🔯নিউ বঙাইগাঁৱৰ ডাংতলাস্থিত জয় মংলা কনষ্ট্ৰাকচন লিমিটেডৰ গুদামৰ পৰা চুৰি কেটেনাৰী তাঁৰ🔯

🔯নিউ বঙাইগাঁৱৰ ডাংতলাস্থিত জয় মংলা কনষ্ট্ৰাকচন লিমিটেডৰ গুদামৰ পৰা চুৰি কেটেনাৰী তাঁৰ🔯

🔯আৰপিএফৰ অভিযানঃ বাহন, তাঁৰসহ আটক দুজন🔯

📝বঙাইগাঁওঃ ২২ মাৰ্চ: ৰে’ল পথৰ বৈদ্যুতিকৰণৰ কামত নিয়োজিত নিউ বঙাইগাঁৱৰ ডাংতলাস্থিত জয় মংলা কনষ্ট্ৰাকচন লিমিটেডৰ গুদামৰ পৰা ৰে’লৱেৰ বৈদ্যুতিকৰণৰত ব্যৱহৃত তামৰ তাঁৰ (কেটেনাৰী তাঁৰ)  চোৰাংভাৱে বিক্ৰী কৰিবলৈ নিয়া দুজন ব্যক্তিক ৰে'লৱে সুৰক্ষা বাহিনীৰ বিশেষ অভিযানকাৰী দলে আৰক্ষী আৰু স্থানীয় ৰাইজৰ সহযোগত আটক কৰিছে ৷ জানিব পৰা মতে কোম্পানীটোৰ তৰফৰ পৰা পূৰ্বে মূল্যবান তামৰ তাঁৰ চুৰি হৈ থকাৰ অভিযোগ ৰে'লৱে সুৰক্ষা বাহিনীক দিয়াৰ পিচৰ পৰা এই চুৰি কাৰ্য চক্ৰত জড়িতক আটক কৰাৰ বাবে বিভাগটোৱে গোপনভাৱে বিষয়টো নীৰিক্ষণ কৰি আহিছিল ৷ ইয়াৰ মাজতে দেওবাৰে নিশা বঙাইগাঁও জিলাৰ বৰপথাৰ গাঁৱৰ স্ক্ৰেপৰ দোকানৰ গৰাকী সোনাউদ্দিন আলীৰ দোকানৰ সন্মুখৰ পৰা এএছ ১৯-চি/৮৭৮১ নম্বৰৰ এখন সামগ্ৰী কঢ়িওৱা অটোত ৰে’লৱেৰ বৈদ্যুতিকৰণত ব্যৱহৃত এক বাণ্ডিল তামৰ তাঁৰ (কেটেনাৰী তাঁৰ ) জব্দ কৰে ৷ উল্লেখ্য যে এক গোপন সূত্ৰৰ পম খেদি ৰে’লৱে সুৰক্ষা বাহিনীৰ বিশেষ দল আৰু ৰঙিয়া সংমণ্ডলৰ চি আই বিৰ দ্বাৰা নিউবঙাইগাঁও ৱাৰ্কশ্বপৰ সুৰক্ষা বাহিনীৰ পৰিদৰ্শক বিমল চন্দ্ৰ দাসৰ তত্বাৱধানত তথা নিউ বঙাইগাঁও আৰক্ষী পহৰা চকীৰ আৰক্ষী আৰু স্থানীয় লোকৰ উপস্থিতিত চলোৱা অভিযানত জয় মংলা কনষ্ট্ৰাকচন লিমিটেডৰ চুপাৰ ভাইজাৰ তথা উত্তৰ প্ৰদেশৰ আগ্ৰাৰ যোগদিশপুৰা থানাৰ অন্তৰ্গত আংগুথা, বিশপুৰীৰ সঞ্জয় চোলাংকি(২৭) আৰু কোম্পানীটোক প্ৰদান কৰা ভাড়াতীয়া বাহনৰ চালক হিচাপে কাম কৰা কামৰূপ গ্ৰাম্য জিলাৰ চাংসাৰিৰ পূৰবী নগৰৰ ৰবিউল হুছেইনক (২২) আটক কৰিবলৈ সক্ষম হয় ৷ আটকাধীন লোকদ্বয়ে ডাংতলাস্থিত জয় মংলা কনষ্ট্ৰাকচনৰ ডাংতলাস্থিত গুদাম আৰু কেম্পৰ পৰা কেটেনাৰী তাঁৰৰ বাণ্ডিল চোৰাংভাৱে বিক্ৰীৰ বাবে নিয়াৰ কথা স্বীকাৰ কৰে কৰিছে ৷ লগতে প্ৰতি কিলোগ্ৰাম তাঁৰ ৪৮০ টকাকৈ স্ক্ৰেপ দোকানী সোনাউদ্দিনক বিক্ৰী কৰাৰ বাবে কথা হৈছিল বুলিও স্বীকাৰ কৰে ৷ নিউ বঙাইগাঁও ৱৰ্কশ্বপৰ সুৰক্ষা বাহিনীৰ পৰিদৰ্শক বিমল চন্দ্ৰ দাসে জানিব দিয়া মতে ছালাকাটিৰ এন টি পি চি, ডাংতলাৰ পৰা বঙাইগাঁও শোধনাগাৰলৈ প্ৰৱেশ কৰা ৰে’লৱে পথৰ লগতে য়াৰ্ডৰ কাৰ্বন লাইন আদিত অতি সম্প্ৰতি বৈদ্যুতিকৰণৰ কাম চলি আছে আৰু এই কামৰ সৈতে কোম্পানীটো জড়িত হৈ আছে ৷ এই বৈদ্যুতিকৰণৰ কামত  ব্যৱহৃত তাঁৰৰ চুৰি কাৰ্য সংঘটিত হৈ ৰে’লৱে বিভাগক উদ্বিগ্ন কৰি তুলিছে ৷ জব্দকৃত ৮৯.৪০০ কিলোগ্ৰাম (১৬২ মিটাৰ দৈৰ্ঘ্য) ওজনৰ কেটেনাৰী তাঁৰৰ বজাৰ মূল্য প্ৰায় ৫৮ হেজাৰ টকা হ’ব ৷ আনহাতে অভিযানকাৰী দলৰ উপস্থিতিৰ উমান পাই স্ক্ৰেপ দোকানী সোনাউদ্দিন আৰু অটোখনৰ চালকে পলায়ন কৰিবলৈ সক্ষম হয় যদিও অনুসন্ধান অব্যাহত ৰাখিছে অভিযানকাৰী দলে ৷ ইপিনে অভিযানকাৰী দলে কোম্পানীটোৰ ডাংতলাযস্থিত গুদামতো অনুসন্ধান চলায় যদিও কিছু সামগ্ৰী পৰি আছিল যদিও কিমান সামগ্ৰী আছিল আৰু প্ৰাপ্তি কৰিছিল তথা বাহিৰলৈ লৈ যোৱা হৈছে তাৰ কোনো তথ্য পঞ্জীয়ন তথা নথি পোৱা নগ'ল বুলিও পৰিদৰ্শকগৰাকীয়ে জানিবলৈ দিছে ৷ এই সংক্ৰান্তত নিউ বঙাইগাঁও ৰে'লৱে সুৰক্ষা বাহিনীৰ থানাত ২১ মাৰ্চত ৬/২২ নম্বৰৰ ( ইউ/এছ ৩(এ) আৰপি (ইউপি) এক্ট) এটি গোচৰ ৰুজু কৰি তদন্ত অব্যাহত ৰাখিছে ৷ লগতে গ্ৰেপ্তাৰ কৰা ব্যক্তি দুজনক ন্যায়িক জিম্মাৰ বাবে আদালতলৈ প্ৰেৰণ কৰিছে ৷🔯