🔯অসমৰ মুখ্যমন্ত্ৰী তথা পৰিয়ালৰ ভূমি কেলেংকাৰীৰ তদন্তৰ দাবীত বঙাইগাঁৱত কংগ্ৰেছৰ প্ৰতিবাদী কাৰ্যসূচী ৰূপায়ণ 🔯

🔯অসমৰ মুখ্যমন্ত্ৰী তথা পৰিয়ালৰ ভূমি কেলেংকাৰীৰ তদন্তৰ দাবীত বঙাইগাঁৱত কংগ্ৰেছৰ প্ৰতিবাদী কাৰ্যসূচী ৰূপায়ণ 

🔯ৰাজ্যপাললৈ স্মাৰক পত্ৰ প্ৰেৰণ

🔯আমি নিবিচাৰো যে অসমৰ মুখ্যমন্ত্ৰীয়ে যিয়ে নিজে মাটিৰ দালাল বিচাৰি ফুৰিছে তেওঁৰ নাম মাটিৰ দালালী আৰু কেলেংকাৰীত জড়িত হওক - অপূৰ্ব কুমাৰ ভট্টাচাৰ্য

📝বঙাইগাঁওঃ ৯ ফেব্ৰুৱাৰীঃ অসমৰ মুখ্যমন্ত্ৰী তথা পৰিয়ালৰ ভূমি কেলেংকাৰীৰ গুৱাহাটী উচ্চ ন্যায়ালয়ৰ কৰ্মৰত ন্যায়াধীশৰ দ্বাৰা তদন্তৰ দাবীত আজি বঙাইগাঁৱত কংগ্ৰেছ দলে এক প্ৰতিবাদী কাৰ্যসূচী ৰূপায়ণ কৰে ৷ বঙাইগাঁও জিলা কংগ্ৰেছ কমিটিৰ উদ্যোগত ৰূপায়ণ কৰা প্ৰতিবাদী কাৰ্যসূচীত অসম প্ৰদেশ কংগ্ৰেছ কমিটিৰ প্ৰশাসনিক সাধাৰণ সম্পাদক তথা মুখপাত্ৰ অপূৰ্ব কুমাৰ ভট্টাচাৰ্যই পৰ্যবেক্ষক হিচাপে উপস্থিত থাকি নেতৃত্ব দিয়ে ৷ প্ৰতিবাদী কাৰ্যসূচীত প্ৰদেশ কংগ্ৰেছৰ মুখপাত্ৰ ৰাকেশ চক্ৰবৰ্তীও উপস্থিত থাকে ৷ উল্লেখ্য যে প্ৰতিবাদী কাৰ্যসূচীৰ অংশ হিচাপে কংগ্ৰেছ নেতা- কৰ্মীসকলে চহৰৰ মাজেৰে এক প্ৰতিবাদী সমদল উলিয়ায় ৷ জিলা কংগ্ৰেছ কাৰ্যালয় ৰাজীৱ ভৱনৰ পৰা উলিওৱা প্ৰতিবাদী সমদল বীৰঝৰা কন্যা মহাবিদ্যালয়, বীৰঝৰা উচ্চতৰ মাধ্যমিক বিদ্যায়ল তথা বীৰঝৰা পাব্লিক লাইব্ৰেৰীৰ সন্মুখেৰে আহি চহৰৰ মুল পথেৰে গৈ জিলা উপায়ু্ক্ত কাৰ্যালয়ত উপস্থিত হয় আৰু প্ৰতিবাদ সাব্যস্ত কৰে ৷ সমদলত অংশগ্ৰহণ কৰাসকলে হাতে হাতে বেনাৰ আৰু প্লেকাৰ্ডলৈ বিজেপি চৰকাৰ হায় হায়, অসমৰ মুখ্যমন্ত্ৰীৰ পৰিয়ালৰ ভূমি কেলেংকাৰীৰ তদন্ত দিয়ক, অসম চৰকাৰ হায় হায়, জাতিৰ ভেটি- মাটি দৰিদ্ৰজনক ওভতাই দিয়ক, হিমন্ত বিশ্ব গ'বেক,  হিমন্ত বিশ্ব হুচিয়াৰ, হিমন্ত বিশ্বৰ দালালী বন্ধ কৰক, মাটিৰ দালালী কৰা হিমন্ত বিশ্ব হায় হায়, বিজেপি গ' বেক আদি বিভিন্ন শ্লোগান দি গোটেই পথচোৱা মুখৰিত কৰি তোলে ৷ কংগ্ৰেছ কৰ্মীসকলে জিলা উপায়ুক্ত কাৰ্যালয়ৰ সন্মুখত প্ৰতিবাদী কাৰ্যসূচী ৰূপায়ণ কৰাৰ লগতে জিলা উপায়ুক্তৰ জৰিয়তে অসমৰ ৰাজ্যপাললৈ বুলি এখন স্মাৰক পত্ৰও প্ৰেৰণ কৰে ৷ অসম প্ৰদেশ কংগ্ৰেছ কমিটিৰ পৰ্যবেক্ষক,  জিলা কংগ্ৰেছৰ সভাতি - সাধাৰণ সম্পাদক, জিলা মহিলা কংগ্ৰেছৰ সভানেত্ৰী, জিলা যুৱ কংগ্ৰেছৰ সভাপতি, জিলা সেৱাদলৰ সভাপতি আৰু এন এছ ইউ আইৰ উত্তৰ অভয়াপুৰী বিধান সভা সমষ্টিৰ সভাপতি আদিয়ে স্বাক্ষৰ কৰা স্মাৰক পত্ৰত আৰ বি এছ ৰিয়েল্টৰ্ছ প্ৰাইভেট লিমিটেড আৰু অসমৰ মুখ্যমন্ত্ৰী ডঃ হিমন্ত বিশ্ব শৰ্মাৰ পৰিয়ালৰ দ্বাৰা সংঘটিত কৰা ভূমি কেলেংকাৰীৰ বিৰুদ্ধে গুৱাহাটী উচ্চ ন্যায়ালয়ৰ এগৰাকী ন্যায়াধীশৰ জৰিয়তে তদন্ত কৰিবলৈ অসমৰ ৰাজ্যপালৰ ওচৰত দাবী উত্থাপন কৰিছে ৷

ইপিেনে প্ৰতিবাদী কাৰ্যসূচীত উপস্থিত থকা অসম প্ৰদেশৰ পৰ্যবেক্ষক অপূৰ্ব কুমাৰ ভট্টাচাৰ্যই সংবাদ মাধ্যমৰ আগত কয় যে অসম প্ৰদেশ কংগ্ৰেছ কমিটিয়ে ৰাজ্যখনত সৰ্বকালৰ সৰ্ববৃহৎ কেলেংকাৰীত মুখ্যমন্ত্ৰীৰ আৰু তেওঁৰ পৰিবাৰ তথা পৰিয়ালৰ নাম সাঙোৰ খোৱা বিষয়টোৰ এক ন্যায়িক তদন্ত বিচাৰিছে ৷ ৰাজ্যখনৰ মুখ্যমন্ত্ৰী ডঃ হিমন্ত বিশ্ব শৰ্মাই আৰু তেওঁৰ পৰিবাৰ পৰিচালনাধীন পৰিয়াল জড়িত থকা আৰ বি এছ ৰিয়েল্টৰ্ছ নামৰ এটা প্ৰতিষ্ঠানৰ নামলৈ ২০০৬ চনত উত্তৰ গুৱাহাটী ৰাজহ চক্ৰ এলেকাৰ দুটা প্ৰতিষ্ঠানৰ নামত যি চৰকাৰী মাটি আবণ্টন দিয়া হৈছিল সেই মাটি কেনেকৈ আহিল ? ইয়াৰে এটা মৎস্য উৎপাদনৰ সৈতে জড়িত আৰু এটা স্কীল ডেভেলপমেণ্টৰ সৈতে জড়িত আছিল ৷ এই প্ৰতিষ্ঠান দুটাৰ নামত আৱণ্টন দিয়া ১৭ বিঘা মাটি কেনেকৈ মুখ্যমন্ত্ৰীৰ পৰিবাৰ নিয়ন্ত্ৰণাধীন আৰ বি এছ ৰিয়েল্টৰ্ছ ৰ নামলৈ আহিল বুলি প্ৰশ্ন উত্থাপন কৰে ? একে সময়তে ২০০৯ চনত পলাশবাৰী ৰাজহ চক্ৰ এলেকাৰ বঙৰা গাঁৱৰ ভূমিহীন কৃষকৰ নামত চৰকাৰী প্ৰায় ১২ বিঘা চিলিং মাটি ভূমিহীন লোকক দিয়া হৈছিল ৷ অৰ্থাৎ মুঠ ২৯ বিঘা ৯ লেচা চৰকাৰী মাটি মুখ্যমন্ত্ৰী, তেওঁৰ পৰিবাৰ, তেওঁৰ পৰিয়াল আৰু তেওঁৰ জনৈক কোনোবা ভাট্টাচাৰ্জী, ধনুকা জড়িত থকা ব্যক্তিৰ দ্বাৰা এই যে বৃহৎ ভূমি কেলেংকাৰীৰ অভিযোগ আমি উত্থাপন কৰিছো মুখ্যমন্ত্ৰীয়ে কিয় তাৰ বিৰুদ্ধে কোনো মন্তব্য কৰা নাই? অসম প্ৰদেশ কংগ্ৰেছ কমিটিৰ সভাপতি ভূপেন বৰাই ৮ জানুৱাৰীত চৰকাৰক প্ৰত্যাহ্বান জনাইছিল যে এটা ৰাষ্ট্ৰীয় সংবাদ মাধ্যম আৰু এটা ৰাজ্যৰ সংবাদ মাধ্যমে প্ৰকাশ কৰা এই তথ্য সমৃদ্ধ বাতৰিৰ এটা স্পষ্টিকৰণ লাগে ৷ আজিলৈকে চৰকাৰে স্পষ্টিকৰণ দিয়া নাই ৷ অসম প্ৰদেশ কংগ্ৰেছ কমিটিয়ে যোৱা ১০ জানুৱাৰীৰ পৰা মাহজোৰা জিলাৰ সদৰে সদৰে প্ৰতিবাদী কাৰ্যসূচী ৰূপায়ণ কৰি আহিছো ৷ আমি শান্তিপূৰ্ণভাৱে প্ৰতিবাদী সমদল কৰি জিলা উপায়ুক্তক এখন স্মাৰকপত্ৰ দিম, য'ত ৰিণিকী ভূঞা শৰ্মা নেতৃত্বাধীন আৰ বি এছ ৰিয়েল্টৰ্ছৰ দ্বাৰা যি ২৯ বিঘা ৯ লেচা মাটি আত্মসাৎ কৰা হৈছে, সেই আত্মসাতৰ এক ন্যায়িক তদন্ত বিচাৰিছো ৷ এই স্মাৰকপত্ৰ জিলা উপায়ুক্তৰ জৰিয়তে অসমৰ ৰাজ্যপাললৈ প্ৰদান কৰা হ'ব ৷ আমাৰ ৰাজ্যপাললৈ আবেদন তেওঁ উচ্চ ন্যায়ালয়ৰ কৰ্মৰত ন্যায়াধীশৰ জৰিয়তে এক তদন্ত কৰক আৰু তদন্ত কৰি ইয়াৰ সত্যসত্যতা প্ৰমাণ কৰক  ৷ 

আমি নিবিচাৰো যে অসমৰ মুখ্যমন্ত্ৰীয়ে যিয়ে নিজে মাটিৰ দাদাল বিচাৰি ফুৰিছে তেওঁৰ নাম মাটিৰ দালালী আৰু কেলেংকাৰীত জড়িত হওক ৷ সাধাৰণ খাতি খোৱা এজাহাৰকাৰীক গ্ৰেপ্তাৰ কৰা চৰকাৰখনৰ মুখ্যমন্ত্ৰীৰ বিৰুদ্ধে ইমান অভিযোগ আহিছে, পৰিয়ালৰ বিৰুদ্ধে ইমান অভিযোগ আহিছে , অলপ দুখ পাইছো আৰু এনে অভিযোগ অহাতো নিবিচাৰো ৷ সেই কাৰণে তেওঁৰ সন্তানটোৰ নাম প্ৰকাশ কৰাৰ পৰা বিৰত আছো  ৷ কিন্তু এইটোও এটা আশ্বৰ্যজনক কথা যে ১৭ বছৰ বয়সত ১৮ টা কোম্পানীৰ মালিক হ'ল কেনেকৈ? এয়াই  দুৰ্নীতিৰ বিৰুদ্ধে সহনশীল নীতি নেকি? নে মে খাউংগা না খানে ডুংগা কোনোটো নীতিত পৰে বুজিয়ে পোৱা নাই ? গতিকে আমাৰ দাবী মহামান্য ৰাজ্যপালে গুৱাহাটী উচ্চ ন্যায়ালয়ৰ এগৰাকী কৰ্মৰত ন্যায়াধীশৰ জৰিয়তে এক তদন্ত কৰি এই ২৯ বিঘা ৯ লেচা মাটি যি আৰ বি এছ ৰিয়েল্টৰ্ছ আত্মাসাৎ কৰিছে, চৰকাৰী চিলিং আইন, চৰকাৰী ভূমি আইন উলংঘা কৰি আত্মাসাৎ কৰিছে ইয়াৰ এক ন্যায়িক তদন্ত হওক ৷ প্ৰতিবাদী কাৰ্যসূচীত  উত্তৰ অভয়াপুৰী বিধান সভা সমষ্টিৰ বিধায়ক আব্দুল বাতেন খণ্ডকাৰ, জিলা কংগ্ৰেছৰ সভাপতি মৃণাল অধিকাৰী, মহিলা কংগ্ৰেছৰ সভানেত্ৰী সাৰদা ৰায় চৌধুৰী, অলম প্ৰদেশ কংগ্ৰেছৰ সম্পাদক জ্যোতিৰ্ময় বৈশ্যকে ধৰি কংগ্ৰেছ নেতা তথা কৰ্মীসকলে অংশগ্ৰহণ কৰে ৷🔯