🔯পৌৰসভা নিৰ্বাচন সন্দৰ্ভত ৰাজনৈতিক দলৰ সৈতে বঙাইগাঁও জিলা প্ৰশাসনৰ সভা🔯

🔯পৌৰসভা নিৰ্বাচন সন্দৰ্ভত ৰাজনৈতিক দলৰ সৈতে বঙাইগাঁও জিলা প্ৰশাসনৰ সভা 

📝বঙাইগাঁওঃ ১০ ফেব্ৰুৱাৰীঃ পৌৰসভা নিৰ্বাচন ২০২২ সন্দৰ্ভত বুধবাৰে অসম ৰাজ্যিক নিৰ্বাচন আয়োগে জাননী জাৰি কৰিছে। জাননী অনুসৰি ৬ মাৰ্চত পৌৰসভা নিৰ্বাচন অনুষ্ঠিত হ'ব। অসম ৰাজ্যিক নিৰ্বাচন আয়োগৰ জাননী অনুসাৰে বঙাইগাঁও পৌৰসভা নিৰ্বাচনৰো জাননী জাৰি কৰা হৈছে। এই সন্দৰ্ভত বৃহস্পতিবাৰে বঙাইগাঁও জিলা প্ৰশাসনে উপায়ুক্ত কাৰ্যালয়ৰ সভাকক্ষত ৰাজনৈতিক দলৰ বিষয়ববীয়াসকলৰ সৈতে এক বৈঠকত মিলিত হয়। বিজেপি, অগপ, ভাৰতীয় জাতীয় কংগ্ৰেছ, চি পি আই এম, নেশ্যনেল পিপলচ পাৰ্টী আৰু ৰাইজৰ দলৰ বিষয়ববীয়াসকলৰ উপস্থিতিত অনুষ্ঠিত বৈঠকত জিলা উপায়ুক্ত ডা:এম এছ লক্ষ্মী প্ৰিয়াই বঙাইগাঁও পৌৰসভা নিৰ্বাচনৰ সবিশেষ তথ্য দাঙি ধৰে ৷ বঙাইগাঁও পৌৰসভাত ২৫ টা ৱাৰ্ড আছে আৰু ৪৪ টা ভোট গ্ৰহণ কেন্দ্ৰত ভোট গ্ৰহণ অনুষ্ঠিত হ'ব।পৌৰসভাৰ ১৫ আৰু ১৯ নং ৱাৰ্ড দুটা অনুসূচিত জাতিৰ বাবে, ২ নং ৱাৰ্ডটো অনুসূচিত জাতিৰ মহিলাৰ বাবে , ১৩ নং ৱাৰ্ডটো অনুসূচিত জনজাতিৰ বাবে, ৪, ৬, ৭, ৮, ১১, ১২, ১৪, ১৭, ১৮, ২০ আৰু ২৫ নং ৱাৰ্ড কেইটা মহিলাৰ বাবে সংৰক্ষিত হোৱাৰ বিপৰীতে ১, ৩, ৫, ৯, ১০, ১৬, ২১, ২২, ২৩ আৰু ২৪ নং ৱাৰ্ডকেইটা সকলোৰে বাবে মুকলি থাকিব আৰু সেইমতে ৱাৰ্ড কমিচনাৰ পদৰ বাবে নিৰ্বাচন অনুষ্ঠিত হ'ব। নিৰ্বাচনত প্ৰতিদ্বন্দ্বিতা আগবঢ়াবলগীয়া প্ৰাৰ্থীসকলে ১০ ফেব্ৰুৱাৰীৰ পৰা ১৫ ফেব্ৰুৱাৰীৰ ভিতৰত মনোনয়ন পত্ৰ সংগ্ৰহ কৰিব পাৰিব। ১, ২, ৩, ৪ আৰু ৫ নং ৱাৰ্ডৰ বাবে জিলা উন্নয়ন আয়ুক্ত ভাস্কৰ দাসৰ পৰা, ৬, ৭, ৮, ৯ আৰু ১০ নং ৱাৰ্ডৰ বাবে অতিৰিক্ত উপায়ুক্ত নৱজ্যোতি ওজাৰ পৰা, ১১, ১২, ১৩, ১৪ আৰু ১৫ নং ৱাৰ্ডৰ বাবে অতিৰিক্ত উপায়ুক্ত শ্যামলক্ষেত্ৰ গগৈৰ পৰা, ১৬, ১৭, ১৮, ১৯ আৰু ২০ নং ৱাৰ্ডৰ বাবে অতিৰিক্ত উপায়ুক্ত পংকজ চমুৱাৰ পৰা আৰু ২১, ২২, ২৩, ২৪ আৰু ২৫ নং ৱাৰ্ডৰ বাবে বঙাইগাঁও সদৰ মহকুমাধিপতি মগেন নৰহৰ কাৰ্যালয় কক্ষৰ পৰা দিনৰ ১১ বজাৰ পৰা বিয়লি ৩ বজাৰ ভিতৰত ১০ ৰ পৰা ১৫ ফেব্ৰুৱাৰীৰ ভিতৰত মনোনয়ন পত্ৰ সংগ্ৰহ কৰিব পাৰিব। 

সেইদৰে ১৫ ফেব্ৰুৱাৰীৰ ভিতৰত দিনৰ ১১ বজাৰ পৰা বিয়লি ৩ বজাৰ ভিতৰত কাৰ্যালয় খোলা দিনত নিৰ্বাচনী প্ৰাৰ্থী বা তেওঁৰ প্ৰস্তাৱকে ওপৰোক্ত যিকোনো এগৰাকী বিষয়াৰ কাৰ্যালয় কক্ষত মনোনয়ন পত্ৰ দাখিল কৰিব পাৰিব। আনহাতে ১৭ ফেব্ৰুৱাৰীত দিনৰ ১০ বজাৰ পৰা ৪ বজাৰ ভিতৰত মনোনয়ন পত্ৰসমূহ উপায়ুক্ত কাৰ্যালয়ত পৰীক্ষা কৰা হ'ব। একেদৰে ওপৰোক্ত যিকোনো এগৰাকী কৰ্তৃত্বপ্ৰাপ্ত বিষয়াৰ কাৰ্যালয় কক্ষত ২০ ফেব্ৰুৱাৰীত দিনৰ ৩ বজাৰ ভিতৰত নিৰ্বাচনী প্ৰাৰ্থী বা তেওঁৰ প্ৰস্তাৱক অথবা তেওঁৰ নিৰ্বাচনী এজেন্টে মনোনয়ন প্ৰত্যাহাৰ কৰাৰ জাননী দিব পাৰিব।নিৰ্বাচনত যদি প্ৰতিদ্বন্দ্বিতা হয় তেতিয়াহ'লে ৬ মাৰ্চত পুৱা ৮ বজাৰ পৰা বিয়লি ৪ বজাৰ ভিতৰত ভোট গ্ৰহণ অনুষ্ঠিত হ'ব। উল্লেখ থাকে যে বৰ্তমানে বঙাইগাঁও পৌৰসভাৰ ২৫টা ৱাৰ্ডৰ ভিতৰত পুৰুষ ভোটাৰ ১৯,৯৫১জন আৰু মহিলা ভোটাৰ ২০,৬০১ গৰাকী ধৰি মুঠতে ৪০,৫৫২গৰাকী ভোটাৰ আছে🔯।