🔯পুনৰ মুকলি হ'ব বঙাইগাঁও ছুইমিং পুল🔯

🔯পুনৰ মুকলি হ'ব বঙাইগাঁও ছুইমিং পুল🔯

🔯বঙাইগাঁও জিলা ক্ৰীড়া সন্থাই পহিলা মে’ৰ পৰা শিশু, যুৱক- যুৱতীক প্ৰদান কৰিব সাঁতোৰৰ প্ৰশিক্ষণ🔯

📝বঙাইগাঁওঃ ১৯ এপ্ৰিলঃ সাঁতোৰ খেলুৱৈ বা সাঁতোৰবিদ হ'বলৈ ইচ্ছুক ব্যক্তি সকলৰ বাবে  সু -খবৰ ৷ কৰ’না মহামাৰীৰ পৰিপ্ৰেক্ষিতত বন্ধ হৈ থকা বঙাইগাঁও ছুইমিং পুল পুনৰ মুকলি কৰাৰ বাবে বঙাইগাঁও জিলা ক্ৰীড়া সন্থাই  আগবাঢ়িছে ৷ ইতিমধ্যে জিলা ক্ৰীড়া সন্থাই চিলাৰায় ইণ্ডোৰ ষ্টেডিয়ামৰ কাষৰ বঙাইগাঁও ছুইমিং পুলটো চাফ চিকুন কৰাৰ বাবে ব্যৱস্থা কৰাৰ কথা প্ৰকাশ কৰিছে বঙাইগাঁও জিলা ক্ৰীড়া সন্থাৰ সদস্য পলাশ শাস্ত্ৰীয়ে ৷ বঙাইগাঁও চহৰৰ বৰপাৰাস্থিত চিলাৰায় ইণ্ডোৰ ষ্টেডিয়ামৰ কাষৰ  বঙাইগাঁও ছুইমিং পুলৰ কাৰ্যালয়ত বঙাইগাঁও জিলা ক্ৰীড়া সন্থাই (বিডিএচএ) মঙলবাৰে আয়োজিত এক সংবাদমেলত জিলা ক্ৰীড়া সন্থাৰ সদস্য পলাশ শাস্ত্ৰীয়ে কয় যে বৰপাৰা চিলাৰায় ষ্টেডিয়ামৰ গাতে লাগি থকা ছুইমিং পুলটো অহা পহিলা মে’ৰ পৰা প্ৰশিক্ষাৰ্থীৰ প্ৰশিক্ষণৰ বাবে মুকলি কৰা হ’ব৷ 

বঙাইগাঁও জিলা ক্ৰীড়া সন্থাৰ বিষয় ববীয়া বিকাশ পাঠক উপস্থিত থকা সংবাদ মেলত জিলা ক্ৰীড়া সন্থাৰ সদস্য পলাশ শাস্ত্ৰীয়ে লগতে কয় যে  সাঁতোৰৰ প্ৰশিক্ষণ ল'ব বিচৰা ইচ্ছুকসকলে কাৰ্যালয়ৰ পৰা প্ৰ - পত্ৰ সংগ্ৰহ কৰিব পাৰিব ৷ শিশু আৰু যুৱক- যুৱতী সকলোৰ বাবে পৃথকে পৃথকে প্ৰশিক্ষকৰ দ্বাৰা সাঁতোৰৰ প্ৰশিক্ষণ দিয়াৰ ব্যৱস্থা কৰিব৷ উল্লেখ্য যে বঙাইগাঁৱৰ ছুইমিং পুলত প্ৰশিক্ষণ লৈ বঙাইগাঁৱৰ খেলুৱৈ  হিমাংগিনী বৰ্মনে ৫০ মিটাৰ ফ্ৰি ষ্টাইলত ৰাজ্যিক প্ৰতিযোগিতাত তৃতীয় পুৰস্কাৰ লাভ কৰিবলৈ সক্ষম হৈছে বুলিও উল্লেখ কৰে ৷🔯