🔯ৰে'লৱেৰ নিউ বঙাইগাঁওস্থিত ফুৱেল ষ্টেচনত ধন দাবী

🔯ৰে'লৱেৰ নিউ বঙাইগাঁওস্থিত ফুৱেল ষ্টেচনত ধন দাবী 

🔯আক্ৰাছুৰ কেন্দ্ৰীয় নেতাসহ সাতজনক ৰঙা ঘৰলৈ প্ৰেৰণ 

🔯ধীৰাজ পাঠকক সংগঠনৰ পৰা বহিস্কাৰ 

📝বঙাইগাঁওঃ ২৫ ফেব্ৰুৱাৰীঃ এটকা দুটকা নহয়, পাঁচ কোটি টকা দাবী কৰি অৱশেষত ৰঙা ঘৰৰ আলহী হ'ল আক্ৰাছুৰ কেন্দ্ৰীয় সমিতিৰ নেতাকে ধৰি সাতজনীয়া এটি দল ৷ উল্লেখ্য যে বঙাইগাঁৱৰ নিউ বঙাইগাঁও ৰে'লে জংচনৰ সমীপত থকা ৰে'লৱে বিভাগৰ ফুৱেল ষ্টেচনত বৃহস্পতিবাৰে ধন দাবী কৰিবলৈ গৈ আৰক্ষীৰ হাতত গ্ৰেপ্তাৰ হৈছিল আক্ৰাছুৰ কেন্দ্ৰীয় সমিতিৰ নেতা ধীৰাজ পাঠকৰ লগতে আন ছয়জন ব্যক্তিসহ এই সাতজনীয়া দলটো ৷  বঙাইগাঁও  আৰক্ষীয়ে গ্ৰেপ্তাৰ কৰা সাতজনকে আজি  বঙাইগাঁও আদালতত হাজিৰ কৰোৱাত আদালতে ন্যায়িক জিম্মালৈ প্ৰেৰণ কৰে ৷ বৃহস্পতিবাৰে নিউ বঙাইগাঁওস্থিত ৰে'লৱে বিভাগৰ ফুৱেল ষ্টেচনত ধীৰাজ পাঠক, মনোৰঞ্জন বৰ্মন, মনোজ বৰুৱা,  প্ৰশান্ত ৰায়, সঞ্জীৱ ৰামছিয়াৰী, মানৱ বৰ্মন আৰু সঞ্জয় সিংহই লগত ভিডিঅ কেমেৰালৈ এখন ইন'ভা বাহনেৰে নিজকে বঙাইগাঁও জিলা উপায়ুক্ত কাৰ্যালয়ৰ পৰা যোৱা প্ৰশাসনীয় বিষয়া তথা ভিজিলেন্সৰ লোক আদি ভুৱা পৰিচয় দি ফুৱেল ষ্টেচনত প্ৰৱেশ কৰি দায়িত্বত থকা বিষয়াক তেলৰ চোৰাং কাৰবাৰ চলি থকা বুলি কৈ তেলৰ টেংকাৰত কম তেল আনি ইয়াত সঠিক পৰিমাণ দেখুৱাই অহা হৈছে বুলি কয় আৰু এই খবৰ পাইয়ে দলটো উপস্থিত অহা বুলি জনায় ৷ লগতে লগত লৈ যোৱা ভিডিঅ কেমেৰাৰে নানা দৃশ্য ৰেকৰ্ডিং কৰাৰ উপৰিও টেংকাৰৰ চালক আদিৰ ভাষ্য গ্ৰহণ কৰি সকলোকে ব্যতিব্যস্ত কৰি তোলে ৷ পিচত দলটোৱে ফুৱেল ষ্টেচনৰ দায়িত্বত থকা বিষয়াক ধন দাবী কৰে ৷ ধন দিলে বিষয়টো নিস্পত্তি কৰা যাব  বুলি কৈ নহ'লে ধৰি লৈ যোৱা হ'ব বুলিও একপ্ৰাকাৰ ভাবুকি প্ৰদান কৰাৰ অভিযোগ উত্থাপিত হৈছিল ৷ এই কথা শুনি ফুৱেল ষ্টেচনৰ দায়িত্বত থকা বিষয়াই ভয় খাই বিভাগৰ উৰ্ধতম কৰ্তৃপক্ষৰ লগত যোগাযোগ কৰাৰ লগতে আৰক্ষী বিভাগৰ লগতো যোগাযোগ কৰে ৷ ইয়াৰ পিচতে ঘটনাস্থলীত নিউ বঙাইগাঁও আৰক্ষী পহৰা চকীৰ দল উপস্থিত হৈ এই সাতজনীয়া দলটোক বাহনৰ সৈতে কৰায়ত্ত কৰি বঙাইগাঁও সদৰ থানালৈ আনে ৷ সমগ্ৰ ঘটনা সন্দৰ্ভত পিচত ৰে'লৱে বিভাগৰ তৰফৰ পৰা বঙাইগাঁও সদৰ থানাত দাখিল কৰা এজাহাৰৰ ভিত্তিত আৰক্ষীয়ে ১০৮/ ২২ নম্বৰৰ এক গোচৰ পঞ্জীয়ন কৰি  সাতজনকে গ্ৰেপ্তাৰ কৰে ৷ আজি আটাইকেইজনকে বঙাইগাঁও আৰক্ষীয়ে আদালতত হাজিৰ কৰোৱাত আদালতে জেল হাজতলৈ প্ৰেৰণ কৰে ৷ উল্লেখ্য যে দলটোৱে দাবী কৰা ধনৰ পৰিমাণ নিৰ্দিষ্টকৈ আৰক্ষীয়ে ক'ব পৰা নাছিল আৰু আনুমানিক দহ লক্ষাধিক টকা দাবী কৰা বুলি জানিবলৈ দিছিল ৷ কাৰণ ৰে'লৱে বিভাগৰ পৰা দাখিল কৰা এজাহাৰত দাবী কৰা ধনৰ পৰিমাণ উল্লেখ কৰা হোৱা নাছিল ৷  কিন্তু শেহতীয়াকৈ জানিব পৰা মতে দলটোৱে ফুৱেল ষ্টেচনৰ দায়িত্বত থকা বিষয়াগৰাকীক পাঁচ কোটি টকা দাবী কৰিছিল ৷ 

ইপিনে ফুৱেল ষ্টেচনত ভুৱা পৰিচয় দি ধন দাবীকে ধৰি সংঘটিক কৰা ঘটনাৰ সৈতে জড়িত থকাসকলৰ বিৰুদ্ধে আক্ৰাছুৱে প্ৰশাসনক উপযুক্ত আইনি বিহিত ব্যৱস্থা গ্ৰহণ কৰিবলৈ দাবী জনাইছে ৷ আজি সংগঠনটোৰ বৰপাৰাস্থিত মুখ্য কাৰ্যালয়ত আয়োজিত এখন সংবাদ মেলত আক্ৰাছুৰ কেন্দ্ৰীয় সমিতিৰ সভাপতি ক্ষীতিশ বৰ্মনে ফুৱেল ষ্টেচনত সংঘটিত কৰা ঘটনাৰ সৈতে জড়িত হৈ আৰক্ষীৰ দ্বাৰা গ্ৰেপ্তাৰ হোৱা সংগঠনটোৰ কেন্দ্ৰীয় সমিতিৰ নেতা ধীৰাজ পাঠকক তৎকালীনভাৱে কাৰ্যকৰী হোৱাকৈ প্ৰচাৰ সম্পাদকৰ পদবীৰ লগতে সংগঠনটোৰ প্ৰাৰ্থমিক সদস্য পদৰ পৰা বহিস্কাৰ কৰা বুলি ঘোষণা কৰে ৷ আক্ৰাছুৰ সভাপতিগৰাকীয়ে স্পষ্টভাৱে কয় যে এই ঘটনাৰ লগত জড়িতসকলৰ এজন আক্ৰাছু নেতা যদিও বাকী ছয়জন আক্ৰাছুৰ সদস্য নহয় ৷ সেইসকল ব্যক্তিৰ লগত আক্ৰাছুৰ কোনো সম্বন্ধ তথা সম্পৰ্ক নাই ৷ ধীৰাজ পাঠক নামৰ আক্ৰাছু নেতাজনে এই ঘটনাৰ সৈতে জড়িত হৈ সংগঠনটোক কালিমা সানিলে ৷ এই কাৰ্যক আমি ধিক্কাৰ দিছো ৷ এয়া তেওঁলোকৰ ব্যক্তিকেন্দ্ৰিক চিন্তা চৰ্চা তথা কৰ্ম ৷ তেনে কাৰ্যত ক্ৰাছুয়ে কোনো ধৰণে সহায় সহযোগিতা নকৰে ৷ সেয়া বাস্তৱিকতে তেঁওলোকৰ নিজস্ব স্বাৰ্থকেন্দ্ৰিক সুবিধাবাদী চৰিত্ৰ ৷ আক্ৰাছু নেতা ধীৰাজ পাঠকৰ এনে ধৰণৰ কৰ্ম - কাণ্ডক ছাত্ৰ সংগঠনটোৱে কেতিয়াও সহায় সহযোগ নকৰে ৷ লগতে সংগঠনৰ আন কোনোবা নেতা - কৰ্মীও যদি অনৈতিক কাৰ্যত জড়িত হয় তথা সংগঠনটেক কালিমা সানিব বিচাৰে তেতিয়াহলে সেইসকলোকো সংগঠনৰ পৰা উলিয়াই দিয়া হ'ব ৷ সভাপতিগৰাকীয়ে ফুৱেল ষ্টেচনত তেলৰ চোৰাং কাৰবাৰ চলি থকাৰ যি অভিযোগ উত্থাপিত হৈছে, সেই সন্দৰ্ভটো তদন্তৰ দাবী কৰি কয় যে বিষয়টো তদন্ত কৰাৰ বাবে তেওঁলোকৰ বিভাগ আছে ৷ কোনেও আইন হাতত তুলি ল'ব নেলাগে ৷ উল্লেখ্য যে আক্ৰাছুৰ দৰে এটা ছাত্ৰ সংগঠনৰ নেতাৰ এই কাণ্ডকলৈ সৰ্বত্ৰে প্ৰতিক্ৰিয়াৰ সৃষ্টি হৈছে ৷🔯