🔯বঙাইগাঁৱত বৰদৈচিলাৰ তাণ্ডৱঃ এজনৰ মৃত্যু🔯

 

🔯বঙাইগাঁৱত বৰদৈচিলাৰ তাণ্ডৱ: এজনৰ মৃত্যু🔯 

🔯মহিলা আহতঃ বিদ্যুত সংযোগ বিচ্ছিন্ন 🔯

📝বঙাইগাঁওঃ ১৬  এপ্ৰিলঃ পহিলা ব'হাগৰ নিশা বৰদৈচিলাৰ তাণ্ডৱত বঙাইগাঁৱৰ একাধিক অঞ্চলত ব্যাপক ক্ষতি হয় ৷ উল্লেখ্য যে শুকুৰবাৰে সন্ধিয়াৰে পৰা বঙাইগাঁৱত প্ৰৱল ধুমুহা আৰু  শিলাবৃষ্টি হয় ৷ দীৰ্ঘ সময় জুৰি এই ধুমুহা বৰষুণৰ ফলত কেইবা ঠাইত বৃহৎ বৃহৎ আকাৰৰ গছ বাগৰি পৰে ৷ ইয়াৰ ফলত বহুতো অঞ্চলত যাতায়ত ব্যৱস্থা ব্যহত হৈ পৰে ৷ সেইদৰে উৰুৱাই নিয়ে ঘৰৰ টিনপাত ৷ ধুমুহাৰ ফলত বঙাইগাঁও পাগলাস্থান বজাৰত দোকানৰ চালি ভাঙি হেঁচা মাৰি ধৰে প্ৰায় ৭০ বছৰ বয়সৰ  লক্ষণ দেৱ শ্বাহ নামৰ বৃদ্ধ লোকজনক ৷ শাক পাচলি তথা ফলত বিক্ৰী কৰা বৃদ্ধ লোকজনৰ দেহত দোকানৰ চালি ভাঙি হেঁচা মাৰি ধৰাৰ ফলত দোকানীজন গুৰুত্বভাৱে আহত হয় ৷ পিচত ততাতৈয়াকৈ বঙাইগাঁও স্বাগত হস্পিতালত ভৰ্তি কৰা হয় যদিও উন্নত চিকিৎসাৰ বাবে লোকজনক বঙাইগাঁও অসামৰিক চিকিৎসালয়ত ভৰ্তি কৰোৱা হয় যদিও পিচত মৃত্যু ঘটে দোকানীজনৰ ৷ লক্ষণ দেৱ শ্বাহ নামৰ এই লোকজনৰ কৰুণ মৃত্যু ঘটাত পাগলাস্থান বজাৰত শোকৰ ছাঁ পৰে ৷ আনহাতে  নিউ বঙাইগাঁৱত ঘৰৰ ওপৰত গছ বাগৰি পৰাত গুৰুতৰভাৱে আহত হয় লক্ষী বৰ্মণ নামৰ এগৰাকী মহিলা ৷ পিচত সংকটজনক অৱস্থাত বৰপেটা মেডিকেল কলেজলৈ প্ৰেৰণ কৰা হয় মহিলা গৰাকীক ৷ ইপিনে বীৰঝৰা চাহ বাগানৰ ভীম বাহাদুৰ বিশ্বকৰ্মা নামৰ শ্ৰমিক এজনৰ বাসভৱনত বিশাল গছ এডাল বাগৰি পৰে ৷ যাৰ ফলত বাসগৃহটো  সম্পূৰ্ণ বিধ্বস্ত হৈ পৰে ৷অৱশ্যে পৰিয়ালৰ কোনো লোক  ঘৰত নথকাত বৃহৎ দুৰ্ঘটনাৰ পৰা ৰক্ষা পৰে পৰিয়ালটো ৷

সেইদৰে  বঙাইগাঁও সদৰ থানাৰ সন্মুখতো বৃহৎ গছ এডাল বাগৰি পৰে ৷ বৃহত্তৰ বঙাইগাঁও প্ৰেছ ক্লাবতো বৃহৎ গছ এডাল বাগৰি পৰে ৷ বঙাইগাঁও কলেজ ৰোড, জিলা উপায়ুক্তৰ আৱাসলৈ যোৱা পথ, নতুন পাৰা , পালপাৰা আদিতো গছ বাগৰি পৰে পথত ৷ আনকি ঘৰৰ ওপৰতো গছ বাগৰি পৰাত ক্ষতি হয় ৷ আনহাতে চিটকাগাঁৱত ধুমুহাত  বিভিন্নজনৰ ঘৰৰ ক্ষতি হয় ৷ সেইদৰে ডাংতল পঞ্চায়ত, আটুগাওঁ পঞ্চায়তৰ বৃষ্টিত অঞ্চলতো ধুমুহাৰ ফলত ক্ষতি হয় ৷ বিদ্যুতৰ খুঁটা ভাগি পৰাৰ লগতে ট্ৰেন্সফৰ্মাৰ বাগৰি পৰে ৷ ঠায়ে ঠায়ে বিদ্যুতৰ তাঁৰৰ ওপৰত গছ বাগৰি পৰাত তাঁৰ চিগি পৰে ৷ উল্লেখ্য যে শুকুৰবাৰে সন্ধিয়া এই ধুমুহা - বৰষুণ আৰম্ভ হোৱা সময়ৰ পৰা বঙাইগাঁৱত বিদ্যুত সংযোগ বিচ্ছিন্ন হৈ পৰে ৷ এই বাতৰি যুগুত কৰা সময়লৈকে গোটেই বঙাইগাঁৱত বিচ্ছিন্ন হৈ থাকে বিদ্যুত সংযোগ ৷ ইপিনে বাট-পথসমূহ মুকলি কৰাৰ বাবে এছ ডি আৰ এফে যুদ্ধকালীন ক্ষীপ্ৰতাৰে কাম কৰি আছে ৷🔯