🔯বইটামাৰীত নিশা ডকাইতিৰ লগত জড়িত তিনি দুৰ্বৃত্ত কৰায়ত্ত🔯

🔯বইটামাৰীত নিশা ডকাইতিৰ লগত জড়িত তিনি দুৰ্বৃত্ত কৰায়ত্ত🔯

📝বঙাইগাঁওঃ ৮ মেঃ বঙাইগাঁও জিলাৰ বইটামাৰীত কালি নিশা এগৰাকী সাহসী বাহন চালকৰ তৎপৰতাত ডকাইতিৰ লগত জড়িত তিনি দুৰ্বৃত্ত কৰায়ত্ত হয় । প্ৰাপ্ত তথ্য মতে, কালি নিশাৰ ভাগত নিউ বঙাইগাঁও ষ্টেচনৰ সমীপৰ পৰা দুজন যুৱকে যোগীঘোপাৰ ঔডুবি লৈ বুলি এ এছ ১৯ এন ২৭১৯ নম্বৰৰ এখন চাৰিচকীয়া বাহন ভাৰা কৰি আনিছিল । কিছুদূৰ অহাৰ পিছতে তেওঁলোকৰ আন এজন বন্ধু বাহনখনত উঠে । তেনেদৰে যুৱক তিনিজনে ভাৰা কৰি বাহনখন আনি থকা অৱস্থাত যুৱককেইজনৰ গতিবিধিৰ ওপৰত চালক ৰফিউল ইছলামৰ সন্দেহ ওপজে । বাহনখনৰ চালকে আৰক্ষীক জনোৱা মতে, বঙাইগাঁও-শালবাৰী গড়কাপ্তানী পথেৰে নিশা আহি থাকোঁতে এজন যুৱকে বাহনখন চলাবলৈ বিচৰাত চালকজন অমান্তি হয় । পিছত যুৱককেইজনে চালকজনক বিভিন্ন ভয়-ভাবুকি দিয়া বুলি চালকে প্ৰকাশ কৰিছে । এনে কাৰ্যকলাপ দেখি যুৱককেইজন দুস্কৃতিকাৰী বুলি চালক নিশ্চিত হয় । তেওঁলোক বইটামাৰী ৰ ৰাষ্ট্ৰীয় ঘাইপথ পোৱাৰ পিছত চালকজনে সুযোগ বুজি ৰাস্তাৰ কাষতে থকা বইটামাৰী আৰক্ষী চকীৰ ভিতৰলৈ বাহনখন সুমুৱাই দিয়ে । তাৰ পিছতে বইটামাৰী আৰক্ষী চকীৰ ভাৰপ্ৰাপ্ত বিষয়া ৰফুল ইছলামৰ নেতৃত্বত বইটামাৰী আৰক্ষীয়ে বাহনখনত থকা যুৱক কেইজনক কৰায়ত্ত কৰে । কৰায়ত্ত কৰা যুৱককেইজন যোগীঘোপাৰ সমীপৰ বৰঘোলাঝাৰৰ  হামিদুল হক , মিজানুৰ ৰহমান আৰু চাপৰ ৰৌমাৰীৰ সমীপৰ ভুপেৰগাঁৱৰ জাহাংগীৰ আলম বুলি জানিব পৰা গৈছে । তেওঁলোকৰ লগত থকা এটা বেগৰ পৰা খুকুৰী, চাকু, ৰচী, কলা টুপি ৰ লগতে নগদ ১১৫০০ টকা আৰু ম'বাইল ফোন জব্দ কৰা বুলি আৰক্ষীয়ে জানিবলৈ দিছে । আৰক্ষীৰ প্ৰাথমিক জেৰাত যুৱককেইজনে ধন লুটৰ পৰিকল্পনা কৰিছিল বুলি জানিবলে দিছে যদিও যুৱককেইজন অপহৰণ তথা গাড়ী চুৰি চক্ৰৰ সৈতে জড়িত থকাৰ সন্দেহ কৰা হৈছে । আৰক্ষীয়ে গোচৰ ৰুজু কৰি এই বিষয়ত তদন্ত কৰিব বুলি জানিবলৈ দিছে ৷🔯