🔯বঙাইগাঁও পৌৰসভাৰ ২৫ টা ৱাৰ্ডৰ বাবে মুঠ ৭৩ খন মনোনয়ন দাখিল🔯

🔯বঙাইগাঁও পৌৰসভাৰ ২৫ টা ৱাৰ্ডৰ বাবে মুঠ ৭৩ খন মনোনয়ন দাখিল🔯১০ নং ৱাৰ্ডত সৰ্বাধিক ৫ গৰাকী আৰু ২৩ নং ৱাৰ্ডত কেৱল এগৰাকী প্ৰাৰ্থীৰ মনোনয়ন পত্ৰ দাখিল

📝বঙাইগাঁওঃ ১৫ ফেব্ৰুৱাৰীঃ পৌৰসভা নিৰ্বাচনৰ বাবে মনোনয়ন পত্ৰ দাখিলৰ আজি অন্তিম দিন  হোৱাত বঙাইগাঁৱত বিভিন্ন ৰাজনৈতিক দলৰ কৰ্মকৰ্তাসহ প্ৰাৰ্থীসকলে মনোনয়ন পত্ৰ দাখিলৰ বাবে জিলা উপায়ুক্ত কাৰ্যালয়ত ভীৰ কৰে ৷ অহা ৬ মাৰ্চত অনুষ্ঠিত হ'বলগীয়া পৌৰসভা নিৰ্বাচনৰ বাবে মঙলবাৰৰ তিনি বজাত মনোনয়ন পত্ৰ দাখিলৰ সময়সীমা নিৰ্বাচন আয়োগে নিৰ্দ্ধাৰণ কৰি দিছিল ৷ প্ৰাৰ্থীসকলে মনোনয়ন পত্ৰ দাখিল কৰিবলৈ অহাৰ সময়ত সমৰ্থকসহ উপস্থিত হোৱা পৰিলক্ষিত হয় ৷ একেদৰে সকলো প্ৰাৰ্থীয়ে নিৰ্বাচনত জয়ী হ'ব বুলি দাবী কৰে ৷ নিজৰ ৱাৰ্ডৰ সনস্যাসমূহ সমাধান কৰাৰ ওপৰতে প্ৰথমে গুৰুত্ব দিব বুলিও কয় ৷ ইপিনে বঙাইগাঁও জিলা উপায়ুক্ত কাৰ্যালয়ৰ পৰা পোৱা তথ্যমতে মনোনয়ন পত্ৰ দাখিলৰ অন্তিম দিনৰ শেষ মুহুৰ্তলৈকে বঙাইগাঁও পৌৰসভাৰ ২৫টা ৱাৰ্ডৰ বাবে বিভিন্ন ৰাজনৈতিক দলৰ পৰা মুঠ ৭৩ খন মনোনয়ন পত্ৰ দাখিল কৰিছে ৷ ইয়াৰ ভিতৰত পৌৰসভাৰ ২৫ টা ৱাৰ্ডতে অসম গণ পৰিষদ দলৰ প্ৰাৰ্থীয়ে মনোনয়ন পত্ৰ দাখিল কৰিছে। আনহাতে ২৩ নং ৱাৰ্ডৰ বাহিৰে বাকী ২৪ টা ৱাৰ্ডত ভাৰতীয় জনতা পাৰ্টীৰ প্ৰাৰ্থীয়ে মনোনয়ন পত্ৰ দাখিল কৰিছে। সেইদৰে ভাৰতীয় জাতীয় কংগ্ৰেছ দলৰ প্ৰাৰ্থীয়ে ৫ নং, ৯ নং, ১৪ নং, ১৮ নং, ২১ নং আৰু ২৩ নং ৱাৰ্ডৰ বাহিৰে বাকী ১৯ টা ৱাৰ্ডত মনোনয়ন পত্ৰ দাখিল কৰিছে। চি পি আই (এম)  দলৰ প্ৰাৰ্থীয়ে কেবল ১০ নং, ১২ নং আৰু ২৫ নং ৱাৰ্ডতহে মনোনয়ন পত্ৰ দাখিল কৰিছে। আনহাতে ১০ আৰু ১১ নং ৱাৰ্ডত দুজন নিৰ্দলীয় প্ৰাৰ্থীয়ে মনোনয়ন পত্ৰ দাখিল কৰিছে। উল্লেখ্য যে পৌৰসভাৰ অন্তৰ্গত ২৫ টা ৱাৰ্ডৰ ভিতৰত ১০ নং ৱাৰ্ডত সৰ্বাধিক ৫ গৰাকীয়ে আৰু ২৩ নং ৱাৰ্ডত কেৱল অগপৰ শৈলেন সৰকাৰেহে মনোনয়ন পত্ৰ দাখিল কৰিছে ৷🔯