🔯বঙাইগাঁৱত পুৱাই ঘৰৰ চালৰ ওপৰত যুৱকৰ নাটকীয় দৃশ্য

🔯বঙাইগাঁৱত পুৱাই ঘৰৰ চালৰ ওপৰত যুৱকৰ নাটকীয় দৃশ্য 

🔯আমোদ যোগালে বহুতকে 

📝বঙাইগাঁওঃ ১৮ জুলাইঃ বঙাইগাঁও চহৰত আজি এঘৰ পৰিয়ালৰ টিনৰ ঘৰৰ চালৰ ওপৰত যুৱক এজনৰ এক নাটকীয় দৃশ্যই আমোদ যোগায় বহুতকে ৷ ঘটনাটো পুৱা প্ৰায় ৫ বজাৰ পৰা আৰম্ভ হয় ৷ উল্লেখ্য যে চহৰখনৰ কবৰস্থানৰ ওচৰত সংঘটিত হয় এই ঘটনা ৷ ঘটনা অনুসৰি কবৰস্থানৰ ওচৰৰ এটি ঘৰৰ টিনৰ চালৰ ওপৰত দেখা গৈছিল যুৱক এজনক ৷ প্ৰাতঃভ্ৰমণত যোৱা লোকসকলে প্ৰত্যক্ষ কৰে এই দৃশ্য ৷ এনে অৱস্থাত এজন দুজনকৈ অগণন লোক উপস্থিত হয় এই দৃশ্য প্ৰত্যক্ষ কৰিবলৈ ৷ সকোলোৱে চোৰ বুলিই সন্দেহ কৰিছিল যুৱকজনক ৷ তলৰ পৰা লোকসকলে যুৱকজনক ওপৰৰ পৰা নামি আহিবলৈ কয় যদিও যুৱকজনে কোনো কথা নুশুনি ওপৰতে থাকে ৷ পিছত খবৰ দিয়া হ'ল আৰক্ষীক ৷ আৰক্ষীয়ো ঘটনা স্থলীত উপস্থিত হ'ল ৷ কিন্তু যুৱক জন  আৰক্ষীকো সহাৰি জনোৱা নাছিল আৰু পলায়ন কৰাৰ চেষ্টাও কৰা নাছিল ৷ পিছত আৰক্ষীয়ে টিনৰ চালত উঠি যুৱক জনক তলত নমোৱাৰ চেষ্টা চলায় যদিও যুৱক জনে কিন্তু নিজৰ সিদ্ধান্তত অটল থাকি তেওঁ চালৰ ওপৰত বহিয়েই থাকে ৷ ইয়াৰ পাছত আৰক্ষী আৰু যুৱক জনৰ মাজত এক প্ৰকাৰ যুদ্ধ সদৃশ পৰিস্থিতিৰ সৃষ্টি হয় ৷ আৰক্ষীৰ দলে অৱশেষত যুৱকজনক হাত আৰু ভৰিত ৰছিৰে বান্ধি তলত নমায় ৷ যুৱক জনক তলত নমোৱাৰ পিছত লৈ যোৱা হয় উত্তৰ বঙাইগাঁও আৰক্ষী পহৰা চকীত ৷ ইয়াতে আৰক্ষীয়ে তেওঁৰ পৰিচয় বিচাৰে যদিও যুৱক জনৰ পৰা সঠিক পৰিচয় উদ্ধাৰ কৰিবলৈ সক্ষম নহ'ল আৰক্ষীয়ে ৷ উল্লেখ্য যে যুৱক জনে এটা সময়ত পানী খোৱাৰ ছলনাৰে আৰক্ষী পহৰা চকীৰ পৰা পলায়ন কৰা বুলিও জানিব পৰা যায়৷ পিছত আৰক্ষীয়ে যুৱক জনক বঙাইগাঁও স্বাগত হাস্পতালৰ পিছফালত লুকাই থকা অৱস্থাত পুনৰ কৰায়ত্ত কৰে ৷ ইপিনে যুৱক জনক চিনি পোৱা এজন ব্যক্তিয়ে আৰক্ষীক জনোৱা মতে যুৱক জন মানসিক ৰোগত আক্ৰান্ত ৷ যুৱক জনৰ ঘৰ বঙাইগাঁৱৰ ঢলাপুখুৰীত ৷ পিছত যোগাযোগ কৰাত উত্তৰ বঙাইগাঁও আৰক্ষী পহৰা চকীত উপস্থিত হয় যুৱক জনৰ পৰিয়ালৰ লোক ৷ আৰক্ষীয়ে যুৱক জনক পৰিয়ালৰ লোকক চমজাই দিয়ে যদিও যুৱকজনে আৰক্ষী পহৰা চকীৰ পৰা যাবলৈ মান্তি নহয় ৷ অৱশেষত বহু চেষ্টা চলোৱাৰ পিছত পৰিয়ালৰ লোকে যুৱক জনক আৰক্ষী থানাৰ পৰা লৈ যাবলৈ সক্ষম হয় ৷🔯