🔯পৌৰসভা নিৰ্বাচন🔯

🔯পৌৰসভা নিৰ্বাচন🔯

🔯বঙাইগাঁৱত কংগ্ৰেছ প্ৰাৰ্থীৰ হৈ ঘৰে ঘৰে প্ৰচাৰ চলালে অংকিতা দত্তই🔯

📝বঙাইগাঁওঃ ২৮ ফেব্ৰুৱাৰীঃ সমাগত বঙাইগাঁও পৌৰসভা নিৰ্বাচনকলৈ অগপ, বিজেপিৰ লগতে বিৰোধী দল কংগ্ৰেছেও প্ৰচাৰ অভিযান তীব্ৰতৰ কৰি তুলিছে ৷ বঙাইগাঁৱত বৰ্তমান কংগ্ৰেছ দলৰ সাংগঠনিক স্থিতি পূৰ্বৰ তুলনাত দুৰ্বল হৈ পৰা পৰিলক্ষিত হৈছে ৷ দলটোৱে এইবাৰ ২৫ টা ৱাৰ্ডযুক্ত বঙাইগাঁও পৌৰসভা নিৰ্বাচনত ১৯ টা ৱাৰ্ডত প্ৰাৰ্থীত্ব প্ৰক্ষেপ কৰিছে ৷ বিগত পৌৰসভা নিৰ্বাচনত দলটোৱে দুটা ৱাৰ্ড নিজৰ দখলত ৰাখিবলৈ সক্ষম হৈছিল ৷ কিন্তু এইবাৰ দলটোৰ বাবে বিজেপি আৰু অগপই বেলেগে বেলেগে নিৰ্বাচনত অৱতীৰ্ণ হোৱাত ইয়াৰ পূৰ্ণ সুযোগ ল'ব পাৰিলেহেতেন যদিও দলটোৱে যেন সেই সুযোগ লোৱাত ব্যৰ্থ হৈছে ৷ ইয়াৰ মাজতে প্ৰাৰ্থীসকলৰ লগতে দলীয় নেতা - কৰ্মীসকলে দলৰ প্ৰাৰ্থীসকলৰ হৈ নিৰ্বাচনী প্ৰচাৰ অব্যাহত ৰাখিছে ৷ সোমবাৰে বঙাইগাঁৱত দলটোৰ প্ৰদেশ যুৱ কংগ্ৰেছৰ সভানেত্ৰী অংকিতা দত্ত উপস্থিত হৈ সন্ধিয়াৰ ভাগত কেইবাটাও ৱাৰ্ডত প্ৰাৰ্থীসকলৰ হৈ ব্যৱসায়িক প্ৰতিষ্ঠা আৰু  ঘৰে ঘৰে গৈ নিৰ্বাচনী প্ৰচাৰ চলায় ৷ যুৱ কংগ্ৰেছৰ সভানেত্ৰীগৰাকীয়ে পৌৰসভাৰ ৩, ৬,৭ আৰু ১৯ নম্বৰ ৱাৰ্ডত এই নিৰ্বাচনী প্ৰচাৰ চলায় ৷ লগতে ১৯ নম্বৰ ৱাৰ্ডত এটা নিৰ্বাচনী কাৰ্যালয়ো মুকলি কৰে ৷ ইপিনে নিৰ্বাচনী প্ৰচাৰ কাৰ্যৰ মাজতে যুৱ কংগ্ৰেছৰ সভানেত্ৰী অংকিতা দত্তই সংবাদ মাধ্যমৰ আগত কয় যে আমি ৰাইজৰ কাষ চাপিবলৈ চেষ্টা কৰিছো ৷ আমাৰ বিশ্বাস যে এইবাৰ বঙাইগাঁৱত আমি পৌৰসভা গঠন কৰিম ৷ হয় কঠিন হ'ব , কিন্তু আমি প্ৰত্যাহ্বানৰ সময়ত কংগ্ৰেছ কৰিবলৈ ওলাই আহিছো ৷ আজি ৰাইজ সুখী নহয় ৷ নগৰৰ ৰাইজ ক'ত সুখী  হৈছে ৷ স্বচ্ছ ভাৰতৰ ডাঙৰ ডাঙৰ প্ৰচাৰ কৰিছে, পষ্টাৰ লগাইছে ৷ কিন্তু ইয়াৰ বিপৰীতে বঙাইগাঁও চহৰখন কিমান স্বচ্ছ হৈ আছে  ৷ য'তে ততে জাৱৰ ৷ ঠিক তেনেদৰে এতিয়া সন্ধিয়া হৈছে আৰু মহিলাসকলে পাকঘৰত  গেছটো জ্বলাব যদিও সেই গেছ চিলিণ্ডাৰ এটাৰ দাম এহেজাৰৰো অধিক ৷ জুৰুলা অৱস্থা হৈছে ৷ মিঠাতেলৰ দাম ২২১ টকা হৈছে ৷

এইটো পৌৰসভা নিৰ্বাচন হয় ৷ কিন্তু এই পৌৰসভা নিৰ্বাচনত  ৰাইজে এটা প্ৰত্যুত্তৰ দিব ৷ কেৱল হিতাধিকাৰীৰ ৰাজনীতি কৰি এহেজাৰ টকাৰ অৰুণোদয় আঁচনিৰ ধন দি একো লাভ নাই ৷ তেওঁলোকে ৰাইজক সকাহ দিব লাগে ৷ বস্তু - বাহানিৰ দাম কম হ'ব লাগে, চৰকাৰী চাকৰি দিব লাগে , পৌৰসভাখন স্বচ্ছ হ'ব লাগে আৰু বাট- পথ, নলা - নৰ্দমা ব্যৱস্থা ভাল হ'ব লাগে বুলি কয় ৷ আনহাতে অগপ বিধায়ক ফনীভূষণ চৌধুৰীয়ে পৌৰসভা নিৰ্বাচনৰ পিচত আঞ্চলিকতাবাদৰ পুনৰ উত্থান হ'ব বুলি কৰা মন্তব্য সন্দৰ্ভত প্ৰদেশ যুৱ কংগ্ৰেছৰ সভানেত্ৰীগৰাকীয়ে কয় যে বিধায়কগৰাকীয়ে এইধৰণৰ কথা কলে 'কা' আন্দোলনৰ সময়ত যে তেওঁ চকুপানী টুকিছিলে, অভিনয় কৰিছিলে সেইখিনি কথা মনত পৰে ৷ এই নিৰ্বাচনী প্ৰচাৰ অভিযানত প্ৰদেশ যুৱ কংগ্ৰেছৰ সভানেত্ৰীগৰাকীক জিলা কংগ্ৰেছৰ সভাপতি মৃণাল অধিকাৰী, প্ৰদেশ কংগ্ৰেছৰ সম্পাদক জ্যোতিৰ্ময় বৈশ্য , জিলা মহিলা কংগ্ৰেছৰ সভানেত্ৰী সাৰদা ৰায় চৌধুৰী, ৱাৰ্ডৰ প্ৰাৰ্থীসকলকে ধৰি দলৰ নেতা- কৰ্মীয়ে সংগ দিয়ে ৷🔯