🔯চিৰাঙত জাফাৰ উদ্যোগত সাংবাদিক নিগ্ৰহৰ প্ৰতিবাদ

🔯চিৰাঙত জাফাৰ উদ্যোগত  সাংবাদিক নিগ্ৰহৰ প্ৰতিবাদ

🔯মুখ্য মন্ত্ৰীলৈ স্মাৰক পত্ৰ প্ৰেৰণ 

📝বঙাইগাঁওঃ ৮ ফেব্ৰুৱাৰীঃ চিৰাং জিলাৰ বাসুগাঁওৰ  সাংবাদিক তথা চিৰাং জিলা প্ৰেছ ক্লাবৰ সম্পাদক  জয়ন্ত দেবৱনাথক বাতৰি সংগ্ৰহ কৰি থকাৰ  সময়ত সোমবাৰে আৰক্ষীয়ে কৰা প্ৰহাৰৰ ঘটনাকলৈ ৰাজ্যজুৰি সাংবাদিক তথা বিভিন্ন সংগঠনৰ দ্বাৰা প্ৰতিবাদ অব্যাহত আছে ৷ ইপিনে আজি সাংবাদিকজনক আক্ৰমণৰ ঘটনাৰ উচিত তদন্ত কৰি ঘটনাত জড়িত আৰক্ষী কনিষ্টবল দুজনৰ বিৰুদ্ধে উচিত শাস্তিৰ দাবীত চিৰাং জিলাৰ সদৰ কাজলগাঁওস্থিত জিলা উপায়ুক্ত কাৰ্যালয়ৰ সন্মুখত জাফাৰ চিৰাং জিলা সমিতিৰ উদ্যোগত পুৱা দহ বজাৰ পৰা ক'লাবেজ পৰিধান কৰি সাংবাদিক সকলে এঘণ্টীয়া মৌন অৱস্থান ধৰ্মঘট পালন কৰে ৷ এই প্ৰতিবাদী কাৰ্যসূচীত চিদলীৰ বিধায়ক জয়ন্ত বসুমতাৰীয়ে উপস্থিত থাকি বাসুগাঁওৰ সাংবাদিক নিগ্ৰহৰ ঘটনাটো গৰিহণা দিয়ে ৷ বিধায়কগৰাকীয়ে তদন্ত মৰ্মে আইন অনুসৰি দোষী আৰক্ষী কনিষ্টবলে শাস্তি পোৱা উচিত বুলি মন্তব্য কৰে ৷ প্ৰতিবাদী কাৰ্যসূচীত বঙাইগাঁও আৰু চিৰাং জিলাৰ বিভিন্ন সাংবাদিক সংগঠনৰ প্ৰতিনিধি, প্ৰেছ ক্লাবৰ প্ৰতিনিধি আৰু কেবাটাও জাতীয় সংগঠনৰ নেতা কৰ্মীয়ে অংশ গ্ৰহণ কৰে ৷

প্ৰতিবাদী কাৰ্যসূচীৰ অন্তত উপৰোক্ত দাবীত চিৰাং জিলাৰ উপায়ুক্তৰ জৰিয়তে ৰাজ্যৰ মুখ্যমন্ত্ৰীলৈ এখন স্মাৰক পত্ৰ প্ৰেৰণ কৰা হয় ৷ চিৰাং জিলা সমিতি জাফাৰ সভাপতি সুনিল শৰ্মা আৰু সম্পাদক আব্দুল মালেক আহমেদ স্বাক্ষৰিত  স্মাৰক পত্ৰখন জিলা উপায়ুক্তৰ হৈ অতিৰিক্ত উপায়ুক্ত অজিত কুমাৰ শৰ্মাই প্ৰতিবাদস্থলীত উপস্থিত হৈ গ্ৰহণ কৰে ৷ স্মাৰক পত্ৰৰ প্ৰতিলিপি চিৰাং জিলাৰ আৰক্ষী অধীক্ষক প্ৰাণজিৎ বৰাকো প্ৰদান কৰা হয় ৷ স্মাৰক পত্ৰ গ্ৰহণ কৰি চিৰাং জিলাৰ আৰক্ষী অধীক্ষক প্ৰাণজিত বৰাই সোমবাৰৰ ঘটনাৰ সৈতে জড়িত আৰক্ষী কনিষ্টবল দুজনক আৰক্ষী চাউনি লৈ পঠোৱা হৈছে বুলি উল্লেখ কৰি সমগ্ৰ বিষয়টো তদন্ত কৰি কুৰিদিনৰ ভিতৰত ব্যৱস্থা গ্ৰহণ কৰাৰ আশ্বাস প্ৰদান কৰে ৷ এই প্ৰতিবাদী কাৰ্যসূচীত জাফাৰ কেন্দ্ৰীয় সমিতিৰ সভাপতি অভিদ্বীপ চৌধুৰী, আমছুৰ সভাপতি ৰেজাউল কৰিম চৰকাৰ, এবিএমছুৰ সাধাৰণ সম্পাদক টাইচন হুচেইন, আছু, আক্ৰাছু,বেংগলী যুৱ ছাত্ৰ ফেডাৰেচনৰ কৰ্মকৰ্তাই অংশগ্ৰহণ কৰাৰ লগতে আৰক্ষীৰ দ্বাৰা সাংবাদিকক প্ৰহাৰ কৰা ঘটনাৰ তীব্ৰ গৰিহণা দি দোষীক উচিত শাস্তি প্ৰদানৰ দাবী জনায় ৷ উল্লেখ্য যে আহত সাংবাদিকগৰাকী সম্প্ৰতি বঙাইগাঁৱৰ ল'ৱাৰ আসাম হাস্পতালত চিকিৎসাধীন হৈ  আছে ৷🔯