🔯উত্তৰাখণ্ডৰ নিৰ্বাচনী সভাৰ বক্তব্য প্ৰসংগঃ

🔯উত্তৰাখণ্ডৰ নিৰ্বাচনী সভাৰ বক্তব্য প্ৰসংগঃ

🔯মুখ্যমন্ত্ৰী ড°হিমন্ত বিশ্ব শৰ্মাৰ বিৰুদ্ধে বঙাইগাঁও সদৰ থানাত  কংগ্ৰেছৰ এজাহাৰ দাখিল 

📝বঙাইগাঁওঃ ১৯ ফেব্ৰুৱাৰীঃ অসমৰ মুখ্যমন্ত্ৰী ড° হিমন্ত বিশ্ব শৰ্মাই উত্তৰাখণ্ডৰ এখন নিৰ্বাচনী সভাত কংগ্ৰেছ সাংসদ ৰাহুল গান্ধীৰ পিতৃ পৰিচয়ক লৈ কৰা টুলুঙা মন্তব্য সন্দৰ্ভত শনিবাৰে মুখ্যমন্ত্ৰীগৰাকীৰ বিৰুদ্ধে আইনী ব্যৱস্থা গ্ৰহণৰ বাবে  বঙাইগাঁও জিলা কংগ্ৰেছে বঙাইগাঁও সদৰ থানাত এখন এজাহাৰ দাখিল কৰিছে ৷ উল্লেখ্য যে অসমৰ মুখ্যমন্ত্ৰী ড°হিমন্ত বিশ্ব শৰ্মাই যোৱা ১১ ফেব্ৰুৱাৰীত উত্তৰাখণ্ডত নিৰ্বাচনী সভা এখনত জনতাক উদ্দেশ্যি দিয়া ভাষণত কংগ্ৰেছ সাংসদ ৰাহুল গান্ধীৰ পিতৃ পৰিচয়ক লৈ টুলুঙা মন্তব্য কৰিছিল ৷ বঙাইগাঁও জিলা কংগ্ৰেছৰ সভাপতি মৃণাল অধিকাৰী, অসম প্ৰদেশ কংগ্ৰেছ কমিটিৰ সম্পাদক জ্যোৰ্তিময় বৈশ্য, বঙাইগাঁও ব্লক কংগ্ৰেছৰ সভাপতি প্ৰদীপ লোধ আৰু বঙাইগাঁও কংগ্ৰেছৰ ছচিয়েল মিডিয়া(আইটি)চেলৰ বীৰ কুমাৰ অধিকাৰী স্বাক্ষৰিত এজাহাৰত মুখ্যমন্ত্ৰী ড°শৰ্মাৰ বিৰুদ্ধে আইনী প্ৰক্ৰিয়া গ্ৰহণৰ আহ্বান জনাইছে ৷ বঙাইগাঁও সদৰ থানাত এজাহাৰ দাখিল কৰি অসম প্ৰদেশ কংগ্ৰেছ কমিটিৰ সম্পাদক জ্যোৰ্তিময় বৈশ্যই সংবাদ মাধ্যমৰ আগত কয় যে ' মুখ্যমন্ত্ৰী ড° শৰ্মাই জননেতা ৰাহুল গান্ধীৰ বিপক্ষে কৰা মন্তব্যক সমগ্ৰ ভাৰতবাসীয়ে গৰিহণা দিছে ৷ প্ৰদেশ কংগ্ৰেছ কমিটিয়ে ৰাজ্যৰ প্ৰতিখন জিলা সদৰত মুখ্যমন্ত্ৰীৰ বিৰুদ্ধে আইনী প্ৰক্ৰিয়া গ্ৰহণ কৰিবলৈ এজাহাৰ দাখিল কৰিছোঁ ৷ মুখ্যমন্ত্ৰী ড° হিমন্ত বিশ্ব শৰ্মাৰ যি নাৰীৰ বিৰুদ্ধে মন্তব্য তথা নাৰী সমাজক লৈ কৰা অপমান আৰু তেওঁৰ নিজৰ ক্ষমতা লাভৰ যি লিপাঞ্চু তাক সিদ্ধি কৰিবলৈ ভাৰতীয় সভ্যতা- সংস্কৃতিৰ বিৰুদ্ধে যি মন্তব্য কৰিছে তাৰ বিৰুদ্ধে  বঙাইগাঁও সদৰ থানাত এই এজাহাৰ দাখিল কৰিছোঁ আৰু অনতি বিলম্বে তেওঁক গ্ৰেপ্তাৰ কৰি উপযুক্ত শাস্তি প্ৰদান কৰিব লাগে বুলি আমি প্ৰশাসনক অনুৰোধ জনাইছোঁ৷ অন্যথা আমি দলে সমগ্ৰ ভাৰতবৰ্ষত গণতান্ত্ৰিক আন্দোলনৰ মাধ্যমেৰে এই আন্দোলনক অধিক ফলপ্ৰসূ কৰি তুলিব বুলিও কয় ৷🔯