৰ ভাষণত জিলা উপায়ুক্তগৰাকীয়ে দেশভক্ত তৰুণৰাম ফুকনৰ জীৱনৰ ওপৰত আলোকপাত কৰে ৷ তেওঁ কয় যে স্বাধীনতা যুঁজাৰু, অসম সাহিত্য সভাৰ গোৱালপাৰা অধিৱেশনৰ সভাপতি, সুবক্তা, আগশাৰীৰ নেতা,আৰ্ল ল' কলেজৰ প্ৰাক্তন অধ্যাপক তৰুণৰাম ফুকন স্বদেশ প্ৰেমৰ বাবে দেশভক্ত উপাধিৰে জনপ্ৰিয়। তেওঁ আৰু কয় যে নিজৰ ৰাজ্যৰ কাৰণে , নিজৰ ৰাষ্ট্ৰৰ কাৰণে, নিজৰ ভাষাৰ কাৰণে যি ব্যক্তিৰ অৱদান আছে তেনে ব্যক্তিয়েহে আনৰ সুখৰ কাৰণে কাম কৰিব পাৰে ৷ স্বাধীনতা আন্দোলনৰ সময়ত তৰুণৰাম ফুকন মহাত্মা গান্ধীৰ এজন বিশ্বাসী বাৰ্তাবাহক আছিল ৷ এনেকুৱা এজন বহুধা ব্যক্তিত্বৰ সুসন্তান পাই অসম সৌভাগ্যশালী ৰাজ্য। 

তেওঁ লগতে কয় যে আজিৰ দিনটোত আমি আচলতে আমাৰ নিজৰ জীৱনত যি যি কাম কৰিম সেই কামসমূহৰ কাৰণে এনে মহৎ ব্যক্তিৰ কৰ্মময় জীৱনৰ পৰা কি কি শিকিব আৰু গ্ৰহণ কৰিব পাৰো সেই বিষয়েহে চৰ্চা কৰিব লাগে ৷ তেওঁ তৰুণৰাম ফুকন আনৰ দুখত দুখী আৰু আনৰ সুখত সুখী হ'ব পৰা ব্যক্তি আছিল বুলিও কয় ৷ আনহাতে জিলা প্ৰশাসনৰ বিষয়া- কৰ্মচাৰীসকলৰ কাম- কাজ তথা ব্যৱহাৰ পাতি সম্পৰ্কতো তেওঁ আলোকপাত কৰে। ইপিনে সভাত উপস্থিত থকা বঙাইগাঁও বীৰঝৰা কন্যা মহাবিদ্যালয়ৰ অধ্যক্ষ ডঃ গগণ শৰ্মাই নিজৰ বক্তব্যত কয় যে  অসম চৰকাৰে এটা অতি গুৰুত্বপূৰ্ণ সিদ্ধান্ত লৈ দেশভক্তি দিৱস উদযাপনৰ কাৰণে যি সিদ্ধান্ত লৈছে সেই সিদ্ধান্তই এই কথাকে প্ৰতীয়মান কৰিছে যে অসমৰ প্ৰতি তৰুণৰাম ফুকনৰ যি বৰঙণি সেই বৰঙণি অসমীয়া জাতিয়ে মনত ৰখা উচিত আৰু তেওঁৰ বৰঙণিক আমি স্বীকৃতি দিয়া উচিত ৷ সেইদৰে তৰুণৰাম ফুকনৰ নামটো সকলোৰে পৰিচিত ,কিন্তু তেওঁৰ বৰঙণিৰ বিষয়ে বিশেষ আলোচনা চকুত নপৰে ৷ তেওঁৰ আমাৰ ৰাজ্যখনলৈ গুৰুত্বপূৰ্ণ বৰঙণি বুলি কলে সমান্তৰালকৈ দুটা বৰঙণিৰ বিষয়ে ক'ব পাৰি ৷ এটা হ'ল যি স্বাধীনতা আন্দোলন গঢ়ি উঠিছিল সেই আন্দোলনত তেওঁৰ সক্ৰিয় ভূমিকা আছিল আৰু সমান্তৰালভাবে সমাজখনত দেখা দিয়া যি অন্ধবিশ্বাস আৰু কু -সংস্কাৰ সেইবোৰৰ পৰা আমাৰ জাতিটোক তথা ৰাজ্যখনক কেনেকৈ মুক্ত কৰিব পাৰি সেইক্ষেত্ৰত তেওঁ এটা সক্ৰিয় ভূমিকা গ্ৰহণ কৰিছিল ৷ 

এই দুটা বৰঙণিয়ে হয়তো আটাইতকৈ গুৰুত্বপূৰ্ণ বৰঙণি যাৰ বাবে তৰুণৰাম ফুকনক অসমীয়া জাতিয়ে চিৰদিনৰ বাবে কৃতজ্ঞতাৰে সোঁৱৰণ কৰিব লাগে ৷ তেওঁৰ আন এটা গুণ আছিল বাগ্মিতা ৷ তেওঁ প্ৰায় ছয়টা ভাষা ধুনীয়াকৈ ক'ব পাৰিছিল ৷ গতিকে এনে ধৰণৰ গুণেৰে গুণাম্বিত এজন ব্যক্তি আজি ৰাজ্যখনৰ মানুহৰ মাজত কিছু পৰিমাণে উপেক্ষিত হৈ আছে ৷ অসম চৰকাৰে এই সিদ্ধান্ত গ্ৰহণ কৰি নিশ্চিতভাবে তেওঁৰ অৱদানক স্বীকৃতি দিছে আৰু তেওঁৰ অৱদানক আমি যে সন্মুখত ৰাখি আগবাঢ়ি যোৱাৰ প্ৰয়োজন আছে ,সেই কথাটো আমাক বুজাব খুজিছে বুলি কৈ চৰকাৰৰ তাৰ বাবে ধন্যবাদ জনায় ৷ বঙাইগাঁও জিলা তথ্য আৰু জনসংযোগ বিষয়া বিনু ৰাণী ৰাজবংশীয়ে আঁত ধৰা সভাত  স্বাধীনতা যুঁজাৰুৰ পুত্ৰ কল্যাণ দাসেও বক্তব্য ৰাখে। উল্লেখ্য যে বঙাইগাঁও জিলাৰ উন্নয়ন আয়ুক্ত ভাস্কৰ দাস, অতিৰিক্ত উপায়ুক্ত নৱজ্যোতি ওজা আৰু পংকজ চমুৱা, সদৰ মহকুমাধিপতি , সহকাৰী আয়ুক্তসকলৰ লগতে জিলা প্ৰশাসনৰ আন আন বিষয়া-কৰ্মচাৰীসকল তথা গ্ৰেটাৰ বঙাইগাঁও প্ৰেছ ক্লাৱৰ সাংবাদিকসকলৰ উপস্থিতিত আজিৰ দেশভক্তি দিৱস উদযাপন কৰা হয়।🔯