🔯বৃহত্তৰ বঙাইগাঁও প্ৰেছ ক্লাবত আদিবাসী জাতীয় মহাসভাৰ সংবাদ মেল🔯

🔯বৃহত্তৰ বঙাইগাঁও প্ৰেছ ক্লাবত আদিবাসী জাতীয় মহাসভাৰ সংবাদ মেল🔯

 🔯চৰকাৰে জনজাতিকৰণ আৰু ভূমি পট্টা তেওঁলোকৰ চেম্বাৰত ৰাখিছে- বীৰসিং মুণ্ডা🔯

 🔯আন্দোলনৰ কাৰ্যসূচী ঘোষণাঃ শীঘ্ৰে চৰকাৰক স্থিতি স্পষ্ট কৰাৰ দাবী🔯

 📝বঙাইগাঁওঃ ২৬ ফেব্ৰুৱাৰীঃ চৰকাৰে আদিবাসীসকলক জনজাতিকৰণৰ মৰ্যদা আৰু ভূমি পট্টা প্ৰদান কৰিব নে নাই সেয়া শীঘ্ৰে স্পষ্ট কৰিবলৈ আদিবাসী জাতীয় মহাসভাই দাবী জনাইছে ৷ শনিবাৰে বৃহত্তৰ বঙাইগাঁও প্ৰেছ ক্লাবত আয়োজিত এক সংবাদমেলত আদিবাসীসকলৰ সংগ্ৰামী মঞ্চ আদিবাসী জাতীয় মহাসভাৰ সাধাৰণ সম্পাদক বীৰসিং মুণ্ডাই কয় যে চৰকাৰে জনজাতিকৰণ আৰু ভূমি পট্টা তেওঁলোকৰ নিজৰ চেম্বৰত ৰাখি থৈছে ৷ তেওঁলোকে নিৰ্বাচনৰ পূৰ্বে কেৱল এটা নিৰ্দিষ্ট সময়ত এইবিলাক দিম বুলি কয় ৷ এমাহ, দুমাহ কিমান সময় লয় কোনো ঠিক নাই  ৷ নিৰ্বাচন শেষ হোৱাৰ পিচত চৰকাৰ গঠন কৰি প্ৰতিশ্ৰুতিবিলাক পাহৰি যায় ৷ সেয়ে আমি আদিবাসী জাতীয় মহাসভাই আন্দোলন কৰাৰ বাহিৰে আৰু আমাৰ আন কোনো পথ নাই ৷ যাৰ কাৰণে আমি  অহা সাত মাৰ্চৰ পৰা জিলা ভিত্তিত উপায়ুক্ত কাৰ্যালয়ৰ সন্মুখত তিনি ঘণ্টীয়া ধৰ্ণা কাৰ্যসূচী ৰূপায়ণ কৰি গণতান্ত্ৰিক আন্দোলন আৰম্ভ কৰিম ৷ সংবাদ মেলত সাধৰণ সম্পাদক মুণ্ডাই কয় যে অসমৰ আদিবাসী জাতীয় সংগঠন সমুহৰ একমাত্ৰ ঐক্যমঞ্চ আদিবাসী জাতীয় মহাসভাই (সংগ্ৰামী মঞ্চ) ২০১১ চনৰে পৰাই অসমৰ আদিবাসী সকলৰ সাংবিধানিক দাবী জনজাতিকৰণ আৰু ভূমি পট্টা প্ৰদানৰ দাবীত গণতান্ত্ৰিক আন্দোলন গ্ৰহণ কৰি আহিছে যদিও তেওঁলোকৰ দাবীৰ প্ৰতি চৰকাৰে তিলমানো গুৰুত্ব দিয়া নাই ৷ আদিবাসী সকলক জনজাতিকৰণ আৰু ভূমি পট্টা প্ৰদানৰ কাৰণে দিছপুৰ, দিল্লী একাকাৰ কৰি কেবাটাও বিধানসভা নিৰ্বাচন পাৰ কৰিলো৷ কিন্তু নিৰ্বাচনৰ আগে আগে জাতিটোৱে অকল প্ৰতিশ্ৰুতিৰ বাহিৰে একোকে নাপালে ৷ বৰঞ্চ জাতীয় সংগঠন তথা যুদ্ধবিৰত থকা আদিবাসী সংগঠনসমুহে বিভিন্ন ৰাজনৈতিক ষড়যন্ত্ৰৰ বলি হ’বলগীয়া হ’ল ৷ উল্লেখ্য যে ২০১৯ চনৰ ৯ জানুৱাৰীত ৰাজ্যসভাত উত্থাপন হোৱা জনজাতিকৰণৰ বিলখন আজি পাহৰণিৰ গৰাহত বুলি কৈ কয় যে বিলখনৰ পৰিৱৰ্তে গঠিত হোৱা মন্ত্ৰীগোটেও তেওঁলোকক ৰাম ঠগোন দিলে ৷ এই কাৰ্যক আদিবাসী জাতীয় মহাসভাই ধিক্কাৰ দিয়ে ৷ লগতে কয় যে অসমৰ বৰ্তমানৰ মুখ্যমন্ত্ৰী ড° হিমন্তবিশ্ব শৰ্মাই  মন্ত্ৰী গোটৰ সভাপতিৰ দায়িত্ব পোৱাৰ আগৰে পৰাই আদিবাসী মহাসভাত মুখ্য অতিথিৰ ৰূপত অংশ গ্ৰহণ কৰি কেবাবাৰো জনজাতিকৰণ হ’ব বুলি দিন ধাৰ্য কৰি দিছিল ৷ আনকি বিজেপিৰ কেন্দ্ৰীয় সভাপতিয়ে ছয় জনগোষ্ঠীৰ জনজাতিকৰণ হোৱা বুলিয়ে নিৰ্বাচনী সভাত ভাষণ প্ৰদান কৰাৰ পিছতো আদিবাসীসকলক জনজাতিকৰণত কিহৰ আপত্তি আছে বুলি প্ৰশ্ন উত্থাপন কৰি বিজেপি চৰকাৰ আৰু অসমৰ মুখ্যমন্ত্ৰীক নিৰ্লজ্ব আখ্যা দিয়ে ৷ আদিবাসী জাতীয় মহাসভাৰ সভাপতি (সংগ্ৰামী মঞ্চ) বয়ল হেব্ৰম, আহ্বায়ক চাইমন কিস্কু, সহকাৰী সাধাৰণ সম্পাদক হোপ্না চৰেনৰ লগতে জেএছবিৰ সভাপতি ডেনিয়েল হাছদা, মনজিৎ কিস্কু, জ'নচ তপ্প, ৰমেশ তপ্প, হিতেশ চৰেন ,মৃনাল কুজুৰ আদি উপস্থিত থকা সংবাদমেলত ভূমি পট্টা আদিবাসীসকলৰ মৌলিক অধিকাৰ বুলি উল্লেখ কৰি সাধাৰণ সম্পাদক মুণ্ডাই কয় যে বিশেষকৈ বন ভূমি আৰু ভূমিহীন সকলক ভূমি আৱণ্টন দিয়াৰ ক্ষেত্ৰত নিৰপেক্ষ ভূমিকা গ্ৰহণ কৰা পৰিলক্ষিত হোৱা নাই বুলি অভিযোগ উত্থাপন কৰে ৷ 

অসম চৰকাৰ আৰু পৰিষদীয় চৰকাৰসমূূূহে বাৰে বাৰে ভূমি আৱণ্টনৰ কথা কৈ আদিবাসীসকলক বঞ্চিত কৰাহে পৰিলক্ষিত হৈছে বুলিও কয় ৷ যোৱা ২০১৯ - ২০ বৰ্ষত বিটিচিৰ কোকৰাঝাৰ আৰু চিৰাং জিলাত বিভিন্ন ঠাইত বনভূমি আৱণ্টন দিয়াৰ কাম আৰম্ভ কৰিছিল আৰু বিভিন্ন জাতি- জনগোষ্ঠীয়ে লাভ কৰিছিল ৷ কিন্তু নতুন চৰকাৰ গঠন হোৱাৰ পিচৰ পৰা আজিলৈকে এটা পৰিয়ালেকো বন ভূমি আৱণ্টন দিয়া নাই ৷ বৰং যিসকলে আৱণ্টন পাইছে, সেইসকলক অবৈধ বুলিহে মেল - মিটিঙত শাসনত থকাসকলে ভাষণ প্ৰদান কৰি আহিছে বুলিহে অভিযোগ কৰে ৷ সংবাদ মেলত আদিবাসী  জাতীয় মহাসভাই বিজেপি চৰকাৰক শীঘ্ৰে আধৰুৱা হৈ থকা বন ভূমি আৱণ্টনৰ কাম আৰম্ভ কৰি অসমৰ খাটি খোৱা আদিবাসীসকলক দিয়া প্ৰতিশ্ৰুতি ৰক্ষা কৰিবলৈ দাবী জনায় ৷  অন্যথা ইয়াৰ প্ৰত্যুত্ত শ্ৰমিক আদিবাসীসকলে ভালকৈ দিব জানে বুলি কৈ বিগত সময়ত বিভিন্ন ৰাজনৈতিক দলক দি অহা বুলিও কয় ৷ সংবাদ মেলত সংগঠনটোৰ নেতৃত্বই আদিবাসী সকলক জনজাতিকৰণ আৰু ভূমি পট্টা প্ৰদানৰ দাবীত এলানি গণতান্ত্ৰিক আন্দোলনৰ কাৰ্যসূচীও ঘোষণা কৰে ৷ সেই অনুসৰি অহা ৭ মাৰ্চত চিৰাং জিলা উপায়ুক্ত কাৰ্যালয়ৰ সন্মুখত ,  ১১ মাৰ্চত কোকৰাঝাৰ জিলা উপায়ুক্ত কাৰ্যালয়ৰ সন্মুখত,  ১৬ মাৰ্চত গোসাইগাঁৱস্থিত মহকুমাধিপতিৰ কাৰ্যালয়ৰ সন্মুখত, ২১ মাৰ্চত বাক্সা জিলাৰ মুছলপুৰত আৰু ২৯ মাৰ্চত ওদালগুৰি জিলাৰ উপায়ুক্ত কাৰ্যালয়ৰ সন্মুখত ৩ ঘন্টীয়া ধৰ্ণা কাৰ্যসূচী ৰূপায়ণ কৰিব ৷ ইয়াৰ পিচতো পৰ্যায়ক্ৰমে আন্দোলনৰ কাৰ্যসূচী গ্ৰহণ কপি যাব বুলি কয় ৷🔯