🔯চিৰাঙৰ ভাৰত ভূটান সীমান্তৱৰ্তী এলেকাত ডকাইতৰ ত্ৰাস

🔯চিৰাঙৰ ভাৰত ভূটান সীমান্তৱৰ্তী এলেকাত ডকাইতৰ ত্ৰাস🔯

🔯শুন্যলৈ গুলী চালনা কৰি লুটি নিলে ধন ,সোণৰ অলংকাৰ🔯 

  

📝News4Bongaigaon:৩০ মাৰ্চঃ চিৰাং জিলাৰ ভাৰত ভূটান সীমান্তৱৰ্তী কয়লা ময়লা উপ আৰক্ষী চকীৰ অধীনৰ মালিভিটা ভি চি ডি চিৰ অধীনৰ দুটাকৈ স্থানত মঙলবাৰৰ নিশা অচিনাক্ত ডকাইতৰ দলে শুন্যলৈ গুলী চালনা কৰি  নগন ধন আৰু সোণৰ অলংকাৰ লুটি নিয়াৰ ঘটনা সংঘটিত হৈছে৷ উল্লেখ্য বিটিআৰ শান্তি চুক্তি সম্পাদনৰ পিছত বিটিচিত শান্তি প্ৰতিষ্ঠা হৈছিল যদিও চিৰাঙত মঙলবাৰৰ নিশা অস্ত্ৰধাৰী অচিনাক্ত ডকাইতৰ দলে দুটাকৈ ডকাইতি কাণ্ডৰ ঘটনা সংঘটিত কৰে ৷ প্ৰথমটো ঘটনা সংঘটিত হয় মালিভিটা ভিচিডিচিৰ অধীনৰ দুই নম্বৰ যমুনাগুৰি গাঁৱত ৷ ছজনীয়া অস্ত্ৰধাৰী ডকাইতৰ দলে সন্ধিয়া প্ৰায় ৭-১৫ বজাত যমুনাগুৰি গাঁৱৰ অবিনাশ মুছাহাৰী নামৰ তামোলৰ ব্যৱসায়ীৰ ঘৰত প্ৰৱেশ কৰি পিষ্টলেৰে হত্যাৰ ভাবুকি দি ব্যৱসায়ীজনৰ পৰিয়ালৰ পৰা দুই লাখ টকা লৈ যোৱাৰ লগতে পৰিবাৰৰ পৰা দুযোৰ কাণৰ সোণ লৈ যায় ৷ মুখত কলা কাপোৰ, মাস্ক পিন্ধি অহা ছজনীয়া যুৱকৰ দলটোৰ সকলোৰে লগত পিষ্টল আছিল বুলি মুছাহাৰীয়ে সংবাদ মাধ্যমৰ আগত প্ৰকাশ কৰে ৷ মুছাহাৰীয়ে জানিবলৈ দিয়া মতে ডকাইতৰূপী যুৱক সকলৰ স'তে প্ৰত্যেকৰে লগত পিষ্টল আছিল ৷ অন্যহাতে দ্বিতীয় ঘটনা সংঘটিত হয় প্ৰথম ঘটনাৰ চাৰি কিলোমিটাৰ নিলগৰ মালিভিটা ইন্দ্ৰপুৰ গাঁৱত ৷ মালিভিটা বজাৰৰ গেলামাল দোকানী কৃষ্ণ লুইটেলৰ ঘৰত তিনিজনীয়া পিষ্টলধাৰী যুৱকে লুইটেলৰ বোৱাৰীক ঢকিয়াই দি ঘৰৰ ভিতৰত দুটাকৈ পিষ্টলৰ গুলি ফুটাই মৃত্যুৰ ভাবুকি দি কৃষ্ণ লুইটেলৰ লগতে পুত্ৰ বোৱাৰীৰ পৰা কমেও চাৰি লাখ টকা লৈ যায় ৷ দলটোৱে কৃষ্ণ লুইটেলক এমাহত পঞ্চাশ লাখ টকা জমা  ৰাখিবলৈকো ধমকি দি যায় ৷ ডকাইতৰূপী যুৱকৰ দলে বাইক নে চাৰিচকীয়া বাহন বাহন ব্যৱহাৰ কৰিছিল এই সন্দৰ্ভত জানিব পৰা হোৱানাই ৷ দুয়োটা ঘটনা একেটা ডকাইতৰ দলে সংঘটিত কৰা বুলি সন্দেহ কৰা হৈছে ৷ 

ইপিনে মঙলবাৰৰ৷নিশাৰ ঘটনাৰ পাছতে চিৰাং আৰক্ষীৰ শীৰ্ষ বিষয়াই ঘটনাস্থলীত উপস্থিত হৈ ঘটনাৰ তদন্ত আৰম্ভ কৰে ৷ ঘটনা সন্দৰ্ভত চিৰাঙৰ  আৰক্ষী অধীক্ষক প্ৰাণজিত বৰাই সংবাদ মাধ্যমক জানিবলৈ দিয়া মতে ঘটনাৰ পাছতে আৰক্ষীয়ে বিষয়টো গুৰুত্ব সহকাৰে লৈ তদন্ত আৰম্ভ কৰিছে ৷ অতি সোনকালে অপৰাধী সকলক কৰায়ত্ত কৰিবলৈ সক্ষম হ'ব বুলিও সংবাদ মাধ্যমৰ আগত প্ৰকাশ কৰে ৷ বিটিচিৰ পৰিষদীয় সদস্য মাধৱ চন্দ্ৰ ছেত্ৰীয়ে সংবাদ মাধ্যমৰ আগত মঙলবাৰৰ নিশা চিৰাঙৰ মালিভিটা অঞ্চলত দুষ্কতিকাৰীয়ে  ডকাইতি কাণ্ড সংঘটিত কৰা ঘটনাৰ গৰিহণা দিয়ে ৷ এই বিষয়ে বিটিচি প্ৰশাসনে উচ্চ পৰ্যায়ত আলোচনা কৰি বিহিত ব্যৱস্থা গ্ৰহণৰ নিৰ্দেশ দিয়া হ’ব বুলি মত ব্যক্ত কৰে ৷🔯