🔯চিৰাঙৰ দুটাকৈ স্থানত গুলীচালনাঃ দুজনকৈ দুৰ্ধৰ্ষ দুৰ্বৃত্তৰ লগতে নিহত আন এজন নীৰিহ যুৱক🔯

🔯চিৰাঙৰ দুটাকৈ স্থানত গুলীচালনাঃ দুজনকৈ দুৰ্ধৰ্ষ দুৰ্বৃত্তৰ লগতে নিহত আন এজন নিৰীহ যুৱক🔯

🔯অতিৰিক্ত আৰক্ষী অধীক্ষক আহত🔯

 

🔯ঘটনাত জড়িতক কঠোৰ শাস্তি প্ৰদানৰ দাবী এবছুৰ🔯 

📝চিৰাং: ৫ এপ্ৰিলঃ চিৰাং জিলাৰ ভাৰত-ভূটান সীমান্তৱৰ্তী আমটেকাৰ যমুনাগুৰি আৰু ইন্দ্ৰপুৰত যোৱা ২৯ মাৰ্চৰ নিশা সংঘটিত ডকাইতি কাণ্ডৰ মূল অভিযুক্তক কৰায়ক্তৰ বাবে চিৰাং আৰক্ষীয়ে জোৰদাৰ অভিযান চলোৱাৰ সময়তে সোমবাৰে নিশা চিৰাঙত পৃথকে পৃথকে দুটাকৈ স্থানত গুলীচালনাৰ ঘটনা সংঘটিত হয় ৷ জিলাখনৰ খুংগ্ৰীঙত আৰক্ষী আৰু অস্ত্ৰধাৰী দুৰ্বৃত্তৰ লগত মুখামুখি সংঘৰ্ষত আৰক্ষীৰ গুলিত দুজনকৈ দুৰ্ধৰ্ষ প্ৰাক্তন উগ্ৰপন্থী নিহত হয়৷ আৰক্ষীৰ লগত হোৱা মুখামুখি সংঘৰ্ষত মহন্ত নাৰ্জাৰী আৰু তেওঁৰ এজন সতীৰ্থ গুৰুতৰ ভাবে আঘাতপ্ৰাপ্ত হয় । পিচত দুয়োকে কাজলগাঁৱৰ জেএছবি চিকিৎসালয়লৈ নিয়া হয় যদিও চিকিৎসকে দুয়োকে মৃত বুলি ঘোষণা কৰে ৷ অৱশ্যে মৃত মহন্ত নাৰ্জাৰীৰ সতীৰ্থ জনক চিনাক্ত কৰিব পৰা হোৱা নাই। আৰক্ষীয়ে নিহত অস্ত্ৰধাৰী দুয়োকে প্ৰাক্তন এনএলএফবি সদস্য বুলি ধাৰণা কৰিছে৷ উল্লেখ্য যে আৰক্ষীৰে হোৱা গুলীয়াগুলীৰ ঘটনাত চিৰাঙৰ অতিৰিক্ত আৰক্ষী অধীক্ষক প্ৰকাশ মেধীয়ে সোঁ হাতত দুটাকৈ গুলি লাগি গুৰুতৰ ভাবে আঘাতপ্ৰাপ্ত হয় আৰু আহত আৰক্ষীৰ শীৰ্ষ বিষয়া৷ প্ৰকাশ মেধীক নিশাৰ ভাগতে উন্নত চিকিৎসাৰ বাবে গুৱাহাটীৰ জিএমচিএইচলৈ ৰেফাৰ কৰা হৈছে৷ ইপিনে ঢালিগাঁও থানাৰ অন্তৰ্গত কিষাণ বজাৰৰ সমীপৰ খামাৰপাৰাতো দুষ্কৃতিকাৰীৰ গুলীত ৰাজা বড়ো (২০) নামৰ এজননিৰীহ যুৱকৰ মৃত্যু হয়৷ ৰাজা বড়োৰ ভিনিহিয়েক মনোৰঞ্জন নাৰ্জাৰীৰ ঘৰত অস্ত্ৰধাৰী দুস্কৃতিকাৰীয়ে হেনো ডকাইতিৰ পাং পাতিছিল৷ এই ঘটনাৰ খবৰ পোৱাৰ পিছত ৰাজা বড়োয়ে খবৰ লবলৈ যাওঁতে ৰাস্তাতে ৰাজা বড়োক ডকাইতৰ দলটোৱে গুলীয়াই হত্যা কৰে বুলি ৰাইজে সংবাদ মাধ্যমক জানিব দিছে। ৰাজা বড়োৰ লগত এজন কিশোৰো আছিল। কিশোৰজনে কোনো মতে দৌৰি প্ৰাণ ৰক্ষা কৰে। ডকাইত কেইজন ৰাজা বড়োৰ চিনাকি আছিল বাবেই তেওঁক হত্যা কৰা হৈছে বুলি গাঁৱৰ বাসিন্দা সকলে সংবাদ মাধ্যমক জানিবলৈ দিয়ে ৷ ইপিনে নিশা সংঘটিত ঘটনাৰ পিচতেই সমগ্ৰ চিৰাং জিলাত চাঞ্চল্যৰ সৃষ্টি হৈছে ৷

🔯ৰাজা বড়োৰ ঘৰত এবছুৰ প্ৰতিনিধি,পৰ্যাপ্ত ক্ষতিপূৰণৰ দাবী

চিৰাঙৰ ঢালিগাঁও থানাৰ অন্তৰ্গত কিষাণ বজাৰৰ সমীপৰ খামাৰপাৰাত সোমবাৰৰ নিশা সংঘটিত ঘটনাৰ খবৰ ল'বলৈ মঙলবাৰে এবছুৰ কেন্দ্ৰীয় আৰু চিৰাং জিলা সমিতিৰ প্ৰতিনিধি দল উপস্থিত হয় আৰু দলটোৱে শোকসন্তপ্ত পৰিয়ালক সমবেদনা জ্ঞাপন কৰে৷ এবছুৰ সভাপতি দ্বীপেন বড়ো আৰু সাধাৰণ সম্পাদক খনীন্দ্ৰ বসুমতাৰী তথা চিৰাং জিলাৰ প্ৰতিনিধি উপস্থিত হৈ ঘটনাৰ তদন্ত কৰাৰ লগতে বিটিআৰ আৰু ৰাজ্য চৰকাৰক ৫০ লাখ টকাৰ ক্ষতিপূৰণ প্ৰদানৰ বাবে দাবী উত্থাপন কৰে৷ এবছুৰ দলটোৱে লগতে ঘটনাত জড়িতক কঠোৰ শাস্তি প্ৰদানৰ দাবী জনায়৷🔯