🔯পৌৰসভা নিৰ্বাচনৰ পিচত আঞ্চলিকতাবাদৰ উত্থান হ'ব - ফনীভূষণ চৌধুৰী🔯

🔯পৌৰসভা নিৰ্বাচনৰ পিচত আঞ্চলিকতাবাদৰ উত্থান হ'ব - ফনীভূষণ চৌধুৰী🔯

🔯আমি মানৱ সেৱা কৰিবলৈ অসম গণ পৰিষদ দলটো আগবাঢ়ি আহিছো🔯

📝বঙাইগাঁওঃ ২৭ ফেব্ৰুৱাৰীঃ পৌৰসভা নিৰ্বাচনৰ পিচত আঞ্চলিকতাবাদৰ উত্থান হ'ব ৷ এই মন্তব্য কৰিছে বঙাইগাঁৱৰ অগপ বিধায়ক ফনীভূষণ চৌধুৰীয়ে ৷ দেওবাৰে পৌৰসভা নিৰ্বাচনৰ প্ৰচাৰ সভাত অংশগ্ৰহণ কৰি সংবাদ মাধ্যমৰ আগত এই কথা ব্যক্ত কৰে ৷বিধায়কগৰাকীয়ে কয় যে অসম গণ পৰিষদ দলে দলটোক শক্তিশালী কৰাৰ বাবে ইতিমধ্যে বিভিন্ন ধৰণৰ কাৰ্যসূচী প্ৰস্তুত কৰিছে ৷ লগতে দলে সদস্যভৰ্তিৰ কাৰ্যসূচীও লৈছে ৷ আমি ভাৱো যে সদস্যভৰ্তিৰ জৰিয়তে দলটোক শক্তিশালী কৰিব পৰা যাব আৰু তাৰ বাবে আমি এটা ৰণকৌশল প্ৰস্তুত কৰি উলিয়াইছো ৷ উল্লেখ্য যে বিধায়কগৰাকীয়ে এইকেইদিন পৌৰসভা নিৰ্বাচনকলৈ ব্যস্ত হৈ পৰা পৰিলক্ষিত হৈছে ৷ অগপৰ দখলত থকা বঙাইগাঁও পৌৰসভাখন পুনৰ নিজৰ দখলত ৰখাৰ বাবে উঠি পৰি লাগিছে বিধায়কগৰাকীৰ লগতে দলীয় নেতা- কৰ্মীসকল ৷ বিগত পৌৰসভা নিৰ্বাচনত ২০ টা ৱাৰ্ড নিজৰ দখলত ৰখা অগপৰ বাবে এইবাৰ বাধাৰ প্ৰাচীৰ হিচাপে ঠিয় দিছে মিত্ৰ দল বিজেপি ৷ চৰকাৰত মিত্ৰতা থাকিলেও বঙাইগাঁও পৌৰসভা নিৰ্বাচনত দুয়োটা দলে অকলে অকলে প্ৰতিদ্বন্দ্বিতা আগবঢ়াইছে ৷ বিজেপি দলেও উঠি - পৰি লাগিছে পৌৰসভা দখলৰ বাবে ৷ দলটোৰ নিৰ্বাচনী প্ৰচাৰত অংশ লৈছে  ৰাজ্যিক বিজেপিৰ সভাপতি ভৱেশ কলিতা, মহিলা মৰ্চাৰ সভানেত্ৰী আঙুৰলতা ডেকা, মন্ত্ৰী চন্দ্ৰ মোহন পাটোৱাৰী আদি ৷ সেইদৰে বঙাইগাঁৱত বাহৰ পাতি নিৰ্বাচনী প্ৰচাৰ চলাই আছে বিটিচিৰ স্বাস্থ্য বিভাগৰ কাৰ্যবাহী সদস্য অৰূপ কুমাৰ দে ৷ বিজেপিৰ নিৰ্বাচনী প্ৰচাৰ চকুতলগা হৈ পৰিছে ৷ কিন্তু অগপৰ দুৰ্গত কিমান দূৰ আঘাত হানিব পাৰে সেয়া সময়ত পৰিস্কাৰ হৈ উঠিব যদিও দেহে কেহে লাগি পৰিছে নেতা- কৰ্মীসকল ৷ ইপিনে অগপ দলেও অব্যাহত ৰাখিছে নিৰ্বাচনী প্ৰচাৰ ৷ অগপ দলৰ নিৰ্বাচনী প্ৰচাৰত সদায় মুখ্য ভূমিকা গ্ৰহণ কৰি নেতৃত্ব প্ৰদান কৰি আহিছে বিধায়ক ফনীভূষণ চৌধুৰীয়ে ৷ বিধায়কগৰাকীৰ নিৰ্বাচনী প্ৰচাৰ সদায় সুকীয়া ৷ অগপ দলে সদায় নিৰ্বাচনৰ ভোট গ্ৰহণৰ কিছুদিন পূৰ্বেহে সক্ৰিয় হৈ পৰা পৰিলক্ষিত হয় ৷ এইবাৰো এতিয়াহে দলটোৱে নিৰ্বাচনী প্ৰচাৰত লাগি পৰা পৰিলক্ষিত হৈছে ৷ ইয়াৰ অংশ হিচাপে দেওবাৰে অগপ দলৰ বিধায়কগৰাকীয়ে পৌৰসভাৰ ৮ নম্বৰ ৱাৰ্ডৰ প্ৰাৰ্থী ৰুনা ঘোষৰ হৈ নিৰ্বাচনী প্ৰচাৰ চলায় ৷ 

বিধায়কগৰাকীয়ে নিৰ্বাচনী সভাত অংশগ্ৰহণ কৰি কয় যে এই ৱাৰ্ডটোত কংগ্ৰেছক ভোট দিয়া মানে ভাৰতীয় জনতা পাৰ্টিক জয়ী কৰোৱা ৷ যদি সঁচাকৈ ভাৰতীয় জনতা পাৰ্টীৰ প্ৰয়োজন বুলি অনুভৱ কৰিছে, তেতিয়াহলে আমাক চিধাচিধিকৈ ভোট নিদিব ৷ আজিৰ পৰা দহ বছৰ পূৰ্বে বঙাইগাঁৱত কংগ্ৰেছ দলটো শক্তিশালী আছিল বুলিয়ে ক'ব লাগিব ৷ কিন্তু আজি এই পৌৰসভা নিৰ্বাচনৰ সময়ত কংগ্ৰেছ দলটো এনেধৰণৰ পৰ্যায় পাইছে যে তেওঁলোকে ২৫ টা ৱাৰ্ডৰ আটাইকেইটা ৱাৰ্ডতে প্ৰাৰ্থী ঠিয় কৰাব পৰা নাই ৷ ৬ টা মান ৱাৰ্ডত কংগ্ৰেছৰ প্ৰাৰ্থী নাই ৷এইটো অৱস্থা হৈছে বৰ্তমান কংগ্ৰেছৰ ৷ এই ৱাৰ্ডত কংগ্ৰেছৰ প্ৰাৰ্থী আছে ৷ কিন্তু প্ৰাৰ্থীগৰাকীক জয়ী কৰাৰ ক্ষেত্ৰত প্ৰাৰ্থীগৰাকীৰ কাম - কাজক লৈ যিটো চৰ্চা হ'ব লাগে সেইটো হোৱা নাই ৷ এক কথাত কবলৈ গলে তেওঁলোকে নিজেই অনুমান কৰিব পাৰিছে যে পৌৰসভা নিৰ্বাচনত এটা ৱাৰ্ডতো কংগ্ৰেছ দলে জয়ী হ'ব নোৱাৰে ৷ বিধায়কগৰাকীয়ে লগতে কয় যে মই বিধায়ক হিচাপে মন্দিৰো বনাইছো, গিৰ্জাও বনাইছো আৰু মছজিদো বনাইছো ৷ মই হিন্দু কাৰণে যে অকল মন্দিৰ বনাইছো, সেইটো নহয় ৷ মই হিন্দু যদিও হিন্দু , মুছলমান, খৃষ্টান সকলোৰে ধৰ্মীয় অনুষ্ঠানবিলাক মই বনাইছো ৷ আমাৰ মাজত হিন্দু - মুছলমান ভাৱটো নাই ৷ প্ৰত্যেকেই মানুহ, প্ৰত্যেকেই মানৱ ৷ আজি আমি মানৱ সেৱা কৰিবলৈ অসম গণ পৰিষদ দলটো আগবাঢ়ি আহিছো ৷ আমাৰ মাজত কোনো ভেদা- ভেদ নাই ৷  আমাৰ লক্ষ্য হ'ল ৮ নম্বৰ ৱাৰ্ডত বিজেপি আৰু কংগ্ৰেছক হৰুৱা লাগে ৷ ইয়াৰ বাবে তেওঁ ৱাৰ্ডটোৰ ভোটাৰ ৰাইজৰ সহযোগিতা বিচাৰে ৷ বিভিন্নজনে বিভিন্ন কথা ক'ব , বিভিন্নধৰণে উচতাব ৷  আমি আপোনালোকক নিজৰ বুলি ভাবি আপোনালোকৰ ওচৰত ভোট বিচাৰি আহিছো ৷ এইটো হ'ল আমাৰ আপোনালোকৰ প্ৰতি থকা টান ৷ আমি আপোনালোকক কোৱাৰ পিচত আমাক ভোটটো দিব ৷ ভোটটো দিয়াৰ পিচত আপোনালোকৰ যিবোৰ সমস্যা আৰু অভাৱ আছে সেইবোৰ সমাধান কৰাৰ বাবে আপোনালোকে আমাক মাতক ৷ সকলোৱে মিলি আলোচনা কৰি এই সমস্যা আৰু অভাৱবিলাক সমাধান কৰাৰ বাবে চিন্তা - চৰ্চা কৰিব লাগিব বুলিও কয় ৷ সভাত দলটোৰ প্ৰাৰ্থীগৰাকীৰ লগতে দলৰ নেতা- কৰ্মী আৰু স্থানীয় লোক উপস্থিত থাকে🔯